ഡല്‍ഹി മുഖ്യമന്ത്രി രേഖ ഗുപ്തയ്‌ക്കെതിരായ ആക്രമണം: പ്രതി രാജേഷ് കിംജിയുടെ സുഹൃത്ത് പിടിയില്‍
ഡല്‍ഹി മുഖ്യമന്ത്രി രേഖ ഗുപ്തയ്‌ക്കെതിരായ ആക്രമണവുമായി ബന്ധപ്പെട്ട് പ്രതി രാജേഷ് കിംജിയുടെ സുഹൃത്ത് പിടിയിലായി. ആക്രമണത്തിന് ആവശ്യമായ പണം നല്‍കിയതും ഇയാളാണെന്ന് പൊലീസ് അറിയിച്ചു. കേസില്‍ രാജേഷ് കിംജിയുമായി ബന്ധമുള്ള 10 പേരെ പൊലീസ് നിരീക്ഷണത്തിലാണ്. സംശയിക്കുന്ന ഒരാളെ ഇന്ന് ഡല്‍ഹിയില്‍ എത്തിച്ച് ചോദ്യം ചെയ്യും. ഇതിനായി ഡല്‍ഹി പൊലീസ് സംഘം രാജ്കോട്ടില്‍ നിന്ന് അഞ്ച് പേരുടെ മൊഴിയും രേഖപ്പെടുത്തും. രാജേഷിന്റെ മൊബൈല്‍ പരിശോധിച്ചതിലൂടെയാണ് ഇവരെക്കുറിച്ചുള്ള വിവരം ലഭിച്ചത്.
ഡല്‍ഹി മുഖ്യമന്ത്രിയുടെ ഔദ്യോഗിക വസതിയില്‍ നടന്ന ജനസമ്പര്‍ക്ക പരിപാടിക്കിടെയാണ് പരാതിക്കാരനെന്ന വ്യാജേന എത്തിയ രാജേഷ് കിംജി ആക്രമണം നടത്തിയത്. ഗുജറാത്ത് സ്വദേശിയായ ഇയാളെ അന്നുതന്നെ പൊലീസ് അറസ്റ്റ് ചെയ്തിരുന്നു. തെരുവ് നായ്ക്കളെ കൂട്ടിലടക്കാന്‍ സുപ്രീംകോടതി ഉത്തരവിട്ടതോടെയുള്ള വിരോധമാണ് ആക്രമണത്തിന് പിന്നിലെന്ന് പൊലീസ് നേരത്തെ സൂചിപ്പിച്ചിരുന്നു.
41 കാരനായ രാജേഷ് കിംജിയുടെ വീട്ടില്‍ പൊലീസ് പരിശോധനയും നടത്തി. തെരുവ് നായ്ക്കളോടുള്ള അമിത സ്‌നേഹമാണ് ഇയാളെ പ്രതികാരത്തിലേക്ക് നയിച്ചതെന്ന് രാജേഷിന്റെ മാതാവ് പൊലീസിനോട് പറഞ്ഞു. സുപ്രീംകോടതി ഉത്തരവ് രാജേഷിനെ വേദനിപ്പിച്ചിരുന്നുവെന്നും അത് ആക്രമണത്തിന് കാരണമായിരിക്കാമെന്നും പൊലീസ് വിലയിരുത്തുന്നു.
ആക്രമണം നടത്താനുള്ള ഉദ്ദേശത്തോടെയാണ് പ്രതി മുഖ്യമന്ത്രിയുടെ വീട്ടിലെത്തിയതെന്നും, ആക്രമണത്തിന് മുന്‍പുദിവസം ശാലിമാര്‍ബാഗില്‍ മുഖ്യമന്ത്രി പങ്കെടുത്ത മറ്റൊരു പരിപാടിയിലും ഇയാള്‍ എത്തിയിരുന്നുവെന്നും പൊലീസ് വ്യക്തമാക്കി. ആ ദൃശ്യങ്ങളും അന്വേഷണത്തിനായി ശേഖരിച്ചിരിക്കുകയാണ്.
Tag: Attack on Delhi Chief Minister Rekha Gupta: Friend of accused Rajesh Khimji arrested
