കോഴിക്കോട്: ഭാര്യയും ഭര്‍ത്താവും ശനിയാഴ്ച രാവിലെ ലൈംഗികബന്ധത്തില്‍ ഏര്‍പ്പെട്ടാല്‍ ഭ്രാന്തുള്ള കുട്ടി ജനിക്കുമെന്ന ഉസ്താദിന്റെ വിചിത്ര വാദം രൂക്ഷ വിമര്‍ശനത്തിന് ഇടയാക്കുന്നു. ഉസ്താദ് ഇസ്ലാം മതവിശ്വാസത്തെ വക്രീകരിക്കുന്നുവെന്നാണ് പ്രധാന വിമര്‍ശനം. ഉസ്താദ് എന്ന് അവകാശപ്പെടുന്നയാള്‍ തട്ടിപ്പാണെന്നും വിശ്വാസികളില്‍ ഒരു വിഭാഗം പറയുന്നു.
ആറ്റക്കോയ തങ്ങള്‍ എന്ന ഉസ്താദാണ് ദമ്പതിമാരുടെ ലൈംഗികബന്ധം സംബന്ധിച്ച് നിര്‍ദേശങ്ങളുമായി വീഡിയോ പുറത്തിറക്കിയത്. ഭാര്യയും ഭര്‍ത്താവും വെള്ളിയാഴ്ച രാവിലെയാണ് ലൈംഗികബന്ധത്തിലേര്‍പ്പെടുന്നതെങ്കില്‍, അതിലൂടെ ലഭിക്കുന്ന കുട്ടി ഖുറാന്‍ മനഃപാഠമാക്കുന്നയാളായി മാറും. ശനിയാഴ്ച രാവിലെയാണ് ലൈംഗികബന്ധം നടത്തുന്നതെങ്കില്‍, അതിലൂടെ ജനിക്കുന്ന കുട്ടിക്ക് ഭ്രാന്ത് ഉണ്ടാവാന്‍ സാധ്യതയുണ്ട്. ഇനി ഞായറാഴ്ച രാവിലെയാണ് ബന്ധപ്പെടുന്നതെങ്കില്‍, മറ്റുള്ളവരുടെ സമ്പത്ത് തുടങ്ങിയ കാര്യങ്ങള്‍ മോഷ്ടിക്കപ്പെടുന്നയാളായി മാറും. ഇനി തിങ്കളാഴ്ച രാവിലെയാണ് ബന്ധപ്പെടുന്നതെങ്കില്‍, പരമദരിദ്രവാസിയും മറ്റുള്ളവരുടെ മുന്നില്‍ കൈനീട്ടുന്നവനുമായി മാറും.
ചൊവ്വാഴ്ചയാണ് ലൈംഗികബന്ധത്തിലേര്‍പ്പെടുന്നതെങ്കില്‍, അതിലൂടെ ജനിക്കുന്ന കുട്ടി മാതാപിതാക്കളോട് കരുണയുള്ളവനും ഉപകാരിയുമായി മാറും. ഇനി ബുധനാഴ്ചയാണ് ബന്ധപ്പെടുന്നതെങ്കില്‍, ബുദ്ധിശക്തിയുള്ളതും നന്ദി ഉള്ളവനുമായി മാറും. വ്യാഴാഴ്ചയാണ് ബന്ധപ്പെടുന്നതെങ്കില്‍, ദീനില്‍ (മതവിശ്വാസത്തില്‍) ആത്മാര്‍ത്ഥതയുള്ള കുട്ടിയാവും. പെരുന്നാള്‍ രാവിലെയാണ് ബന്ധപ്പെടുന്നതെങ്കില്‍, ആറ് വിരലുള്ള കുട്ടിയായി മാറും. ആറ് വിരലുള്ള കുട്ടിയായി മാറുക എന്നാല്‍ ഭാഗ്യമുള്ള കുട്ടിയായി മാറും എന്നാണ് അര്‍ത്ഥമാക്കുന്നത്.
ഭാര്യയുമായി ലൈംഗികബന്ധത്തിലേര്‍പ്പെടുമ്പോള്‍ സംസാരിക്കുന്നത് ഒഴിവാക്കുക. അത് ഒഴിവാക്കിയില്ലെങ്കില്‍ ജനിക്കുന്ന കുട്ടി സംസാരശേഷിയില്ലാത്തവനാകും. ഇരുട്ടില്‍ ആണ് ബന്ധപ്പെടുന്നത് എങ്കില്‍ കുട്ടി ‘ശിഹര്‍’ (ദുര്‍മന്ത്രവാദം) ചെയ്യുന്നയാളായി മാറും. വെളിച്ചത്തില്‍ ലൈംഗികബന്ധത്തിലേര്‍പ്പെട്ടാല്‍ നല്ല അഴകുള്ള കുട്ടി ലഭിക്കും. ഇതൊക്കെ ശ്രദ്ധിക്കുന്നത് നല്ലതായിരിക്കുമെന്നും ആറ്റക്കോയ തങ്ങള്‍ ഉപദേശിക്കുന്നു.
Post Your Comments