ശസ്ത്രക്രിയ പിഴവിനെ തുടർന്ന് യുവതി ഗുരുതര ദുരിതം അനുഭവിക്കുന്ന സംഭവം; ഡോക്ടർക്കെതിരെ മൊഴി നൽകി യുവതി

തിരുവനന്തപുരം ജനറൽ ആശുപത്രിയിലെ ശസ്ത്രക്രിയ പിഴവിനെ തുടർന്ന് യുവതി ഗുരുതര ദുരിതം അനുഭവിക്കുന്ന സംഭവത്തിൽ, ചികിത്സ നടത്തിയ ഡോക്ടർക്കെതിരെ മൊഴി രേഖപ്പെടുത്തി. കാട്ടക്കട മലയിൻകീഴ് സ്വദേശി സുമയ്യയാണ് ഈ ദുരന്തത്തിന്റെ ഇര. ഡോക്ടർമാരുടെ അശ്രദ്ധയാണ് ജീവനെ തന്നെ ഭീഷണിയിലാക്കിയതെന്ന് കുടുംബം ആരോപിക്കുന്നു. ആരോഗ്യവകുപ്പ് സംഭവം നിസ്സാരമായി കാണുന്നുവെന്നതിനും നടപടിയില്ലായ്മ തുടരുന്നതിലും കുടുംബം അസന്തോഷം പ്രകടിപ്പിച്ചു. “നീതി ലഭിക്കുന്നതുവരെ പോരാട്ടം തുടരും” എന്നാണ് സഹോദരീഭർത്താവ് സബീർ വ്യക്തമാക്കിയത്.

ഡോ. രാജീവ് കുമാറാണ് ശസ്ത്രക്രിയക്ക് മുമ്പ് തന്നെ പണം വാങ്ങിയിരുന്നതെന്നും, ആദ്യം ഒപിയിൽ പോയപ്പോൾ മറ്റൊരു ഡോക്ടറുടെ നിർദ്ദേശപ്രകാരം തന്നെ നെടുമങ്ങാട് സ്വകാര്യ ക്ലിനിക്കിൽ എത്തിയതാണെന്നും സബീർ പറഞ്ഞു. ഡോക്ടറുടെ ഓഡിയോ ക്ലിപ്പ് പുറത്തുവന്നിട്ട് 24 മണിക്കൂർ കഴിഞ്ഞിട്ടും ആരോഗ്യവകുപ്പിൽ നിന്ന് പ്രതികരണം ഒന്നുമില്ലെന്ന് അദ്ദേഹം ആരോപിച്ചു.

2023 മാർച്ച് 22-ന് സുമയ്യ തിരുവനന്തപുരം ജനറൽ ആശുപത്രിയിൽ എത്തിയപ്പോൾ, തൈറോയ്ഡ് ഗ്രന്ഥി നീക്കം ചെയ്യുന്ന ശസ്ത്രക്രിയ നടത്തിയത് ഡോ. രാജീവ് കുമാറാണ്. എന്നാൽ ശസ്ത്രക്രിയയ്ക്കിടെ പ്രശ്നങ്ങൾ ഉണ്ടായതോടെ രക്തവും മരുന്നുകളും നൽകാൻ സെൻട്രൽ ലൈൻ ഘടിപ്പിച്ചു. ഇതിന് ഉപയോഗിച്ച ഗൈഡ് വയർ പിന്നീട് തിരികെ എടുത്തില്ല. അതാണ് ഇപ്പോൾ സുമയ്യയുടെ നെഞ്ചിൽ കുടുങ്ങിക്കിടക്കുന്നത്.

ശേഷം ശ്രീചിത്ര ആശുപത്രിയുൾപ്പെടെ വിവിധ ആശുപത്രികളിൽ നടത്തിയ പരിശോധനയിൽ, വയർ ധമനികളോട് ചേർന്നുകിടക്കുന്നതായാണ് കണ്ടെത്തിയത്. അതിനാൽ ശസ്ത്രക്രിയ ചെയ്ത് അത് നീക്കം ചെയ്യുന്നത് അസാധ്യമാണ് എന്ന് വിദഗ്ധർ വ്യക്തമാക്കി. ഗുരുതരമായ ഈ പിഴവ് ജീവിതകാലം മുഴുവൻ ദുരിതം വിതയ്ക്കുമെന്നും, നീതി ഉറപ്പാക്കുകയും ആവശ്യമായ മികച്ച ചികിത്സ ലഭ്യമാക്കുകയും ചെയ്യണമെന്ന് സുമയ്യ ആവശ്യപ്പെടുന്നു.

Tag: Woman suffers serious injury after surgical error; Woman gives statement against doctor