”കൂടുതല്‍ സിനിമകള്‍ക്ക് കൂടുതല്‍ ധനസഹായം നല്‍കുന്നത് തെറ്റായ കാര്യമല്ല”; അടൂര്‍ ഗോപാലകൃഷ്ണന് മറുപടിയായി മന്ത്രി സജി ചെറിയാന്‍

സിനിമാ കോണ്‍ക്ലേവില്‍ സംവിധായകന്‍ അടൂര്‍ ഗോപാലകൃഷ്ണന്‍ നടത്തിയ പരാമര്‍ശങ്ങള്‍ക്ക് മറുപടിയായി സാംസ്‌കാരിക വകുപ്പ് മന്ത്രി സജി ചെറിയാന്‍ പ്രതികരിച്ചു. കൂടുതല്‍ സിനിമകള്‍ക്ക് കൂടുതല്‍ ധനസഹായം നല്‍കുന്നത് തെറ്റായ കാര്യമല്ലെന്നും, കൂടുതല്‍ നിക്ഷേപം നല്‍കിയാല്‍ അതില്‍ നിന്ന് ലാഭം ഉണ്ടാകുമെന്നും മന്ത്രി വ്യക്തമാക്കി.

സിനിമയുടെ പ്രതിഫലവും റിവ്യൂവുമായി ബന്ധപ്പെട്ട വിഷയങ്ങളിലും അദ്ദേഹം പ്രതികരിച്ചു. “സിനിമകളുടെ മൊത്തം ചെലവിന്റെ 80 ശതമാനത്തിലധികം താരങ്ങള്‍ക്കാണ് പോകുന്നത്. അത് എത്ര കുറയ്ക്കണമെന്നത് അവര്‍ തന്നെ തീരുമാനിക്കണം. സുരേഷ് കുമാറും മോഹന്‍ലാലും പോലുള്ളവര്‍ ചര്‍ച്ച ചെയ്ത് തീരുമാനം എടുക്കട്ടെ. സിനിമാ മേഖല മുഴുവനും കുഴപ്പത്തിലാണ് എന്ന അഭിപ്രായം ശരിയല്ല. ഇന്നത്തെ കാലത്ത് സിനിമ നിര്‍മാതാക്കളുടെ ലക്ഷ്യം നല്ല സിനിമ എടുക്കുക മാത്രമല്ല, വ്യാപാരലാഭവും ലക്ഷ്യമാക്കുന്നു,” മന്ത്രി പറഞ്ഞു.

സര്‍ക്കാരിന്റെ സിനിമാ ധനസഹായം സിനിമാ നയത്തിന്റെ ഭാഗമാക്കുമെന്നും അദ്ദേഹം അറിയിച്ചു. പട്ടികജാതി-പട്ടികവർഗക്കാർക്ക് 98 വർഷമായിട്ടും മുഖ്യധാരാ സിനിമയിൽ എത്താൻ സാധിച്ചിട്ടില്ലെന്നും, അവർക്കും സ്ത്രീകൾക്കും പ്രത്യേക സഹായം നൽകുമെന്നും മന്ത്രി വ്യക്തമാക്കി. “ഒരു കോടിയിലധികം ചെലവഴിച്ച സിനിമകളും സാമ്പത്തികമായി ബുദ്ധിമുട്ടുകയാണ്. ഇതാണ് തുക മൂന്ന് വിഭാഗങ്ങളായി വിഭജിക്കാൻ കാരണമായത്,” അദ്ദേഹം കൂട്ടിച്ചേർത്തു.

ശ്രീകുമാരൻ തമ്പിയുടെ ഹേമ കമ്മിറ്റി റിപ്പോർട്ട് സംബന്ധിച്ച ചോദ്യത്തിനും മന്ത്രി മറുപടി നൽകി. “ഹേമ കമ്മിറ്റി റിപ്പോർട്ട് എവിടെ പോയി എന്ന ചോദ്യത്തിന് ഈ കോൺക്ലേവാണ് മറുപടി. പരാതികൾ ഉന്നയിച്ചവർക്ക് സർക്കാർ പൂർണ്ണ സംരക്ഷണം നൽകും,” അദ്ദേഹം പറഞ്ഞു.

സിനിമാ മേഖലയിലെ മാറ്റങ്ങൾക്കായി കൂട്ടായ ചര്‍ച്ചകള്‍ നടക്കുമെന്നും, ജൂനിയര്‍ ആര്‍ട്ടിസ്റ്റുകളുടെ തൊഴില്‍ സുരക്ഷിതത്വം ഉറപ്പാക്കുമെന്നും മന്ത്രി ഉറപ്പു നല്‍കി. “കൃത്യമായ വേതനം, വിശ്രമം, ഭക്ഷണം, ജോലി സമയം എന്നിവ സംബന്ധിച്ച് ഇടപെടലുകൾ ആവശ്യമാണ്. ഭക്ഷണത്തിൽ തരംതിരിവ് നിലനില്‍ക്കുന്നുവെന്നത് കോണ്‍ക്ലേവില്‍ വെളിവായി. ഇതെല്ലാം സിനിമാ നയത്തിൽ ഉള്‍പ്പെടുത്തും,” അദ്ദേഹം പറഞ്ഞു.

സിനിമ റിവ്യൂവിനായി പൊതുവായ പെരുമാറ്റച്ചട്ടം കൊണ്ടുവരുമെന്നും, അലിഖിത നിയമങ്ങൾ ഒഴിവാക്കുമെന്നും മന്ത്രി വ്യക്തമാക്കി. നിലവിലെ തൊഴിൽ നിയമം എല്ലാവർക്കും ബാധകമാണെന്നും, എല്ലാവർക്കും സംരക്ഷണം നൽകുമെന്നും അദ്ദേഹം വ്യക്തമാക്കി.

Tag: It is not wrong to provide more funding to more films”; Minister Saji Cherian responds to Adoor Gopalakrishnan