മാമാങ്കം സിനിമയിലൂടെ മലയാളികളുടെ പ്രിയപ്പെട്ട താരമായ നടി പ്രാചി തെഹ്ലാന്‍റെ കാര്‍ പിന്തുടര്‍ന്നെത്തി അസഭ്യം പറഞ്ഞ് അപമാനിച്ച നാലുപേര്‍ അറസ്റ്റില്‍. ചൊവ്വാഴ്ച പുല‍‍ർച്ചെയാണ് ഡൽഹി രോഹിണിയിൽ പ്രാചിയുടെ കാറിനെ പിന്തുടര്‍ന്ന് നാലംഗ സംഘം എത്തിയത്. പ്രാചി, ഭര്‍ത്താവ് രോഹിതിനോടൊപ്പം വീട്ടിലേക്ക് വരുന്നതിനിടെയാണ് സംഭവം.
കാര്‍ വീടിന് മുന്നിൽ നിര്‍ത്തിയതോടെ കാറിനെ പിന്തുടര്‍ന്നെത്തിയ നാൽവർ സംഘം കാറിൽ നിന്നിറങ്ങി അസഭ്യം പറയുകയായിരുന്നു. നടിയുടെ പരാതിയിൽ പോലീസ് ഇവര്‍ക്കെതിരെ കേസെടുത്തിട്ടുണ്ട്. സംഭവ സമയത്ത് പ്രതികള്‍ മദ്യപിച്ചിരുന്നതായി പോലീസ് മാധ്യമങ്ങളോട് പറഞ്ഞിട്ടുണ്ട്.
മമ്മൂട്ടി ചിത്രമായ മാമാങ്കത്തില്‍ ഉണ്ണിമായ എന്ന കഥാപാത്രമായാണ് പ്രാചി അഭിനയിച്ചിരുന്നത്. ഇന്ത്യൻ നെറ്റ്ബോൾ, ബാസ്കറ്റ്ബോൾ താരവും കൂടിയാണ് പ്രാചി. 2010 ലെ കോമൺവെൽത്ത് ഗെയിംസിലും 2010-2011 ലെ മറ്റ് ഏഷ്യൻ ചാമ്പ്യൻഷിപ്പിലും ഇന്ത്യയെ പ്രതിനിധീകരിച്ചുകൊണ്ട് ഇന്ത്യ നെറ്റ്ബോൾ ടീമിന്‍റെ ക്യാപ്റ്റനായിരുന്നു പ്രാചി. പ്രാചിയുടെ നേതൃത്വത്തിൽ 2011 ലെ സൗത്ത് ഏഷ്യൻ ബീച്ച് ഗെയിംസിൽ ഇന്ത്യൻ ടീമിന്‍റെ ആദ്യ കിരീടം ഇന്ത്യ സ്വന്തമാക്കിയിരുന്നു. നെറ്റ്ബോൾ ഡെവലപ്മെന്‍റ് ട്രസ്റ്റ് ഇന്ത്യയുടെ 2011-2017ലെ ബ്രാൻഡ് അംബാസിഡര്‍ കൂടിയായിരുന്നു പ്രാചി.
