തിരുവനന്തപുരത്ത് നിന്ന് കാണാതായ സിഐഎസ്എഫ് ഉദ്യോഗസ്ഥന്റെ ഭാര്യയെയും മകനെയും കണ്ടെത്തി

ഒരു ആഴ്ചയായി കാണാതായിരുന്ന സിഐഎസ്എഫ് ഉദ്യോഗസ്ഥന്റെ ഭാര്യയും മകനും ഭോപ്പാലിൽ നിന്നാണ് കണ്ടെത്തിയത്. അസം സ്വദേശിനിയായ റൂമി ദേവദാസ് (30)യും നാല് വയസ്സുകാരൻ പ്രീയാനന്ദ ദാസും (4) ആണ് കാണാതായത്. ഭർത്താവ് പൂനം ചന്ദ്രബോസിന്റെ പരാതിയെ തുടർന്ന് ഫോർട്ട് പൊലീസ് നടത്തിയ അന്വേഷണത്തിലാണ് അമ്മയെയും മകനെയും കണ്ടെത്തിയത്.

ഭർത്താവിനൊപ്പം തിരികെ പോകാൻ താൽപ്പര്യമില്ലെന്ന് റൂമി പൊലീസിനോട് വ്യക്തമാക്കി. തുടർന്ന് ഓൺലൈനായി മജിസ്ട്രേറ്റിന് മുന്നിൽ ഹാജരാക്കിയ ശേഷം ഇരുവരെയും അസാമിലേക്ക് വിടുകയായിരുന്നു. ഈ മാസം 13-ന് അസാമിലേക്ക് പോകുകയാണെന്ന് പറഞ്ഞാണ് റൂമിയും മകനും തിരുവനന്തപുരത്തെ വീട്ടിൽ നിന്ന് പുറപ്പെട്ടത്. കുടുംബ പ്രശ്നങ്ങളാണ് കാണാതാകാൻ കാരണം എന്ന് ചന്ദ്രബോസ് പൊലീസിനോട് പറഞ്ഞിരുന്നു. ആദ്യം തൃശൂരിലാണ് അന്വേഷണത്തിന് കൂടുതൽ പ്രാധാന്യം നൽകിയത്.

Tag: Wife and son of missing CISF officer found in Thiruvananthapuram