2030-ലെ കോമൺവെൽത്ത് ഗെയിംസിന് ആതിഥേയത്വം വഹിക്കാൻ താൽപര്യപത്രം സമർപ്പിക്കാൻ ഇന്ത്യൻ ഒളിമ്പിക് അസോസിയേഷൻ (IOA) അനുമതി നൽകി. IOA വൃത്തങ്ങളെ ഉദ്ധരിച്ച് എ.എൻ.ഐ റിപ്പോർട്ട് ചെയ്തതനുസരിച്ച്, അഹമ്മദാബാദ് ആണ് മുഖ്യമായി പരിഗണിക്കപ്പെടുന്ന നഗരം. ഓഗസ്റ്റ് 31നകം നിർദ്ദേശം സമർപ്പിക്കുകയും, നവംബറിൽ ആതിഥേയ നഗരത്തെ തീരുമാനിക്കുമെന്നുമാണ് പ്രതീക്ഷ. അഹമ്മദാബാദിനൊപ്പം ഭുവനേശ്വരും മത്സരത്തിലുണ്ട്.
കോമൺവെൽത്ത് ഗെയിംസ് ഫെഡറേഷൻ (CGF) അധികൃതർ ഈ വർഷം ആദ്യം ഇന്ത്യ സന്ദർശിച്ച് ഭുവനേശ്വർ, അഹമ്മദാബാദ് നഗരങ്ങളിലെ സൗകര്യങ്ങൾ വിലയിരുത്തി. ഗെയിംസ് ഡയറക്ടർ ഡാരൻ ഹാളിന്റെ നേതൃത്വത്തിലുള്ള സംഘം അടുത്തിടെ അഹമ്മദാബാദിലെത്തി വേദികൾ പരിശോധിക്കുകയും ഗുജറാത്ത് സർക്കാരുമായും ചർച്ച നടത്തുകയും ചെയ്തു.
2030-ലെ കോമൺവെൽത്ത് ഗെയിംസ് ഇന്ത്യയ്ക്ക് പ്രത്യേക പ്രാധാന്യമുള്ളതാണ്, കാരണം 2010-ൽ ന്യൂഡൽഹിയിൽ നടന്ന ഗെയിംസിന് ശേഷം 20 വർഷം പൂർത്തിയാകുന്ന അവസരമാണിത്. 2010ലെ ഗെയിംസ് അഴിമതി ആരോപണങ്ങളാൽ വിവാദമായിരുന്നു. ഇതിനിടെ, ഇന്ത്യ 2036-ലെ ഒളിമ്പിക്സ് ആതിഥേയത്വത്തിനായുള്ള നീക്കങ്ങളും ശക്തമാക്കി വരികയാണ്.
Tag: India gets approval to submit expression of interest to host 2030 Commonwealth Games
