കുട്ടിയെ കിണറ്റിൽ എറിഞ്ഞത് അമ്മ ? ഗ്രില്ലും ആൾമറയും ഉള്ള കിണറ്റിൽ കുഞ്ഞ് എങ്ങനെ വീണു?

കുറുമാത്തൂർ പൊക്കുണ്ടിന് സമീപം രണ്ടുമാസം പ്രായമുള്ള കുഞ്ഞിനെ അമ്മ കിണറ്റിൽ എറിഞ്ഞ് കൊലപ്പെടുത്തിയതായാണ് പ്രാഥമിക സൂചന. പൊക്കുണ്ട് ഡെയറി ജുമാ മസ്ജിദിന് സമീപമുള്ള സൈലന്റ് റോഡ്, സ്ട്രീറ്റ് നമ്പർ 2-ൽ ഹിലാൽ മൻസിലിൽ താമസിക്കുന്ന ടി.കെ. ജാബിറിന്റെയും മുബഷിറയുടെയും മകൻ ആമിഷ് അലൻ (2 മാസം) ആണ് മരിച്ചത്. ഇന്നലെ രാവിലെ 10 മണിയോടെ വീടിന്റെ കുളിമുറിക്ക് ചേർന്ന കിണറ്റിൽ കുഞ്ഞിനെ വീണ നിലയിൽ കണ്ടെത്തുകയായിരുന്നു.

ആദ്യഘട്ടത്തിൽ മുബഷിറ കുട്ടിയെ കുളിപ്പിക്കുന്നതിനിടെ അബദ്ധത്തിൽ കിണറ്റിൽ വീണതാണെന്ന് പറഞ്ഞിരുന്നു. എന്നാൽ ഗ്രില്ലും ആൾമറയും ഘടിപ്പിച്ച കിണറിനുള്ളിൽ കുട്ടി വീണെന്ന വിശദീകരണം സംശയം ഉളവാക്കിയിരുന്നു. ബന്ധുക്കളും ഇത് അപകടമാണെന്ന് പറഞ്ഞുവെങ്കിലും, സംഭവസ്ഥല പരിശോധനയ്ക്കു ശേഷം പൊലീസിന് ആശയക്കുഴപ്പമുണ്ടായി.

വീട്ടുകാരുടെ നിലവിളി കേട്ട് എത്തിയ നാട്ടുകാർ കുഞ്ഞിനെ കിണറ്റിൽ നിന്ന് പുറത്തെടുത്തു. ആദ്യം തളിപ്പറമ്പ് സഹകരണാശുപത്രിയിലും പിന്നീട് പരിയാരം മെഡിക്കൽ കോളേജിലുമെത്തിച്ചെങ്കിലും ജീവൻ രക്ഷിക്കാനായില്ല.
തളിപ്പറമ്പ് ഡിവൈഎസ്പി കെ.ഇ. പ്രേമചന്ദ്രന്റെ നേതൃത്വത്തിൽ കഴിഞ്ഞ ദിവസം തന്നെ മുബഷിറയെ ചോദ്യം ചെയ്തിരുന്നു. ഇന്നലെ രാത്രി, ഇന്നലെ രാവിലെ തുടർന്ന അന്വേഷണത്തിനിടെയായിരുന്നു കുഞ്ഞിനെ കിണറ്റിൽ എറിഞ്ഞതാണെന്ന സൂചന പൊലീസ് കൈപ്പറ്റിയത്. മുബഷിറ ഇപ്പോൾ പൊലീസ് കസ്റ്റഡിയിൽ വീട്ടിലാണ്. “കൂടുതൽ വിവരങ്ങൾ വൈകിട്ട് മാത്രമേ വ്യക്തമാക്കാനാകൂ,” എന്നും ഡിവൈഎസ്പി അറിയിച്ചു.
കുഞ്ഞിന്റെ പിതാവ് ജാബിർ കുടക് കുശാൽനഗറിൽ വ്യാപാരിയാണ്. സഹോദരങ്ങൾ – സഫ, അൽത്താഫ്, അമൻ.

Tag: Did the mother throw the child into the well? How did the child fall into the well with a grill and a cover?