ഉത്തരാഖണ്ഡിൽ വീണ്ടും മേഘവിസ്ഫോടനം; നിരവധി പേരെ കാണാതായി, രക്ഷാപ്രവർത്തനം പുരോഗമിക്കുന്നു

ഉത്തരാഖണ്ഡിലെ ചമോലി ജില്ലയിലെ തരാലിയിലാണ് ഏറ്റവും പുതിയ മേഘവിസ്ഫോടനം. നിരവധി പേരെ കാണാതായതായി പ്രാഥമിക റിപ്പോർട്ടുകൾ സൂചിപ്പിക്കുന്നു. സബ് ഡിവിഷണൽ മജിസ്‌ട്രേറ്റിന്റെ വീട് ഉൾപ്പെടെ നിരവധി വീടുകൾക്കും കെട്ടിടങ്ങൾക്കും കേടുപാടുകൾ സംഭവിച്ചിട്ടുണ്ട്. ദുരന്തബാധിത പ്രദേശത്ത് രക്ഷാപ്രവർത്തനം പുരോഗമിക്കുകയാണ്.

ജില്ലാ കളക്ടറുടെ നേതൃത്വത്തിലുള്ള ദുരിതാശ്വാസ സംഘങ്ങൾ സ്ഥലത്തേക്ക് തിരിച്ചിട്ടുണ്ട്. ഇതിനുമുമ്പ് കേന്ദ്ര കാലാവസ്ഥാ വകുപ്പ് സംസ്ഥാനത്ത് ഓറഞ്ച് അലേർട്ട് പുറപ്പെടുവിച്ചിരുന്നു. ഡെറാഡൂൺ, തെഹ്രി, പൗരി, ചമോലി, രുദ്രപ്രയാഗ്, നൈനിറ്റാൾ, അൽമോറ ജില്ലകളിൽ ഇടിമിന്നലോടു കൂടിയ അതിശക്തമായ മഴയ്ക്ക് സാധ്യതയുണ്ടെന്ന് മുന്നറിയിപ്പ് നൽകിയിരുന്നു. ഇന്ന് ഉച്ചവരെ ജാ​ഗ്രത മുന്നറിയിപ്പ് തുടരും.

പെയ്യുന്ന മഴയും മണ്ണിടിച്ചിലും ഭീഷണിയായതിനാൽ പ്രാദേശികർ ജാഗ്രത പാലിക്കണമെന്ന് പൊലീസ് അഭ്യർത്ഥിച്ചിട്ടുണ്ട്. ഇതിനിടെ, ഉത്തരകാശിയിലെ ദബ്രാനി പ്രദേശത്ത് ഗംഗോത്രി ഹൈവേയിൽ മണ്ണിടിഞ്ഞുവീണ് രണ്ടുപേർ മരിച്ചിരുന്നു. അതുപോലെ ഹർസിലിൽ പുതുതായി രൂപം കൊണ്ട തടാകം വറ്റിക്കാനുള്ള ശ്രമം എൻഡിആർഎഫും എസ്ഡിആർഎഫും ചേർന്ന് തുടരുകയാണ്.

Tag: Another cloudburst in Uttarakhand; Several people missing, rescue operation in progress