”നമ്മുടെ സാമൂഹ്യ ബോധത്തിന്റെയും ജനാധിപത്യ ബോധത്തിന്റെയും ഫലമാണ് ഈ നേട്ടങ്ങൾ”; മമ്മൂട്ടി

“കേരളത്തിന്റെ സാമൂഹിക സൂചികകൾ ലോകത്തെയും അതിസമ്പന്ന രാജ്യങ്ങളെയും അതിശയിപ്പിക്കുന്നതാണ്,” നടൻ മമ്മൂട്ടി പറഞ്ഞു. ലോകത്തിലെ സമ്പന്ന രാഷ്ട്രങ്ങളുടെ ഒരു ഭാഗം പോലുമില്ലാത്ത കേരളം ഇത്തരത്തിലുള്ള നേട്ടങ്ങൾ കൈവരിച്ചതെന്നത് അഭിമാനകരമാണെന്നും, സാമൂഹ്യസേവന രംഗത്ത് കേരളം മുന്നിലുള്ളതെന്നും അദ്ദേഹം അഭിപ്രായപ്പെട്ടു.

“നമ്മുടെ സാമൂഹ്യബോധത്തിന്റെയും ജനാധിപത്യ ബോധത്തിന്റെയും ഫലമായാണ് ഈ നേട്ടങ്ങൾ കൈവരിച്ചത്,” മമ്മൂട്ടി പറഞ്ഞു. സംസ്ഥാന സർക്കാരിന്റെ ‘അതി ദാരിദ്ര്യമുക്ത കേരളം’ പ്രഖ്യാപന ചടങ്ങിൽ സംസാരിക്കുകയായിരുന്നു അദ്ദേഹം. “ഇന്ന് മുഖ്യമന്ത്രി കേരളത്തെ അതിദാരിദ്ര്യമുക്ത സംസ്ഥാനമായി പ്രഖ്യാപിക്കുന്നത് ഒരു വലിയ ഉത്തരവാദിത്വമാണ്. അതിദാരിദ്ര്യത്തിൽ നിന്ന് മാത്രമേ നാം മുക്തരായിട്ടുള്ളൂ; ദാരിദ്ര്യം എന്ന വെല്ലുവിളി ഇനിയും നമ്മെ മുന്നിൽ കാത്തിരിക്കുന്നു. അനേകം പ്രതിസന്ധികളെ കേരളജനത ചേർന്നുനിന്ന് അതിജീവിച്ചതുപോലെ, ഇതും നാം അതിജീവിക്കും. സ്വാതന്ത്ര്യകാലത്തേക്കാൾ ഇപ്പോഴത്തെ ദാരിദ്ര്യ രേഖ കുറഞ്ഞതും നമ്മുടെ സാമൂഹ്യ ബോധത്തിന്റെ ശക്തിയാലാണ്. പരസ്പര സ്‌നേഹവും വിശ്വാസവും അതിരുകളില്ലാത്ത സഹോദര്യവുമാണ് അതിന്റെ അടിസ്ഥാനം,” മമ്മൂട്ടി പറഞ്ഞു.

“ഭരണ സംവിധാനത്തിന് നൽകിയ ഉത്തരവാദിത്തം അവർ വിശ്വാസപൂർവം നിറവേറ്റുമെന്ന് എനിക്ക് ഉറപ്പുണ്ട്. അതിന് ജനങ്ങളിൽ നിന്ന് സഹോദര്യവും സമർപ്പണവും വേണം. അത് കേരളത്തിൽ ഉണ്ടാകും എന്നും ഞാൻ വിശ്വസിക്കുന്നു,” അദ്ദേഹം കൂട്ടിച്ചേർത്തു. എട്ടുമാസമായി പൊതുവേദികളിൽ നിന്നും അകന്നിരുന്നതായും, ഇപ്പോൾ പുറത്തിറങ്ങിയപ്പോൾ നിരവധി കണ്ണഞ്ചിപ്പിക്കുന്ന വികസനങ്ങൾ കണ്ടതായും മമ്മൂട്ടി പറഞ്ഞു.
“കൊച്ചിയിൽ നിന്ന് ഏറെ ദൂരം യാത്ര ചെയ്ത് വരുകയായിരുന്നു. യാത്ര ബുദ്ധിമുട്ടായിരുന്നു, എന്നാൽ ആറ് ഏഴ് മാസത്തിനകം ആ യാത്ര കൂടുതൽ സുഖകരമാകും എന്ന് ഞാൻ വിശ്വസിക്കുന്നു. അതാണ് വികസനം. പക്ഷേ വികസനം എന്നത് റോഡുകളും കെട്ടിടങ്ങളും മാത്രം അല്ല; വികസിക്കേണ്ടത് നമ്മുടെ സാമൂഹ്യജീവിതമാണ്. അത് വികസിക്കണമെങ്കിൽ ദാരിദ്ര്യം പൂർണ്ണമായും ഇല്ലാതാക്കണം. അങ്ങനെ സാധിച്ചിടങ്ങൾ വിരളമാണ്. കേരളം പലതിലും മാതൃകയാണ്, അതിന് പിന്നിൽ ജനങ്ങളുടെ കൂട്ടായ പരിശ്രമമുണ്ട്,” മമ്മൂട്ടി പറഞ്ഞു.

“ദാരിദ്ര്യം ഇല്ലാതാക്കാൻ നാം തോളോടു തോൾ ചേർന്നുനിൽക്കണം. സഹോദര്യത്തോടെ അതിനെ നേരിടാം, അതിജീവിക്കാം. എത്ര ആഡംബര വികസനങ്ങൾ ഉണ്ടായാലും വിശക്കുന്ന വയറിന് മുമ്പിൽ അവക്ക് വിലയില്ല. ആ വയറുകൾ കാണിച്ചറിഞ്ഞുകൊണ്ടാണ് യഥാർത്ഥ വികസനം പൂർത്തിയാകേണ്ടത്,” മമ്മൂട്ടി സമാപിച്ചു.

Tag: These achievements are the result of our social consciousness and democratic consciousness”; Mammootty