ടിക്ടോക്കിന് വിലക്കേര്‍പ്പടുത്താന്‍ പാകിസ്ഥാനും
ഇന്ത്യക്കു പിന്നാലെ പാകിസ്താനും ചൈനീസ് ഷോര്‍ട്ട് വിഡിയോ ആപ്പായ ടിക്ടോക്ക് നിരോധിക്കാനൊരുങ്ങുന്നതായി റിപ്പോര്‍ട്ട്. ഇതിനിടെ അമേരിക്കയിലും ആസ്ട്രേലിയയിലും നിരോധന ഭീഷണിയുയരുകയും സുരക്ഷാ ഭീഷണയുയര്‍ത്തുന്ന ആപ്പുകളുടെ ലിസ്റ്റില്‍ പെടുത്തുകയും ചെയ്തിരുന്നു. ഇതിനു പിന്നാലെയാണ് ഇപ്പോള്‍ പാകിസ്താനിലും ടിക്ടോക്കിന് ഭീഷണി ഉയരുന്നത്.
പെഷവാര്‍ ഹൈക്കോടതി ഉത്തരവിനെ തുടര്‍ന്ന് പാകിസ്താന്‍ ടിക്ടോകിനെ നിരോധിക്കാനൊരുങ്ങുന്നതായി രാജ്യത്തെ ടെലികോം അതോറിറ്റിയുടെ (പി.ടി.എ) വക്താവ് ഖുറം മെഹ്റാന്‍ റോയിറ്റേഴ്സിനോട് പറഞ്ഞു. ടിക്ടോക് സഭ്യമല്ലാത്ത ഉള്ളടക്കം പ്രചരിപ്പിക്കുന്നുവെന്ന് കാട്ടി ഒരു വ്യക്തി നല്‍കിയ പരാതിയെ തുടര്‍ന്നാണ് ഹൈക്കോടതി ഉത്തരവ്. അതേസമയം ഫേസ്ബുക്കും വാട്സ്ആപ്പും കഴിഞ്ഞാല്‍ പാകിസ്താനില്‍ ഏറ്റവും കൂടുതല്‍ ആളുകള്‍ ഉപയോഗിക്കുന്ന ആപ്പാണ് ടിക്ടോക്ക്
‘കോടതി പി.ടി.എയോട് ടിക്ടോക് ബ്ലോക്ക് ചെയ്യാന്‍ ആവശ്യപ്പെട്ടിട്ടുണ്ട്. അധികൃതര്‍ ഉത്തരവ് പാലിച്ചേക്കുമെന്നും മെഹ്റാന്‍ വ്യക്തമാക്കി. അതേസമയം, ‘കോടതി ഉത്തരവിനെക്കുറിച്ച്‌ അറിഞ്ഞിട്ടുണ്ടെന്നും കമ്ബനി അതുമായി ബന്ധപ്പെട്ട വിശദീകരണം യഥാസമയം നല്‍കുമെന്നും പാകിസ്ഥാനിലെ ടിക്ക് ടോക്കിന്‍റെ പ്രതിനിധി അറിയിച്ചു.
