ചരിത്രം കുറിച്ച് ജോ റൂട്ട്; ടെസ്റ്റ് ക്രിക്കറ്റ് ചരിത്രത്തിലെ ഏറ്റവും കൂടുതൽ റൺസ് നേടിയ താരങ്ങളുടെ പട്ടികയിൽ രണ്ടാമൻ

മാഞ്ചസ്റ്ററിൽ ഇന്ത്യക്കെതിരെ നടന്ന ടെസ്റ്റിൽ ചരിത്രം കുറിച്ച് ഇംഗ്ലണ്ടിന്റെ സൂപ്പർതാരം ജോ റൂട്ട്. ടെസ്റ്റ് ക്രിക്കറ്റ് ചരിത്രത്തിലെ ഏറ്റവും കൂടുതൽ റൺസ് നേടിയ താരങ്ങളുടെ പട്ടികയിൽ ജോ റൂട്ട് ഇനി രണ്ടാമൻ. ഇപ്പോൾ റൂട്ടിന്റെ മുന്നിൽ ക്രിക്കറ്റ് മഹാതാരം സച്ചിൻ ടെണ്ടുൽക്കറാണ്.

150 റൺസിന്റെ കരുത്തുറ്റ ഇന്നിംഗ്സിനിടെയാണ് റൂട്ട് മുൻ ഇന്ത്യൻ നായകൻ രാഹുൽ ദ്രാവിഡ് (13,288 റൺസ്), സൗത്ത് ആഫ്രിക്കൻ ഇതിഹാസം ജാക്ക് കാലിസ് (13,289 റൺസ്), ഓസ്ട്രേലിയൻ താരം റിക്കി പോണ്ടിംഗ് (13,378 റൺസ്) എന്നിവരെ മറികടന്നത്. ആദ്യ 31 റൺസ് നേടിയപ്പോൾ തന്നെ റൂട്ട് ദ്രാവിഡിനെയും കാലിസിനെയും പിന്നിലാക്കി. ഇപ്പോൾ റൂട്ടിന്റെ മുന്നിൽ ക്രിക്കറ്റ് മഹാതാരം സച്ചിൻ ടെണ്ടുൽക്കർ (15,921 റൺസ്) മാത്രമാണ്.

റൂട്ടിന്റെ ഇന്നലത്തെ സെഞ്ചുറി, ഇന്ത്യക്കെതിരെ നേടുന്ന അദ്ദേഹത്തിന്റെ 12-ാം സെഞ്ചുറിയായിരുന്നു. ഇതോടെ, ഇന്ത്യക്കെതിരെ ഏറ്റവും കൂടുതൽ സെഞ്ചുറി നേടിയ താരം എന്ന റെക്കോർഡ് ഓസ്‌ട്രേലിയൻ താരം സ്റ്റീവ് സ്മിത്തിൽ നിന്ന് (11 സെഞ്ചുറി) റൂട്ട് ഏറ്റെടുത്തു.

ടെസ്റ്റ് കരിയറിലെ 38-ാം സെഞ്ചുറിയും അദ്ദേഹം ഇന്നലെ സ്വന്തമാക്കി. ഇതോടെ, ഏറ്റവും കൂടുതൽ ടെസ്റ്റ് സെഞ്ചുറികൾ നേടിയ താരങ്ങളുടെ പട്ടികയിൽ റൂട്ട്, ശ്രീലങ്കൻ ഇതിഹാസം കുമാർ സംഗക്കാര (38 സെഞ്ചുറി) എന്നിവരോടൊപ്പം നാലാം സ്ഥാനത്ത് എത്തിയിരിക്കുകയാണ്.

റൂട്ടിന്റെ തുടർച്ചയായ നേട്ടങ്ങൾ, അദ്ദേഹത്തെ ക്രിക്കറ്റ് ചരിത്രത്തിലെ മഹാനായ ബാറ്റ്സ്മാന്മാരുടെ പട്ടികയിൽ കൂടുതൽ ഉറച്ച സ്ഥാനത്തേക്ക് ഉയർത്തുകയാണ്.

Tag: Joe Root makes history; second in the list of highest run-scorers in Test cricket history