അഞ്ച്​ വര്‍ഷം ആഭ്യന്തരം കൈയിലുണ്ടായിട്ടും തന്നെ കള്ളനെന്ന്​ വിളിക്കുന്നവര്‍ എന്തുകൊണ്ട്​ പിടികൂടിയില്ല -ഫിറോസ്​ കുന്നംപറമ്പില്‍
NewsKerala

അഞ്ച്​ വര്‍ഷം ആഭ്യന്തരം കൈയിലുണ്ടായിട്ടും തന്നെ കള്ളനെന്ന്​ വിളിക്കുന്നവര്‍ എന്തുകൊണ്ട്​ പിടികൂടിയില്ല -ഫിറോസ്​ കുന്നംപറമ്പില്‍

മലപ്പുറം: തന്നെ കള്ളനെന്ന്​ വിളിക്കുന്നവര്‍ ആഭ്യന്തര വകുപ്പും പൊലീസും കൈയിലുണ്ടായിട്ടും അഞ്ച്​ വര്‍ഷത്തിനിടെ എന്തുകൊണ്ട്​ പിടികൂടി​യില്ലെന്ന്​ തവനൂര്‍ മണ്ഡലത്തിലെ യു.ഡി.എഫ്​ സ്​ഥാനാര്‍ഥി ഫിറോസ്​ കുന്നംപറമ്പില്‍. ​മണ്ഡലത്തില്‍ നടന്ന തെരഞ്ഞെടുപ്പ്​ പ്രചാരണ യോഗത്തില്‍ സംസാരിക്കുകയായിരുന്നു അദ്ദേഹം. ‘താനൊരു മുസ്​ലിം ലീഗുകാരനായിരുന്നുവെന്നും ചാരിറ്റിയല്ലാതെ ഇപ്പോള്‍ രാഷ്​ട്രീയമി​ല്ലെന്നും പറഞ്ഞത്​ മുതല്‍ തുടങ്ങിയതാണ്​ ആക്രമണം. മനുഷ്യത്വമില്ലാത്ത വര്‍ഗമാണ്​ ഈ ആക്രമണത്തിന്​ പിന്നില്‍.

ചാരിറ്റി അവസാനിപ്പിക്കണമെന്ന ലക്ഷ്യത്തോടെ അവര്‍ നിരന്തരം ആക്രമിച്ചു. ഇതിനെ പ്രതിരോധിക്കാനായി അന്നെല്ലാം താന്‍ രാഷ്​ട്രീയക്കാരനല്ലെന്നും രാഷ്​ട്രീയത്തിലേക്കില്ലെന്നും ഫേസ്​ബുക്കില്‍ നിരന്തരം പറഞ്ഞിരുന്നു. അതിന്‍റെ വിഡിയോ ക്ലിപ്പുകളാണ്​ ഇപ്പോള്‍ എതിരാളികള്‍ പ്രചരിപ്പിക്കുന്നത്​.

താന്‍ ചെയ്​ത പ്രവര്‍ത്തനങ്ങളെല്ലാം സമൂഹ മാധ്യമങ്ങളെ സാക്ഷിനിര്‍ത്തിയാണ്​. രോഗികള്‍ക്ക്​ പൈസ വീതിച്ച്‌​ നല്‍കിയിട്ടുള്ളത്​​ അക്കൗണ്ടുകള്‍ വഴി മാത്രമാണ്​​. ഇതൊക്കെ പരിശോധിക്കാനും തെറ്റുകളുണ്ടെങ്കില്‍ കണ്ടുപിടിക്കാനും ഈ നാട്ടില്‍ പൊലീസ്​ മുതല്‍ എന്‍.ഐ.എ, ആര്‍.ബി.ഐ, വിജിലന്‍സ്​, ഇന്‍റലിജന്‍സ്​, ക്രൈംബ്രാഞ്ച്​ തുടങ്ങിയവരെല്ലാമുണ്ട്​​. അവര്‍ക്കൊക്കെ എന്തായിരുന്നു​ പണി.

ഇപ്പോള്‍ എതിരാളികള്‍ പറയുന്നത്​​ ഫിറോസ്​ കുന്നംപറമ്ബില്‍ കള്ളനാണെന്നാണ്​​. അഞ്ചുകൊല്ലത്തിനിടെ എന്തുകൊണ്ട്​ ഇക്കാര്യം നിങ്ങള്‍ തെളിയിച്ചില്ല. താന്‍ കള്ളനാണെന്ന്​ പറയേണ്ടത്​ തെരഞ്ഞെടുപ്പ്​ അടുക്കുമ്പോഴല്ല -ഫിറോസ്​ കുന്നംപറമ്പില്‍ പറഞ്ഞു.

Related Articles

Post Your Comments

Back to top button