“എല്ലാത്തിനും നന്ദി, സോനു! നിങ്ങൾ ഞങ്ങൾക്കും മറ്റ് പലർക്കും ഒരു പ്രചോദനമാണ്; ലോക്ക്ഡൗൺകാലത്തെ പ്രവർത്തനങ്ങൾക്ക് സോനു സൂദിന് ആദരവർപ്പിച്ച്‌ സ്പൈസ് ജെറ്റ് പ്രത്യേക വിമാനം പുറത്തിറക്കി
ന്യൂഡൽഹി: നടൻ സോനു സൂദിന് ആദരവർപ്പിച്ച്‌ സ്പൈസ് ജെറ്റ് പ്രത്യേക വിമാനം പുറത്തിറക്കി. കൊറോണ പ്രതിസന്ധിയെ തുടർന്ന് രാജ്യവ്യാപകമായി ലോക്ക്ഡൗൺ ഏർപ്പെടുത്തിയപ്പോൾ താരം നൽകിയ സേവനങ്ങൾക്ക് ആദരവർപ്പിച്ച്‌ സ്പൈസ് ജെറ്റിൻറെ ബോയിംഗ് 737 വിമാനത്തിൽ താരത്തിൻറെ ചിത്രം ആലേഖനം ചെയ്തു.
കൊറോണ കാലത്ത് സോനു സൂദ് ചെയ്ത സേവനങ്ങൾക്ക് നന്ദി രേഖപ്പെടുത്താനാണ് ഉദേശിച്ചതെന്ന് കമ്പനി ചെയർമാനും മാനേജിംഗ് ഡയറക്ടറുമായ അജയ് സിംഗ് വ്യക്തമാക്കി. ലോക്ഡൗൺ കാലത്ത് ഇന്ത്യക്ക് പുറത്ത് കുടുങ്ങിപ്പോയവരെ നാട്ടിലെത്തിക്കാനുള്ള ദൗത്യത്തിനായി സോനുവും സ്പൈസ് ജെറ്റും കൈകോർത്തിരുന്നു.
“എല്ലാത്തിനും നന്ദി, സോനു! നിങ്ങൾ ഞങ്ങൾക്കും മറ്റ് പലർക്കും ഒരു പ്രചോദനമാണ്, അസാധാരണമായ അനുകമ്പയോടെയുള്ള നിങ്ങളുടെ പ്രവർത്തനങ്ങളിൽ പങ്കാളികളാകാൻ കഴിഞ്ഞതിൽ ഞങ്ങൾ അഭിമാനിക്കുന്നു”, വിമാനത്തിന്റെ ചിത്രം പുറത്തുവിട്ട് സ്പൈസ്ജെറ്റ് ട്വിറ്റർ പേജിൽ കുറിച്ചു.
ലോക്ക്ഡൗൺ കാരണം കുടുങ്ങിപ്പോയ നിരവധി അതിഥി തൊഴിലാളികളെയാണ് താരം നാട്ടിലെത്തിച്ചത്. മഹാരാഷ്ട്രയിലെ തന്റെ ആറു നിലയുള്ള ആഡംബര ഹോട്ടൽ ആരോഗ്യപ്രവർത്തകർക്ക് താമസിക്കാനായി താരം വിട്ടു നൽകുകയും ചെയ്തിരുന്നു.
