ബിഹാറിലെ മാധ്യമ പ്രവർത്തകർക്കുള്ള പെൻഷൻ വർധിപ്പിച്ച് മുഖ്യമന്ത്രി നിതീഷ് കുമാർ

ബിഹാർ മുഖ്യമന്ത്രി നിതീഷ് കുമാർ സംസ്ഥാനത്തെ അംഗീകൃത മാധ്യമപ്രവർത്തകർക്ക് നൽകുന്ന പെൻഷൻ തുകയിൽ വലിയ വർധനവ് പ്രഖ്യാപിച്ചു. ബിഹാർ പത്രകർ സമ്മാൻ പെൻഷൻ പദ്ധതിയുടെ ഭാഗമായി, പ്രതിമാസം ₹6,000 ആയിരുന്ന പെൻഷൻ ₹15,000 ആക്കാൻ വകുപ്പിനോട് നിർദ്ദേശം നൽകിയതായി നിതീഷ് കുമാർ അറിയിച്ചു.

പദ്ധതിയിൽ ഉൾപ്പെട്ട മാധ്യമപ്രവർത്തകർ മരിച്ചാൽ, അവരുടെ ആശ്രിതരായ ഭാര്യയ്ക്കോ ഭർത്താവിനോ പ്രതിമാസം ലഭിക്കുന്ന പെൻഷൻ 3,000₹ ൽ നിന്ന് 10,000₹ ആയി ഉയർത്തുമെന്നും മുഖ്യമന്ത്രി വ്യക്തമാക്കി.

“ജനാധിപത്യത്തിന്റെ നാലാമത്തെ തൂണായ മാധ്യമപ്രവർത്തകർ സാമൂഹിക വികസനത്തിൽ നിർണായക പങ്കുവഹിക്കുന്നു. അവർക്ക് നിഷ്പക്ഷമായി പത്രപ്രവർത്തനം നടത്താനും വിരമിച്ചതിനുശേഷം മാന്യമായ ജീവിതം നയിക്കാനും സർക്കാർ പിന്തുണ നൽകും,” എന്ന് നിതീഷ് കുമാർ എക്‌സ് പോസ്റ്റിൽ കുറിച്ചു.

ബിഹാർ തെരഞ്ഞെടുപ്പിന് മുന്നോടിയായി പ്രഖ്യാപിച്ച പദ്ധതികളുടെ ഭാഗമായി, സാമൂഹിക സുരക്ഷാ പെൻഷൻ പദ്ധതിയിലും വർധനവ് പ്രഖ്യാപിച്ചിരുന്നു. വൃദ്ധർ, ഭിന്നശേഷിക്കാർ, വിധവകൾ എന്നിവർക്കുള്ള പെൻഷൻ ₹400-ൽ നിന്ന് ₹1,100 ആക്കാനാണ് തീരുമാനം. കൂടാതെ, 125 യൂണിറ്റ് വരെ സൗജന്യ വൈദ്യുതി നൽകാനും സർക്കാർ തീരുമാനിച്ചു. 2025 ഓഗസ്റ്റ് 1 മുതൽ ഇത് പ്രാബല്യത്തിൽ വരും. ജൂലൈ ബില്ലിൽ നിന്നുതന്നെ ഉപഭോക്താക്കൾക്ക് ആനുകൂല്യം ലഭിക്കാൻ തുടങ്ങും.

സ്ത്രീകൾക്ക് 35% സംവരണം
ജൂലൈ 8-ന്, ബിഹാറിലെ എല്ലാ സർക്കാർ ജോലികളിലും സ്ത്രീകൾക്ക് 35% സംവരണം നൽകുമെന്ന് നിതീഷ് കുമാർ പ്രഖ്യാപിച്ചിരുന്നു. “സംസ്ഥാനത്തെ സ്ത്രീകൾ തൊഴിൽ രംഗത്തും ഭരണത്തിൽവും കൂടുതൽ പങ്കാളികളാകാൻ സർക്കാർ പ്രതിജ്ഞാബദ്ധമാണ്,” എന്ന് മുഖ്യമന്ത്രി വ്യക്തമാക്കി. പട്നയിൽ ചേർന്ന മന്ത്രിസഭാ യോഗത്തിലാണ് സ്ത്രീ സംവരണവുമായി ബന്ധപ്പെട്ട തീരുമാനം എടുത്തത്.

Tag: Bihar CM Nitish Kumar increases pension for journalists