”ജയിലിനുള്ളിലേക്ക് ഫോൺ എറിഞ്ഞു നൽകി, കൂലി 1000 മുതൽ 2000 രൂപ വരെ ലഭിച്ചു ”- വെളിപ്പെടുത്തലുമായി പ്രതി

കണ്ണൂർ സെൻട്രൽ ജയിലിലേക്ക് സാധനങ്ങൾ എറിഞ്ഞുകൊടുക്കുന്നത് കൂലിക്കായി നടത്തിയിരുന്നുവെന്നു വെളിപ്പെടുത്തി. മൊബൈൽ ഫോൺ ഉൾപ്പെടെയുള്ള സാധനങ്ങൾ ജയിലിനുള്ളിലേക്ക് എത്തിക്കുന്നതിന് 1000 മുതൽ 2000 രൂപ വരെ ലഭിച്ചിരുന്നുവെന്നതാണ് പിടിയിലായ പനങ്കാവ് സ്വദേശി കെ. അക്ഷയുടെ മൊഴി. ജയിലിനകത്ത് സാധനങ്ങൾ എത്തിക്കേണ്ട സ്ഥലത്തിന്റെ അടയാളങ്ങൾ മുൻകൂട്ടി അറിയിക്കപ്പെടും, അതുവഴിയാണ് സാധനങ്ങൾ അകത്ത് എത്തിച്ചിരുന്നതെന്നും ഇയാൾ സമ്മതിച്ചു.

ഞായറാഴ്ച വൈകിട്ട് 3 മണിയോടെ ജയിലിന്റെ പരിസരത്തേക്ക് കയറിപ്പോയി മൊബൈൽ ഫോണും ബീഡിയും പുകയില ഉൽപ്പന്നങ്ങളും അകത്ത് എറിയാൻ ശ്രമിക്കവേ അക്ഷയ് പിടിയിലായി. ഇയാളോടൊപ്പം ഉണ്ടായിരുന്ന മറ്റു രണ്ടുപേർ രക്ഷപ്പെട്ടു. ജയിൽ വാർഡൻ ഇടപെട്ടാണ് ഇയാളെ പിടികൂടിയത്. തുടർന്ന് കണ്ണൂർ ടൗൺ പൊലീസ് കേസ് രജിസ്റ്റർ ചെയ്തു.

കഴിഞ്ഞ ബുധനാഴ്ച ജയിലിൽ നടത്തിയ പരിശോധനയിൽ ഇ-ഡിവിഷനിലെ 12-ാം നമ്പർ സെല്ലിന്റെ ഭിത്തിയിൽ നിന്ന് മൂന്ന് മൊബൈൽ ഫോണുകൾ കണ്ടെത്തിയിരുന്നു. ഇതിനു രണ്ടാഴ്ച മുൻപ് ന്യൂ ബ്ലോക്കിലെ കല്ലിനടിയിൽ നിന്നും കുളിമുറിയിലെ ജനാലയിൽ ഒളിപ്പിച്ച നിലയിലും മൊബൈൽ ഫോണുകൾ പിടികൂടിയിരുന്നു.

ഗോവിന്ദച്ചാമിയുടെ ജയിൽ ചാടലിന് പിന്നാലെ സർക്കാർ രൂപീകരിച്ച അന്വേഷണം സമിതി—റിട്ട. ജസ്റ്റിസ് സി.എൻ. രാമചന്ദ്രൻ നായർ, മുൻ സംസ്ഥാന പൊലീസ് മേധാവി ജേക്കബ് പുന്നൂസ് എന്നിവരടങ്ങിയ സംഘം—രണ്ട് ദിവസം ജയിലിൽ പരിശോധന നടത്തി. അതിന് പിന്നാലെയാണ് ജോയിന്റ് സൂപ്രണ്ടുമാരുടെ നേതൃത്വത്തിലുള്ള പരിശോധനയിൽ വീണ്ടും മൊബൈൽ ഫോണുകൾ കണ്ടെത്തിയത്. കണ്ണൂർ സെൻട്രൽ ജയിലിൽ നിന്ന് നേരത്തെയും പല തവണ മൊബൈൽ ഫോണുകൾ പിടികൂടിയിട്ടുണ്ടെന്ന് പൊലീസ് വ്യക്തമാക്കിയിട്ടുണ്ട്.

Tag: threw the phone inside the jail and got a reward of Rs. 1000 to 2000 Accused reveals