പൊലീസ്‌ ആക്ട്‌ ഭേദഗതി ചെയ്യുന്നത് മാധ്യമങ്ങളെ കൂച്ച്‌ വിലങ്ങ്‌ ഇടാൻ.
തിരുവനന്തപുരം∙ സൈബർ കുറ്റകൃത്യങ്ങൾ തടയുന്നതിന്റെ പേരിൽ കേരള പൊലീസ്‌ ആക്ട്‌ ഭേദഗതി ചെയ്യുന്നത് വഴി മാധ്യമങ്ങളെ കൂച്ച്‌ വിലങ്ങ്‌ഇടാനാണെന്നും, ഇക്കാര്യത്തിൽ ആശങ്കയുണ്ടെന്നും, പ്രതിപക്ഷ നേതാവ് രമേശ് ചെന്നിത്തല തിരുവനതപുരത്ത് പറഞ്ഞു. നിലവിലെ നിയമങ്ങൾ തന്നെ സൈബർ കുറ്റകൃത്യങ്ങൾ തടയാൻ പ്രാപ്തമാണ്‌. പൊലീസ്‌ വേണ്ട രീതിയിൽ ആ നിയമം നടപ്പാക്കിയാൽ മതി.
അത് ചെയ്യാതെ, സൈബർ കുറ്റങ്ങൾ തടയാൻ എന്ന പേരിൽ, സർക്കാരിന്‌ എതിരെ വാർത്ത നൽകുന്ന മാധ്യമ പ്രവർത്തകരെ മുഴുവൻ അറസ്റ്റ്‌ ചെയ്ത്‌ ജയിലിൽ അടയ്ക്കാൻ ഉള്ള വകുപ്പ്‌ ആണ്‌ 118 (A) എന്ന ഇൻസെർഷനിലൂടെ സർക്കാർ നടപ്പിലാക്കാന്‍ ശ്രമിക്കുന്നത്. സെക്രട്ടേറിയേറ്റിൽ ഫയൽ കത്തിച്ച സംഭവത്തിൽ വാർത്ത ചെയ്തതിനു മാധ്യമങ്ങൾക്കെതിരെ കേസെടുക്കാൻ പോലും സർക്കാർ ആലോചിച്ചു. മാധ്യമങ്ങളെ വിരട്ടലും ഭയപ്പെടുത്തലും മുഖ്യമന്ത്രിയുടെയും സിപിഎമ്മിന്റെയും സ്ഥിരം തന്ത്രമായിരിക്കുന്നു. ഒടുവിൽ ഫൊറൻസിക് പരിശോധന പുറത്തു വന്നപ്പോഴാണ് മാധ്യമങ്ങൾ പറഞ്ഞത് ശരിയാണെന്ന് വ്യക്തമായതെന്നും ചെന്നിത്തല ചൂണ്ടിക്കാട്ടി.
പുതിയ ഓര്‍ഡിനന്‍സ് പ്രകാരം മാധ്യമങ്ങള്‍ക്കെതിരെയും കേസെടുക്കാമെന്നാണ് നിയമവിദഗ്ധര്‍ പറയുന്നു. അത് പ്രകാരം സാമൂഹ്യമാധ്യമങ്ങള്‍ മാത്രമല്ല, പത്രങ്ങള്‍, ദൃശ്യമാധ്യമങ്ങള്‍ എന്നിവയ്ക്ക് പുറമേ പോസ്റ്ററുകള്‍, ചുവരെഴുത്തുകള്‍ ഇതെല്ലാം പുതിയ നിയമത്തിന്റെ പരിധിയില്‍ വരുന്ന വിനിമയ സങ്കേതങ്ങളാണ്. മാനനഷ്ടക്കേസിൽ ആണെങ്കിൽ ഒരു ഹർജിക്കാരൻ ഉണ്ടാവണം. പുതിയ ഓര്‍ഡിനന്‍സ് പ്രകാരം പൊലീസിന്‌ തന്നെ സ്വമേധയാ കേസ്‌ എടുക്കാം എന്ന അവസരമാണ് ഒരുക്കുന്നത്. വളരെ ഗൗരവതരമായ ഒരു വിഷയം ആണിത്‌. നാളെ ആർക്കെതിരെയും പൊലീസിന്‌ കേസ്‌ എടുക്കാൻ പറ്റുന്ന അവസ്ഥ ഉണ്ടാവും. അത്യന്തം ജനാധിപത്യ വിരുദ്ധവും ഫാസിസ്റ്റ്‌ നടപടിയുമാണിത്‌. ഈ ഓർഡിനൻസിന്‌ ഗവർണർ അനുമതി നൽകില്ല എന്ന് പ്രതീക്ഷിക്കുകയാണ്‌. നടപ്പാക്കാൻ ആണ്‌ ഉദ്ദേശ്യമെങ്കിൽ അത് നിയമപരമായും രാഷ്ട്രീയമായും നേരിടുമെന്നും രമേശ് ചെന്നിത്തല പറഞ്ഞു.
