ലോകത്ത് ഓഗസ്റ്റ് 15 ന് ഇന്ത്യയ്ക്ക് പുറമെ സ്വാതന്ത്ര്യ ദിനം ആഘോഷിക്ക മറ്റ് ചില രാജ്യങ്ങൾ

പ്രതിവർഷം ഓഗസ്റ്റ് 15-ന് ഇന്ത്യ, 1947-ൽ ബ്രിട്ടീഷ് ഭരണത്തിൽ നിന്ന് മോചിതമായി സ്വാതന്ത്ര്യം നേടിയ മഹത്തായ ദിനം സ്മരിച്ച് സ്വാതന്ത്ര്യദിനം ആചരിക്കുന്നു. ഇത്തവണ രാജ്യം 79-ാമത് സ്വാതന്ത്ര്യദിനം ആഘോഷിക്കുകയാണ്. ഡല്‍ഹിയിലെ ചെങ്കോട്ടയിൽ പ്രധാനമന്ത്രി ദേശീയ പതാക ഉയർത്തുന്നതോടെ ഔദ്യോഗിക ചടങ്ങുകൾക്ക് തുടക്കം കുറിക്കും.

എന്നാൽ, ഇന്ത്യയ്ക്ക് പുറമെ ലോകത്തിലെ ചില രാജ്യങ്ങളും ഓഗസ്റ്റ് 15-ന് തന്നെ അവരുടെ സ്വാതന്ത്ര്യവും ദേശീയ അഭിമാനവും ആഘോഷിക്കുന്നു. അവയെക്കുറിച്ച് നോക്കാം—

ദക്ഷിണ കൊറിയ
‘റിപ്പബ്ലിക് ഓഫ് കൊറിയ’ എന്നറിയപ്പെടുന്ന ദക്ഷിണ കൊറിയ ഓഗസ്റ്റ് 15-ന് ഗ്വാങ്‌ബോക്‌ജിയോൾ എന്ന വിമോചന ദിനം ആഘോഷിക്കുന്നു. 1945-ൽ ജാപ്പനീസ് അധിനിവേശത്തിൽ നിന്ന് മോചിതരായ ദിനത്തിന്റെ സ്മരണയാണ് ഇത്. ‘ഗ്വാങ്‌ബോക്‌ജിയോൾ’ എന്നത് “പ്രകാശപൂരിത പുനഃസ്ഥാപന ദിനം” എന്നാണ് അർഥം. ചടങ്ങുകൾ, പരേഡുകൾ, സാംസ്‌കാരിക പരിപാടികൾ എന്നിവയോടെ രാജ്യം ആ ദിനം ആചരിക്കുന്നു.

ഉത്തര കൊറിയ
‘ഡെമോക്രാറ്റിക് പീപ്പിൾസ് റിപ്പബ്ലിക് ഓഫ് കൊറിയ’ എന്നറിയപ്പെടുന്ന ഉത്തര കൊറിയയും അതേ ദിവസം ചോഗുഖെബാംഗിൽ എന്ന പേരിൽ വിമോചന ദിനം ആഘോഷിക്കുന്നു. ജാപ്പനീസ് അധിനിവേശത്തിൽ നിന്ന് മോചിതരായ സംഭവത്തിന്റെ സ്മരണയ്ക്കാണ് ഈ ആഘോഷം.

ബഹ്‌റൈൻ
1971 ഓഗസ്റ്റ് 15-ന് ബ്രിട്ടീഷ് ഭരണത്തിൽ നിന്ന് സ്വാതന്ത്ര്യം നേടിയ ഗൾഫ് രാജ്യമാണ് ബഹ്‌റൈൻ. 1931-ൽ എണ്ണ കണ്ടെത്തിയതോടെ ഗൾഫ് മേഖലയിലെ എണ്ണ ശുദ്ധീകരണശാല സ്ഥാപിച്ച ആദ്യ രാജ്യങ്ങളിൽ ഒന്നായി. സ്വാതന്ത്ര്യ പ്രഖ്യാപനത്തിനുശേഷം, ബഹ്‌റൈൻ ഔദ്യോഗികമായി ഓഗസ്റ്റ് 15-നെ സ്വാതന്ത്ര്യദിനമായി ആചരിക്കുന്നു.

റിപ്പബ്ലിക് ഓഫ് കോംഗോ
1960 ഓഗസ്റ്റ് 15-ന് ഫ്രഞ്ച് ഇക്വറ്റോറിയൽ ആഫ്രിക്കയിൽ നിന്ന് സ്വാതന്ത്ര്യം നേടിയ കോംഗോ റിപ്പബ്ലിക്, തലസ്ഥാനമായ ബ്രസാവില്ലിൽ ദേശീയ ദിനമായി ആഘോഷം നടത്തുന്നു. പരേഡുകളും സാംസ്‌കാരിക പരിപാടികളും ഉൾപ്പെടുന്ന ആഘോഷങ്ങളാണ് മുഖ്യ ആകർഷണം.

ലിച്ചെൻസ്റ്റൈൻ
ലിച്ചെൻസ്റ്റൈൻ ഓഗസ്റ്റ് 15-നെ ദേശീയ ദിനമായി ആഘോഷിക്കുന്നു. ഇത് സ്വാതന്ത്ര്യദിനമല്ലെങ്കിലും രാജ്യത്തിന്റെ പരമാധികാരത്തെയും ദേശീയ ഐക്യത്തെയും ആഘോഷിക്കുന്ന ദിനമാണ്. 1940-ൽ ആരംഭിച്ച ഈ ദിനാചരണം മറിയത്തിൻ്റെ സ്വർഗാരോഹണ തിരുനാളും (ഓഗസ്റ്റ് 15) രാജകുമാരൻ ഫ്രാൻസ് ജോസഫ് രണ്ടാമൻ്റെ ജന്മദിനവും (ഓഗസ്റ്റ് 16) ഒന്നിച്ച് ആഘോഷിക്കുന്നതിനാൽ പ്രത്യേകതയാണ്. തലസ്ഥാനമായ വാഡൂസിൽ രാജകീയ കൊട്ടാരത്തിന് സമീപം പൊതുചടങ്ങുകളും രാജകുടുംബത്തിന്റെ പ്രസംഗങ്ങളും സമൂഹ ഉത്സവങ്ങളും നടക്കുന്നു.

Tag: Apart from India, some other countries in the world celebrate Independence Day on August 15