വീണ്ടും ട്രെയിൻ കൊള്ള; വടികൊണ്ട് അടിച്ചിട്ട് മൊബെെൽ അടക്കമുള്ള വസ്തുക്കൾ കവർന്നെടുക്കും, രണ്ടംഗ സംഘം പിടിയിൽ
ട്രെയിനുകളിൽ പിടിച്ചുപറി നടത്തിവന്ന സംഘത്തെ പോലീസ് അറസ്റ്റ് ചെയ്തു. യാത്രക്കാരുടെ മൊബൈലുകളും പണവും ലക്ഷ്യമിട്ട സംഘത്തിലെ ഷൈൻ (കൊച്ചി), അഭിഷേക് (കണ്ണൂർ) എന്നിവരെയാണ് പോലീസ് പിടികൂടിയത്. കൂടാതെ, പ്രായപൂർത്തിയാകാത്ത ഒരാൾ കൂടി സംഘത്തിൽ ഉണ്ടെന്ന് റെയിൽവേ ക്രൈം ഇന്റലിജൻസ് വിഭാഗം അറിയിച്ചു.
സംഘത്തിന്റെ പ്രവർത്തനം പ്രധാനമായും ആലുവ കേന്ദ്രീകരിച്ചാണ്. കഴിഞ്ഞ മാസം 11-ന് മുംബൈയിലേക്ക് പോയ നേത്രാവതി എക്സ്പ്രസിൽ, മുൻഭാഗത്തെ കോച്ചിന്റെ വാതിലിനരികിൽ ഇരുന്ന യാത്രക്കാരന്റെ ഒരു ലക്ഷം രൂപ വിലവരുന്ന ഐഫോൺ ആണ് സംഘം തട്ടിയെടുത്തത്. പെരിയാർ പാലത്തിലൂടെ ട്രെയിൻ വേഗം കുറച്ച് പോകുമ്പോൾ, യാത്രക്കാരുടെ കൈവശമുള്ള ഫോൺ പോലുള്ള വസ്തുക്കൾ നീളൻ വടികൊണ്ട് അടിച്ചു വീഴ്ത്തിയാണ് ഇവർ കൈക്കലാക്കിയിരുന്നത്.
ഒരാഴ്ച മുമ്പും ആലുവയിൽ സമാന രീതിയിൽ കവർച്ച നടത്തിയ ആറംഗ സംഘത്തെ പിടികൂടിയിരുന്നു. അതിൽ പ്രായപൂർത്തിയാകാത്ത ഒരാളും ഉൾപ്പെട്ടിരുന്നുവെന്ന്, റെയിൽവേ പോലീസ് പിടികൂടിയിരുന്നു. ആലുവ റെയിൽവേ സ്റ്റേഷന്റെ സമീപമുള്ള പെരിയാർ പാലം തന്നെയാണ് ഇത്തരം കവർച്ചകൾക്ക് പ്രധാന കേന്ദ്രം. മേൽപ്പാലത്തിനും സ്റ്റേഷനും ഇടയിൽ ട്രെയിനുകൾ വേഗം കുറയ്ക്കുമ്പോൾ, സംഘം ഇരകളെ ലക്ഷ്യമിടും. വാതിലിനടുത്തു നിൽക്കുന്ന യാത്രക്കാരെ വടികൊണ്ട് ആക്രമിച്ച്, കൈയിൽ നിന്ന് വീഴുന്ന സാധനങ്ങൾ കൈക്കലാക്കും. അടിയേറ്റ് യാത്രക്കാരൻ തന്നെ താഴേക്ക് വീണാൽ, അദ്ദേഹത്തിന്റെ മുഴുവൻ വസ്തുക്കളും സംഘം കൂട്ടത്തോടെ കവർന്നു രക്ഷപ്പെടും.
Tag: Train robbery again; Two-member gang arrested for allegedly beating and stealing items including mobile phones
