ഇന്ന് ഒന്നാം ഓണം; ഉത്രാടപ്പാച്ചിലിൽ മലയാളികൾ

ഓണം അടുത്തെത്തുന്നതിനൊപ്പം കേരളം മുഴുവൻ വർണാഭമായ ആഘോഷത്തിനൊരുങ്ങുകയാണ്. ഇന്ന് ചിങ്ങമാസത്തിലെ ഉത്രാടം. നാളെ തിരുവോണം വരവേൽക്കാനുള്ള ഒരുക്കങ്ങളാൽ നാടും നഗരവും നിറഞ്ഞിരിക്കുകയാണ്. കേരളത്തിലും വിദേശത്തുമുള്ള മലയാളികൾ വീടുകളിലേക്ക് മടങ്ങി കുടുംബസമേതം ഓണാഘോഷം നടത്താൻ തയ്യാറെടുക്കുന്നു.

തിരുവോണത്തിനായുള്ള അവസാന ഘട്ട ഒരുക്കങ്ങളെയാണ് ഉത്രാടപ്പാച്ചിൽ എന്ന് വിളിക്കുന്നത്. തിരുവോണം അടുത്തതോടെ ടൺ കണക്കിന് പച്ചക്കറി തേനിയിലും ചിന്നമന്നൂർ പോലെയുള്ള വിപണികളിലും എത്തുകയാണ്. ഓണക്കാലത്ത് പതിവുപോലെ ഒരു ആഴ്ച മുൻപേ തന്നെ പച്ചക്കറി വില കുതിച്ചുയരും. ഉത്രാടത്തിനു മുൻദിനം വില കൂടുമെന്ന് കരുതി ചൊവ്വാഴ്ച വിപണികളിൽ വലിയ തിരക്കുണ്ടായി. അതനുസരിച്ച് വ്യാപാരികൾ വില കൂട്ടുകയും ചെയ്തു. എന്നാൽ, വിവരം അറിഞ്ഞ കർഷകർ കൂടുതലായി പച്ചക്കറി കൊണ്ടുവന്നതോടെ പിന്നീട് വില ഇടിഞ്ഞു.

ഇപ്പോൾ മുരിങ്ങക്ക, പടവലങ്ങ, കോവക്ക എന്നിവയ്ക്ക് മാത്രം കിലോയ്ക്ക് അൻപത് രൂപയ്ക്ക് മുകളിലാണ് വില. പതിനഞ്ച് കിലോ തക്കാളിയുടെ ഒരു പെട്ടി കഴിഞ്ഞ ദിവസങ്ങളിൽ 800 രൂപ വരെ വിലയുണ്ടായിരുന്നപ്പോൾ, അത് 250 രൂപയിലേക്ക് ഇടിഞ്ഞു. കേരളത്തിലേക്ക് ഏറ്റവും കൂടുതൽ പച്ചക്കറി എത്തുന്ന മധുര, തേനി വിപണികളിലും അവസ്ഥ ഇതുപോലെയാണ്. എന്നാൽ ചൊവ്വാഴ്ച വ്യാപാരികൾ ഉയർന്ന വിലയ്ക്ക് തന്നെ പച്ചക്കറി വാങ്ങിയതിനാൽ ഉത്രാടത്തിന് മലയാളികൾക്ക് കൂടുതലായ വില കൊടുക്കേണ്ടിവരാനാണ് സാധ്യത.

അതേസമയം, ഉൽപ്പാദനച്ചെലവിനനുസരിച്ചുള്ള വില ലഭിക്കാത്തതിനാൽ കർഷകർ നിരാശയിലാണ്.

Tag: Today is the first Onam; Malayalis in Uthradapachil