ഡിജിറ്റൽ സർവകലാശാല നിയമ ഭേദഗതി ഓർഡിനൻസിന് അംഗീകാരം നൽകില്ലെന്ന നിലപാടിൽ ഗവർണർ

ഡിജിറ്റൽ സർവകലാശാല നിയമ ഭേദഗതി ഓർഡിനൻസിന് അംഗീകാരം നൽകില്ലെന്ന നിലപാടിൽ ഗവർണർ. സർക്കാർ, നിയമനിർമ്മാണം നിലവിലുള്ള കേസിന് പിന്തുണ നൽകാനായുള്ള ശ്രമമാണെന്ന് ഗവർണർ വിലയിരുത്തുന്നു. മന്ത്രിസഭ അംഗീകരിച്ച ഭേദഗതി ഓർഡിനൻസ് രാജ്ഭവനിലെത്തിയിട്ടുണ്ടെങ്കിലും, ഗവർണർ ഇതുവരെ തീരുമാനം എടുത്തിട്ടില്ല.

താൽക്കാലിക വൈസ് ചാൻസലർ നിയമനവുമായി ബന്ധപ്പെട്ട കേസ് 13-ന് സുപ്രീംകോടതി പരിഗണിക്കും. വി.സി നിയമനത്തിൽ സർക്കാരിന് മേൽക്കൈ ഉറപ്പാക്കുന്ന തരത്തിലാണ് നിയമത്തിൽ ഭേദഗതി വരുത്തിയിരിക്കുന്നത്. യു.ജി.സി മാനദണ്ഡങ്ങളും സുപ്രീംകോടതി നിർദ്ദേശങ്ങളും പാലിക്കാനാണെന്നതാണ് സർക്കാരിന്റെ വാദം. എന്നാൽ, സ്ഥിരം വി.സിയെ നിയമിക്കുമ്പോൾ സ്വന്തം താൽപര്യങ്ങൾ സംരക്ഷിക്കാനാണെന്നാണ് വിമർശനം.

ഭേദഗതിയിൽ ഏറ്റവും പ്രധാനപ്പെട്ടത്, വി.സിയുടെ പ്രായപരിധി 61ൽ നിന്ന് 65 ആക്കി ഉയർത്തിയതാണ്. ഇതിന് സർവകലാശാല നിയമത്തിലെ ആറാം ഉപവകുപ്പിൽ മാറ്റം വരുത്തി. കൂടാതെ, വി.സി നിയമനത്തിനുള്ള സെർച്ച് കമ്മിറ്റിയുടെ ഘടനയിലും മാറ്റം വരുത്തിയിട്ടുണ്ട്. അഞ്ചംഗ സെർച്ച് കമ്മിറ്റിയിൽ, ഉന്നത വിദ്യാഭ്യാസ കൗൺസിൽ നിർദ്ദേശിക്കുന്ന പ്രതിനിധി കൺവീനറാകും.

Tag: Governor says he will not approve the Digital University Law Amendment Ordinance