ബംഗളൂരു: മദ്യലഹരിയില്‍ വനിത യാത്രക്കാരിയോട് റെയില്‍വേ ടിക്കറ്റ് പരിശോധകന്‍ മോശമായി പെരുമാറിയതായി പരാതി. ബംഗളൂരുവിനടുത്തുള്ള കൃഷ്ണരാജപുരം റെയില്‍വേ സ്റ്റേഷനിലായിരുന്നു സംഭവം. ഇതിന്റ വിഡിയോ ദൃശ്യങ്ങള്‍ സമൂഹമാധ്യമങ്ങളില്‍ വൈറലാണ്. കൃഷ്ണരാജപുരം സ്റ്റേഷനില്‍ വനിത യാത്രക്കാരിയെ ട്രെയിനില്‍ നിന്നും പിടിച്ചിറക്കി ടിടിഇ ടിക്കറ്റ് കാണിക്കാന്‍ ആവശ്യപ്പെടുകയായിരുന്നു. കൈവശമുണ്ടായിരുന്ന ടിക്കറ്റ് പെണ്‍കുട്ടി കാണിച്ചുകൊടുത്തുവെങ്കിലും അതിന് ശേഷവും ടി.ടി.ഇ മോശം പെരുമാറ്റം തുടര്‍ന്നുവെന്ന് പെണ്‍കുട്ടിയുടെ സഹയാത്രികരില്‍ ഒരാള്‍ ട്വീറ്റ് ചെയ്തു. ഇതുമായി ബന്ധപ്പെട്ട് പുറത്ത് വന്ന വിഡിയോയില്‍ തന്നെ എന്തിനാണ് ട്രെയിനില്‍ നിന്നും പിടിച്ചിറക്കിയതെന്ന് പെണ്‍കുട്ടി ചോദിക്കുന്നുണ്ട്. പെണ്‍കുട്ടിക്കൊപ്പമുള്ള മറ്റ് യാത്രക്കാര്‍ ടി.ടി.ഇയോട് ക്ഷോഭിക്കുന്നതും വിഡിയോയില്‍ കാണാം.
വിഡിയോ വൈറലായതിന് പിന്നാലെ സംഭവത്തില്‍ ഉള്‍പ്പെട്ട ടി.ടി.ഇ സന്തോഷിനെ സസ്‌പെന്‍ഡ് ചെയ്തുവെന്ന് റെയില്‍വേ അറിയിച്ചു.പെണ്‍കുട്ടി യാത്ര ചെയ്തിരുന്ന ഹംസഫര്‍ എക്‌സ്പ്രസിന് കൃഷ്ണരാജപുരത്ത് സ്റ്റോപ്പില്ല. ട്രെയിനിലുണ്ടായിരുന്ന ടി.ടി.ഇയായിരുന്നില്ല സന്തോഷെന്നും മദ്യപിച്ച് ഇയാള്‍ ഡ്യൂട്ടിക്കെത്തുകയായിരുന്നുവെന്നും തുടരന്വേഷണം നടത്തി ഇയാള്‍ക്കെതിരെ കര്‍ശന നടപടിയുണ്ടാകുമെന്നും റെയില്‍വേ അറിയിച്ചു.നേരത്തെ മദ്യലഹരിയില്‍ യാത്രക്കാരിയുടെ തലയിലേക്ക് മൂത്രമൊഴിച്ച ടി.ടി.ഇയെ സര്‍വീസില്‍ നിന്ന് പിരിച്ചുവിട്ടിരുന്നു. ബിഹാര്‍ സ്വദേശിയായ മുന്നാ കുമാരിനെ സര്‍വീസില്‍ നിന്ന് നീക്കം ചെയ്തതായി കേന്ദ്ര റെയില്‍വേ മന്ത്രി അശ്വിനി വൈഷ്ണവ് അറിയിച്ചു. അകാല്‍ തഖ്ത് എക്സ്പ്രസില്‍ ഭര്‍ത്താവിനൊപ്പം യാത്ര ചെയ്ത സ്ത്രീക്ക് നേരെയാണ് അതിക്രമം ഉണ്ടായത്. സംഭവ ദിവസം മുന്നാ കുമാര്‍ ലീവിലായിരുന്നുവെന്നാണ് പറയുന്നത്. മുന്നാ കുമാറിനെ കഴിഞ്ഞ ദിവസം ലഖ്നൗവില്‍ അറസ്റ്റ് ചെയ്തിരുന്നു.
Post Your Comments