ബിഹാറിൽ ആദ്യഘട്ട വോട്ടെടുപ്പ് ആരംഭിച്ചു; 1,314 സ്ഥാനാർത്ഥികൾ ജനവിധി തേടുന്നു

ബിഹാറിൽ ആദ്യഘട്ട വോട്ടെടുപ്പ് ആരംഭിച്ചു. 18 ജില്ലകളിലെ 121 നിയമസഭാ മണ്ഡലങ്ങളിലാണ് വോട്ടെടുപ്പ് നടക്കുന്നത്. ഈ ഘട്ടത്തിൽ 1,314 സ്ഥാനാർത്ഥികൾ ജനവിധി തേടുകയാണ്. തേജസ്വി യാദവ്, സാമ്രാട്ട് ചൗധരി, തേജ് പ്രതാപ് യാദവ്, മിതാലി താക്കൂർ എന്നിവരടക്കമുള്ള പ്രമുഖർ മത്സരരംഗത്തുണ്ട്. ഏകദേശം 3.75 കോടി വോട്ടർമാരാണ് ഈ ഘട്ടത്തിൽ വിധിയെഴുതുന്നത്. ശക്തമായ പ്രചരണത്തിനൊടുവിലാണ് ആദ്യഘട്ട പ്രചാരണപ്പരിപാടികൾ അവസാനിച്ചത്.

എൻഡിഎയുടെ പ്രചാരണം പ്രധാനമന്ത്രി നരേന്ദ്രമോദിയുടെ നേതൃത്വത്തിലായിരുന്നു. മറുവശത്ത്, മഹാസഖ്യത്തിനായി രാഹുൽ ഗാന്ധിയും പ്രചാരണരംഗത്ത് സജീവമായിരുന്നു. മോദിയുടെയും രാഹുലിന്റെയും വാക്കുപോരായിരുന്നു പ്രചാരണത്തിന്റെ മുഖ്യ ആകർഷണം. രാഹുലിനെയും തേജസ്വി യാദവിനെയും ലക്ഷ്യംവെച്ച് മോദി അഴിമതി ആരോപണങ്ങൾ ഉന്നയിച്ചു. “രണ്ട് രാജകുമാരന്മാർ കറങ്ങി നടക്കുകയാണ്” എന്നായിരുന്നു മോദിയുടെ പരിഹാസം. രാഹുൽ ഗാന്ധി ഛഠ് പൂജയെ അപമാനിച്ചു എന്നതും മോദിയുടെ മറ്റൊരു ആരോപണമായിരുന്നു. മറുവശത്ത്, വോട്ട് മോഷണം ഉൾപ്പെടെയുള്ള ആരോപണങ്ങളാണ് രാഹുൽ മോദിക്കെതിരെ ഉയർത്തിയത്. ചില ഘട്ടങ്ങളിൽ മോദി വ്യാജ ഡിഗ്രിക്കാരനാണെന്നും രാഹുൽ ആരോപിച്ചു.

എൻഡിഎയും മഹാസഖ്യവും വൻ പ്രഖ്യാപനങ്ങളാണ് പ്രകടനപത്രികകളിൽ ഉൾപ്പെടുത്തിയിരിക്കുന്നത്. 69 പേജുകളിലായി 25 പ്രധാന വാഗ്ദാനങ്ങളാണ് എൻഡിഎയുടെ പ്രകടനപത്രികയിൽ ഉൾപ്പെടുത്തിയിട്ടുള്ളത് — ഒരു കോടി യുവാക്കൾക്ക് സർക്കാർ ജോലി, സ്ത്രീകൾക്കായി പ്രത്യേക നൈപുണ്യ വികസന പദ്ധതികൾ തുടങ്ങിയവ പ്രധാന പ്രഖ്യാപനങ്ങളാണ്. മഹാസഖ്യത്തിന്റെ പ്രധാന വാഗ്ദാനം “ഓരോ വീട്ടിലും ഒരു സർക്കാർ ജോലി” എന്നതായിരുന്നു, ഇത് ആർജെഡി നേതാവ് തേജസ്വി യാദവ് നേരത്തേ പ്രഖ്യാപിച്ച വാഗ്ദാനവുമാണ്.

Tag: First phase of polling begins in Bihar; 1314 candidates seeking election