അമിത് ഷാ വീണ്ടും കേരളത്തിലേക്ക്; ഈ മാസം 22ന് തിരുവനന്തപുരത്തെത്തും
തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് ഒരുക്കങ്ങള്‍ വിലയിരുത്തുന്നതിനായി മുതിര്‍ന്ന നേതാവും കേന്ദ്ര ആഭ്യന്തര മന്ത്രിയുമായ അമിത് ഷാ വീണ്ടും കേരളത്തിലെത്തുന്നു. ജൂലൈ 12ന് തിരുവനന്തപുരം സന്ദര്‍ശനത്തിനിടെ തുടങ്ങിയ പ്രവര്‍ത്തനങ്ങള്‍ അവലോകനം ചെയ്യാനാണ് അദ്ദേഹം ഈ മാസം 22ന് എത്തുന്നത്. കൊച്ചിയില്‍ നടക്കുന്ന നേതൃയോഗത്തില്‍ പങ്കെടുക്കുന്ന അമിത് ഷാ, അടുത്ത നൂറ് ദിവസത്തേക്കുള്ള പാര്‍ട്ടി മാര്‍ഗനിര്‍ദേശങ്ങള്‍ നല്‍കുമെന്നാണ് വിവരം.
ഛത്തീസ്ഗഡിലെ കന്യാസ്ത്രീകളുടെ അറസ്റ്റ് സംബന്ധിച്ച വിഷയത്തില്‍ കൊച്ചിയില്‍ നടന്ന കോര്‍ കമ്മിറ്റി യോഗത്തില്‍ വ്യത്യസ്ത അഭിപ്രായങ്ങള്‍ ഉയര്‍ന്നു. സംസ്ഥാന ഘടകത്തിന്റെ വേഗത്തിലുള്ള ഇടപെടല്‍ പാര്‍ട്ടിയുടെ പരമ്പരാഗത വോട്ടര്‍മാരില്‍ അസ്വസ്ഥത സൃഷ്ടിച്ചുവെന്ന നിലപാടും ചര്‍ച്ചയായി. സംഭവത്തില്‍ അമിത് ഷാ ഇടപെടുമെന്ന് പരസ്യമായി പറഞ്ഞത് ശരിയായില്ലെന്നും, കേന്ദ്ര ആഭ്യന്തര മന്ത്രിയുടെ ഭാഗത്ത് നിന്ന് അത്തരമൊരു സൂചന ഉണ്ടായത് തെറ്റിദ്ധാരണയ്ക്ക് ഇടയാക്കിയെന്നുമുള്ള വിമര്‍ശനവും ഉയര്‍ന്നു.
എന്നാല്‍, ഛത്തീസ്ഗഡ് വിഷയത്തില്‍ പാര്‍ട്ടി ഇടപെടല്‍ ഗുണകരമായിരുന്നുവെന്ന നിലപാടും നേതൃത്വത്തില്‍ നിന്ന് മുന്നോട്ടുവന്നു. സുരേഷ് ഗോപിയുടെ മൗനം പാര്‍ട്ടിയെ പ്രതിരോധത്തിലാക്കിയെന്ന വിമര്‍ശനം ഉണ്ടായെങ്കിലും, ഇക്കാര്യത്തില്‍ സുരേഷ് ഗോപിക്ക് പിന്തുണ നല്‍കണമെന്നായിരുന്നു ഭൂരിപക്ഷ അഭിപ്രായം.
Tag: Amit Shah returns to Kerala; will reach Thiruvananthapuram on July 22
