ഡല്‍ഹിയിലെ 9 വയസുകാരിയുടെ കൊലപാതക കേസ്; പീഡിപ്പിച്ചു കൊലപ്പെടുത്തിയതാണെന്ന് മൊഴി, പ്രതികള്‍ കുറ്റം സമ്മതിച്ചു
ന്യൂഡല്‍ഹി: ഡല്‍ഹിയിലെ ഒന്‍പതുവയസുകാരിയുടെ കൊലപാതക കേസിലെ പ്രതികള്‍ കുറ്റം സമ്മതിച്ചു. കേസില്‍ നാല് പേരാണ് പിടിയിലായത്. ഇതില്‍ രണ്ടുപ്രതികളാണ് കുറ്റം സമ്മതം നടത്തിയത്. പീഡിപ്പിച്ച് കൊലപ്പെടുത്തിയതാണെന്നാണ്് പ്രതികളുടെ മൊഴി. അതേസമയം ബലാത്സംഗത്തിനും കൊലപാതകത്തിനും തെളിവുകള്‍ ലഭിച്ചിട്ടില്ലെന്ന് പൊലീസ് കോടതിയെ അറിയിച്ചു.
പുരാന നങ്കലിലെ ശ്മശാനത്തിന് സമീപത്ത് താമസിക്കുന്ന പ്രയപൂര്‍ത്തിയാകാത്ത പെണ്‍കുട്ടിയാണ് കൊല്ലപ്പെട്ടത്. ശ്മശാനത്തിലെ കൂളറില്‍ നിന്ന് വെള്ളം എടുക്കാനായി പോയ പെണ്‍കുട്ടി മടങ്ങിയെത്താതായതോടെ വീട്ടുകാര്‍ അന്വേഷിച്ചെത്തിയപ്പോഴായിരുന്നു മരണ വിവരം അറിഞ്ഞത്. കൂളറില്‍ നിന്ന് വെള്ളം കുടിക്കുമ്പോള്‍ വൈദ്യുതാഘാതമേറ്റതാണെന്നായിരുന്നു പൂജാരി പറഞ്ഞത്.
എന്നാല്‍ കുട്ടിയുടെ കൈത്തണ്ടയിലും കൈമുട്ടിലും പൊള്ളലേറ്റ പാടുകള്‍ ഉണ്ടായിരുന്നു. ബന്ധുക്കളുടെ അനുവാദമില്ലാതെ പെണ്‍കുട്ടിയുടെ മൃതദേഹം സംസ്‌കരിക്കുകയും ചെയ്തു. തുടര്‍ന്ന് ബന്ധുക്കള്‍ പൊലീസില്‍ പരാതി നല്‍കി. പോലീസെത്തി ശ്മശാനത്തിലെ പൂജാരി ഉള്‍പ്പടെയുള്ള നാല് പേരെ് അറസ്റ്റ് ചെയ്യുകയായിരുന്നു. ഇതോടെയാണ് സംഭവം പുറംലോകമറിയുന്നത്.
