മലയാളത്തിന്റെ പ്രിയപ്പെട്ട അധ്യാപകനും എഴുത്തുകാരനുമായ പ്രൊഫസർ എം.കെ. സാനു അന്തരിച്ചു

മലയാളത്തിന്റെ പ്രിയപ്പെട്ട അധ്യാപകനും എഴുത്തുകാരനുമായ പ്രൊഫസർ എം.കെ. സാനു അന്തരിച്ചു. 98-ാം വയസ്സിൽ കൊച്ചിയിലെ സ്വകാര്യ ആശുപത്രിയിലാണ് അന്ത്യം സംഭവിച്ചത്. വീണ് പരിക്കേറ്റതിനെ തുടർന്ന് എറണാകുളം അമൃത ആശുപത്രിയിൽ പ്രവേശിപ്പിച്ച അദ്ദേഹത്തിന് ശസ്ത്രക്രിയ നടത്തിയിരുന്നു. തുടർന്ന് ശ്വാസതടസ്സവും ന്യുമോണിയയും മൂലം നില ഗുരുതരമാകുകയായിരുന്നു. ശ്വാസകോശത്തിൽ നീർകെട്ടും ഹൃദയധമനികളിൽ തടസ്സവും ഉണ്ടായതിനെ തുടർന്ന് ഐ.സി.യുവിൽ ചികിത്സയിലിരിക്കെയാണ് അദ്ദേഹം വിടവാങ്ങിയത്.

മലയാള സാഹിത്യത്തിന് നൽകിയ അമൂല്യ സംഭാവനകളാൽ ‘സാനു മാഷ്’ എന്ന പേരിൽ മലയാളികളുടെ ഹൃദയങ്ങളിൽ അദ്ദേഹം ഇടം നേടി. പ്രൊഫ. എം.കെ. സാനു, അന്ത്യം വരെ പൊതുവേദികളിൽ സജീവമായിരുന്നു.

ഈ വർഷം മെയ് മാസത്തിലാണ് അദ്ദേഹത്തിന്റെ പുതിയ പുസ്തകത്തിന്റെ രചന പൂർത്തിയായത്. ‘തപസ്വിനി അമ്മ: അബലകൾക്ക് ശരണമായി പ്രവർത്തിച്ച പുണ്യവതി’ എന്ന ഈ പുസ്തകം നിരാലംബരുടെ സേവനത്തിനായി പ്രവർത്തിച്ച സാമൂഹ്യ പ്രവർത്തക തപസ്വിനി അമ്മയുടെ ജീവിതത്തെ ആസ്പദമാക്കിയുള്ളതാണ്. 1921-ൽ തപസ്വിനി അമ്മ സ്ഥാപിച്ച ‘അബല സദൻ’ (ഇപ്പോൾ എസ്.എൻ.വി. സദനം) എറണാകുളത്തെ പ്രശസ്തമായ സ്ഥാപനങ്ങളിൽ ഒന്നാണ്. സഹോദരൻ അയ്യപ്പൻ, പണ്ഡിറ്റ് കറുപ്പൻ, വാഗ്ഭടാനന്ദൻ എന്നിവർക്ക് ഒപ്പമുണ്ടായിരുന്ന തപസ്വിനി അമ്മയുടെ അമ്പതാം ചരമവാർഷികമായ മെയ് 21-നാണ് സാനു മാഷ് ഈ പുസ്തകം പൂർത്തിയാക്കിയ വിവരം അറിയിച്ചത്. ജൂൺ 22-ന് എറണാകുളം ഗസ്റ്റ് ഹൗസിൽ നടന്ന ലളിതമായ ചടങ്ങിൽ മുഖ്യമന്ത്രി പിണറായി വിജയൻ പുസ്തകം പ്രകാശനം ചെയ്തു.

‘എമ്പുരാൻ’ സിനിമയെച്ചൊല്ലിയ വിവാദങ്ങളിൽ നിന്നും, തിരുവനന്തപുരത്ത് എസ്.യു.സി.ഐ നേതൃത്വത്തിൽ നടന്ന ആശ സമരത്തിൽ വരെയുമുള്ള വിവിധ സമകാലിക വിഷയങ്ങളിൽ പ്രതികരിച്ച് വന്ന സാനു മാഷ്, എറണാകുളം നഗരത്തിലെ നിരവധി പൊതുചടങ്ങുകളിൽ സ്ഥിരം സാന്നിധ്യമായിരുന്നു.

മലയാള സാഹിത്യത്തിന് നൽകിയ സമഗ്ര സംഭാവന പരിഗണിച്ച് കേരള സർവകലാശാല നൽകിയ ഒ.എൻ.വി. പുരസ്കാരം ഈ ഏപ്രിലിൽ അദ്ദേഹത്തിന്റെ വസതിയിൽ വെച്ച് മന്ത്രി പി. രാജീവ് കൈമാറിയിരുന്നു. മലയാളികളുടെ ഹൃദയങ്ങളിൽ സാന്നിധ്യം നിലനിർത്തിയ സാനു മാഷിന്റെ വിടവാങ്ങൽ സാഹിത്യലോകത്തിന് വലിയ നഷ്ടമാണ്.

Tag: Professor M.K. Sanu, a beloved teacher and writer of Malayalam, passes away