കൂത്താട്ടുകുളം നഗരസഭ അധ്യക്ഷയായി യുഡിഎഫ് സ്ഥാനാർത്ഥി കൗൺസിലർ കല രാജു തിരഞ്ഞെടുക്കപ്പെട്ടു

കൂത്താട്ടുകുളം നഗരസഭ അധ്യക്ഷസ്ഥാനത്ത് സിപിഎം വിമതയും യുഡിഎഫ് സ്ഥാനാർത്ഥിയുമായ കല രാജു തിരഞ്ഞെടുക്കപ്പെട്ടു. 13 വോട്ടുകൾ നേടിയ കല രാജു, എൽഡിഎഫ് സ്ഥാനാർത്ഥിയും മുൻ അധ്യക്ഷനുമായ വിജയ ശിവനെ (12 വോട്ടുകൾ) പരാജയപ്പെടുത്തി. ഇതോടെ നഗരസഭയുടെ ഭരണാധികാരം യുഡിഎഫിലേക്ക് മാറി.

“മനസാക്ഷിക്കനുസരിച്ചാണ് പ്രവർത്തിക്കുകയെന്ന്” വിജയത്തിന് പിന്നാലെ കല രാജു പ്രതികരിച്ചു. മാസങ്ങൾക്ക് മുമ്പ് ആഭ്യന്തര പ്രശ്നങ്ങൾ മൂലം സിപിഎമ്മിൽ നിന്ന് അകന്ന കല രാജു, പിന്നീട് യുഡിഎഫിനൊപ്പം ചേർന്നിരുന്നു. കല രാജുവിനെ തട്ടിക്കൊണ്ടുപോയെന്ന ആരോപണവുമായി ബന്ധപ്പെട്ട വിവാദങ്ങളും നഗരസഭാ രാഷ്ട്രീയത്തെ ചൂടേറിയിരുന്നു.

ഈ മാസം 5ന് നടന്ന അവിശ്വാസപ്രമേയത്തിൽ യുഡിഎഫിന് അനുകൂലമായി കല രാജു വോട്ട് ചെയ്തതോടെ എൽഡിഎഫിന് ഭരണം നഷ്ടമായി. അതിന്റെ തുടർച്ചയായാണ് കല രാജു യുഡിഎഫ് സ്ഥാനാർത്ഥിയായി മത്സരിച്ച് അധ്യക്ഷസ്ഥാനത്തേക്ക് ഉയർന്നത്.

Tag: UDF candidate Councilor Kala Raju elected as Koothattukulam Municipality Chairperson