രാജ്യത്തെ മുഴുവൻ ജനങ്ങളും മറ്റൊരു രാജ്യത്തേക്ക് മാറുന്ന ലോകത്തിലെ ആദ്യ സംഭവം ഇതാണ്

പസഫിക് സമുദ്രത്തിലെ ചെറിയ ദ്വീപ് രാഷ്ട്രമായ ടുവാലുയിലെ മുഴുവൻ നിവാസികളും സ്വന്തം ജന്മദേശം വിട്ട് ഓസ്‌ട്രേലിയയിലേക്ക് കുടിയേറാൻ ഒരുങ്ങുകയാണ്. ഒരു രാജ്യത്തെ മുഴുവൻ ജനങ്ങളും മറ്റൊരു രാജ്യത്തേക്ക് മാറുന്ന ലോകത്തിലെ ആദ്യ സംഭവം ഇതായിരിക്കും.

അടുത്ത 25 വർഷത്തിനുള്ളിൽ ടുവാലു പൂർണമായും കടലിനടിയിലാകുമെന്ന് പഠനങ്ങൾ സൂചിപ്പിച്ചതോടെയാണ് ഈ തീരുമാനം. സമുദ്രനിരപ്പിൽ നിന്ന് വെറും രണ്ട് മീറ്റർ ഉയരത്തിലാണ് ടുവാലു സ്ഥിതി ചെയ്യുന്നത്. ജലനിരപ്പ് ഉയരുന്നതിനൊപ്പം ജലക്ഷാമം, ആവാസവ്യവസ്ഥയുടെ നഷ്ടം, കടുത്ത കാലാവസ്ഥ വ്യതിയാനം തുടങ്ങിയവയും ദ്വീപ് രാഷ്ട്രത്തെ തകർത്തുകൊണ്ടിരിക്കുകയാണ്. തീരശോഷണം ഏറ്റവും ഗുരുതരമായി ബാധിക്കുന്ന പ്രദേശങ്ങളിലൊന്നാണ് ടുവാലു.

പതിനൊന്നായിരം പേരാണ് ഇവിടെ താമസിക്കുന്നത്, അതിൽ പകുതിയോളം തലസ്ഥാനമായ ഫ്യൂനാഫുട്ടിയിലാണ്. തെക്കൻ ശാന്തസമുദ്രത്തിൽ, ഓസ്‌ട്രേലിയയ്ക്കും ഹവായിക്കും ഇടയിലാണ് ഒമ്പത് ചെറിയ ദ്വീപുകൾ ചേർന്ന ടുവാലു സ്ഥിതി ചെയ്യുന്നത്. വിസ്തൃതിയിൽ ലോകത്തിലെ നാലാമത്തെ ചെറുരാജ്യവും ജനസംഖ്യയിൽ വത്തിക്കാൻ സിറ്റിക്ക് പിന്നാലെ രണ്ടാമത്തെ ചെറുരാജ്യവുമാണ് ഇത്.

2023ൽ ഓസ്‌ട്രേലിയയും ടുവാലുവും ഒപ്പുവെച്ച കരാർ പ്രകാരം, വർഷത്തിൽ 280 പേർക്ക് ഓസ്‌ട്രേലിയയിൽ സ്ഥിരതാമസം നേടാൻ അവസരം ലഭിക്കും. എല്ലാ പൗരാവകാശങ്ങളോടും കൂടിയുള്ള ഈ അനുമതിക്ക് ആദ്യ ഘട്ടത്തിൽ തന്നെ 8,750 പേർ രജിസ്റ്റർ ചെയ്തു. ഈ കുടിയേറ്റം, കാലാവസ്ഥാ വ്യതിയാനത്തിന്റെ ഭീഷണി നേരിടുന്ന രാജ്യങ്ങൾക്ക് ഒരു ചരിത്ര സംഭവമാകുന്നു.

Tag: This is the first time in the world that an entire country’s population has moved to another country tuvalu.