സൗജന്യ വൈഫൈ സ്ട്രീറ്റായി കൊച്ചിയിലെ ‘ക്യൂന്‍സ് വാക്ക് വേ’

എറണാകുളം: കൊച്ചിയില്‍ ഇനി സൗജന്യ വൈഫൈ സ്ട്രീറ്റും. സംസ്ഥാനത്ത് തന്നെ ഇതാദ്യമായാണ് ഒരു സ്ട്രീറ്റാകെ വൈഫൈ സൗകര്യത്തിലാവുന്നത്. ക്യൂന്‍സ് വാക്ക് വേ വൈഫൈ സ്ട്രീറ്റ് ശശി തരൂര്‍ എം പി ഉദ്ഘാടനം ചെയ്തു. ഹൈബി ഈഡന്‍ എം പിയുടെ പ്രാദേശീക വികസന ഫണ്ടില്‍ നിന്നും 31.86 ലക്ഷം രൂപ ചിലവഴിച്ചാണ് ക്യൂന്‍സ് വാക്ക് വേയില്‍ വൈഫൈ ഒരുക്കിയത്. ഗോശ്രീ പാലം മുതല്‍ ചാത്യാത്ത് റോഡില്‍ 1.8 കിലോമീറ്റര്‍ ദൈര്‍ഘ്യത്തിലാണ് സൗജന്യ വൈഫൈ സൗകര്യം കിട്ടുക. 50 എം ബി പി എസ് വേഗതയിലുള്ള ഇന്റര്‍നെറ്റ് ലീസ്ഡ് ലൈന്‍ സര്‍ക്യൂട്ടാണ് ബിഎസ്എന്‍എല്‍ വഴി നല്ഡകുന്നത്. ആകെ ഒമ്പത് പോളുകളാണ് ഉള്ളത്. ഇതില്‍ നിന്ന് 18 ആക്‌സസ് പോയിന്റുകളുണ്ട്. ഒരു പോയിന്റില്‍ നിന്ന് ഒരേ സമയം 75 പേര്‍ക്ക് വൈഫൈ സേവനം ലഭ്യമാക്കും.

സംസ്ഥാനത്താകെ മാതൃകയാക്കാവുന്ന സേവനമാണ് ഇതെന്ന് പദ്ധതി ഉദ്ഘാടനം ചെയ്തുകൊണ്ട് ശശി തരൂര്‍ പറഞ്ഞു. മൂന്ന് വര്‍ഷത്തേക്ക് നടത്തിപ്പിനും പരിപാലനത്തിനുമുള്ള ഫണ്ടാണ് ബിഎസ്എന്‍എല്ലിന് അനുവദിച്ചിട്ടുള്ളത്. ഇന്റര്‍നെറ്റ് സൗകര്യത്തോടൊപ്പം ക്യൂന്‍സ് വാക്ക് വേയില്‍ ആധുനിക സംവിധാനങ്ങളോടെ പൊതു ശുചിമുറിയും ഒരുക്കിയിട്ടുണ്ട്. സ്വകാര്യ പങ്കാളിത്തത്തോടെയാണ് ശുചിമുറിയുടെ പരിപാലനം.