“ഇത്രയൊക്കെ സഹായിച്ചതിന് നന്ദി”; മാധ്യമങ്ങളോട് പ്രതികരിച്ച് സുരേഷ് ഗോപി
വ്യാജ വോട്ട് വിവാദത്തെ തുടർന്ന് പ്രതിഷേധങ്ങളും സംഘർഷങ്ങളും നടന്ന തൃശൂരിൽ ഇന്ന് കേന്ദ്രമന്ത്രി സുരേഷ് ഗോപി എത്തി. രാവിലെ 9.30-ഓടെ വന്ദേഭാരതിലൂടെ തൃശൂരിൽ എത്തിയ മന്ത്രിയെ റെയിൽവേ സ്റ്റേഷനിൽ ബിജെപി പ്രവർത്തകർ ആവേശത്തോടെ സ്വീകരിച്ചു. തുടർന്ന്, ഇന്നലെ സിപിഐഎം-ബിജെപി സംഘർഷത്തിൽ പരിക്കേറ്റവരെ അശ്വിനി ആശുപത്രിയിൽ സന്ദർശിച്ച് ആരോഗ്യനിലയെക്കുറിച്ച് അദ്ദേഹം അന്വേഷിച്ചു.
വ്യാജ വോട്ട്, ഇരട്ട വോട്ട് ആരോപണങ്ങളെക്കുറിച്ച് മാധ്യമങ്ങൾ ആവർത്തിച്ച് ചോദിച്ചിട്ടും മന്ത്രി മൗനം പാലിച്ചു. എന്നാൽ, “ഇത്രയൊക്കെ സഹായിച്ചതിന് നന്ദി” എന്ന് മാധ്യമങ്ങളോട് പരിഹാസപരമായ പ്രതികരണം നടത്തി. പ്രതിഷേധ സാധ്യതകൾക്കിടെ സുരേഷ് ഗോപിക്ക് കനത്ത പൊലീസ് സുരക്ഷ ഏർപ്പെടുത്തിയിട്ടുണ്ട്.
സിപിഐഎമ്മിന്റെ കരി ഓയിൽ പ്രതിഷേധത്തിനെതിരെ ബിജെപി നടത്തിയ മാർച്ചിനിടെ ഇന്നലെ സംഘർഷം പൊട്ടിപ്പുറപ്പെട്ട് നിരവധി പേർക്ക് പരുക്കേൽക്കുകയായിരുന്നു. ഇതിൽ മൂന്ന് ബിജെപി പ്രവർത്തകരും ഒരു സിപിഐഎം പ്രവർത്തകനുമാണ് പരിക്കേറ്റത്. എംപി ഓഫീസിൽ കരി ഓയിൽ ഒഴിച്ചതിൽ പ്രതിഷേധിച്ച് ഇന്ന് ബിജെപി നടത്തുന്ന മാർച്ചിൽ സുരേഷ് ഗോപി പങ്കെടുക്കും.
ഇന്നലെ രാത്രി തിരുവനന്തപുരത്ത് എത്തിയ സുരേഷ് ഗോപി, ഇന്ന് രാവിലെ തൃശൂരിലെത്തിയപ്പോൾ പാർട്ടിയിലെ പ്രമുഖ നേതാക്കളും അദ്ദേഹത്തോടൊപ്പം ഉണ്ടായിരുന്നു.
Tag; “Thank you for helping me so much”; Suresh Gopi responds to the media
