ഗോവിന്ദച്ചാമിയെ വിയ്യൂർ സെൻട്രൽ ജയിലിലേക്ക് മാറ്റി; അതീവ സുരക്ഷയോടെ മാറ്റിയത് കൊടും കുറ്റവാളികൾ മാത്രമുള്ള ഏകാന്ത സെല്ലിൽ

സൗമ്യ വധക്കേസ് പ്രതിയും കൊടും കുറ്റവാളിയുമായ ഗോവിന്ദച്ചാമിയെ കണ്ണൂർ സെൻട്രൽ ജയിലിൽ നിന്നു വിയ്യൂർ സെൻട്രൽ ജയിലിലേക്ക് മാറ്റി. കഴിഞ്ഞ ദിവസം പുലർച്ചെ ജയിലിൽ നിന്നു ചാടിയതോടെയാണ് നടപടി. സുരക്ഷാപ്രാധാന്യം കണക്കിലെടുത്ത്, ഇന്ത്യൻ റിസർവ് ബറ്റാലിയൻ സംഘം അദ്ദേഹത്തെ കനത്ത സുരക്ഷയോടെ വാഹനത്തിൽ കൊണ്ടുപോകുകയായിരുന്നു.

വിയ്യൂർ ജയിലിന്റെ ഏകാന്ത സെല്ലിലായിരിക്കും ഇനി ഗോവിന്ദച്ചാമിയുടെ താമസം. ഇവിടത്തെ തടവുകാരെ തമ്മിൽ കാണാനോ സംസാരിക്കാനോ അനുവാദമില്ല. ഭക്ഷണം നേരിട്ട് സെല്ലിലേക്ക് എത്തിച്ച് നൽകും. സെല്ലുകളുടെ ഉയരം 4.2 മീറ്ററാണ്.

ജയിൽ ചുറ്റും ആറ് മീറ്റർ ഉയരമുള്ള 700 മീറ്റർ ദൈർഘ്യമുള്ള മതിൽ, അതിന് മുകളിൽ പത്തടി ഉയരത്തിൽ വൈദ്യുത വേലി, പുറത്ത് 15 മീറ്റർ ഉയരത്തിലുള്ള നാല് വാച്ച് ടവറുകൾ എന്നിവയാണ് സുരക്ഷാകവചങ്ങൾ. 536 തടവുകാരെ പാർപ്പിക്കാവുന്ന ഈ ജയിലിൽ നിലവിൽ 300 പേരാണ് പാർക്കുന്നത്. അതിൽ 125 പേർ കൊടും കുറ്റവാളികളാണ്. പക്ഷേ ജീവനക്കാർ വെറും 40 പേരാണ്.
ഇവിടെ റിപ്പർ ജയാനന്ദനും ചെന്താമരക്കുട്ടിയും പോലുള്ള മറ്റു പ്രഭല കുറ്റവാളികളും തടവിലുണ്ട്.

പുലർച്ചെ അഞ്ച് മണിയോടെയാണ് ഗോവിന്ദച്ചാമി കണ്ണൂർ ജയിലിൽ നിന്ന് രക്ഷപ്പെട്ടത്. പുതിയതായി പുറത്തുവന്ന സിസിടിവി ദൃശ്യങ്ങളിൽ, കൈപ്പത്തി ഇല്ലാത്ത കൈ തലയിൽ വച്ച്, സഞ്ചി കൊണ്ട് മറച്ചുകൊണ്ട് റോഡിലൂടെ നടക്കുന്ന ദൃശ്യം വ്യക്തമാണ്. ആരെങ്കിലും ശ്രദ്ധിക്കുന്നത് കണ്ടാൽ, ഗോവിന്ദച്ചാമി വഴിതിരിച്ചു നടക്കുന്നതും ദൃശ്യങ്ങളിൽ കാണാം.

പൊലീസിന് നൽകിയ മൊഴിയിലാണ് ഗോവിന്ദച്ചാമി തന്റെ രക്ഷപ്പെട്ടതിനുള്ള ആസൂത്രിതമായ ഒരുക്കങ്ങൾ വെളിപ്പെടുത്തിയത്. 2017 മുതൽ ജയിൽ ചാടാനുള്ള തീരുമാനം എടുത്തിരുന്നു. പലതവണ സെല്ലുകൾ മാറ്റിയതോടെ പദ്ധതിയിൽ കുറച്ച് താമസം വന്നു.

തീരുമാനം നടപ്പാക്കാൻ കഴിഞ്ഞ പത്ത് മാസമായി സെല്ലിന്റെ അഴി മുറിച്ചുതുടങ്ങി. ഏഴ് കമ്പികളാണ് മുറിച്ചുമാറ്റിയത്. ഓരോ കമ്പിയും നീക്കം ചെയ്യുമ്പോൾ നൂലുകൊണ്ട് കെട്ടിവെക്കുമായിരുന്നു. രാത്രിയിലാണ് ഈ പ്രവർത്തനം, പകൽ വിശ്രമം. ജയിൽ ഉദ്യോഗസ്ഥർ ശ്രദ്ധിക്കുന്നുണ്ടോ എന്നറിയാൻ പാത്രം കൊണ്ടു ശബ്ദം ഉണ്ടാക്കിയും പരിശോധിക്കുമായിരുന്നു. ശബ്ദം ഉണ്ടാകാതിരിക്കാൻ തുണിയുപയോഗിച്ച് കമ്പി മുറിച്ചു. ജയിൽ വളപ്പിൽ നിന്നു ലഭിച്ച ആക്രിയാണ് ഉപകരണം.

ആഹാരം നിയന്ത്രിച്ച് ശരീരഭാരം കുറക്കാനും അദ്ദേഹം ശ്രമിച്ചു. പരോൾ ലഭിക്കാത്തതിൽ നിരാശയുണ്ടായതും, ജയിൽ മാറ്റം നേരത്തെ ആവശ്യപ്പെട്ടതുമാണെന്ന് ​ഗോവിന്ദച്ചാമി മൊഴിയിൽ പറഞ്ഞത്.

Tag: Govindachamy transferred to Viyyur Central Jail; transferred with high security to the housing of hardened criminals