അനൂപ് മാലിക് കോൺഗ്രസിന്റെ ആളെന്ന് കെ.കെ.രാഗേഷ്; തോന്ന്യാസമെന്ന് കണ്ണൂർ ഡിസിസി പ്രസിഡന്റ്
കണ്ണപുരം കീഴറയിലെ സ്ഫോടനത്തിൽ പ്രതിചേർക്കപ്പെട്ട അനൂപ് മാലിക്കിന്റെ രാഷ്ട്രീയ ബന്ധം ചൊല്ലി സിപിഎമ്മും കോൺഗ്രസും പരസ്പരം ആരോപണ-പ്രതാരോപണത്തിലേക്ക്. സിപിഎം ജില്ലാ സെക്രട്ടറി കെ.കെ. രാഗേഷ് അനൂപ് കോൺഗ്രസിന്റെ അടുത്ത ആളാണെന്ന് ആരോപിച്ചു. എന്നാൽ, ഡിസിസി പ്രസിഡന്റ് മാർട്ടിൻ ജോർജ് ഇതിനെ തള്ളിക്കളഞ്ഞ്, അനൂപിന് കോൺഗ്രസുമായി യാതൊരു ബന്ധവുമില്ലെന്നും സിപിഎമ്മിന്റെ ആരോപണം അടിസ്ഥാനരഹിതമാണെന്നും വ്യക്തമാക്കി.
സ്ഫോടനസ്ഥലം സന്ദർശിച്ച കെ.കെ. രാഗേഷ് മാധ്യമങ്ങളോട് പ്രതികരിക്കുമ്പോൾ, ഉത്സവ സമയമല്ലാത്തപ്പോൾ വാടകവീട്ടിൽ സ്ഫോടകവസ്തുക്കൾ നിർമ്മിച്ചതിൽ സംശയം ഉണ്ട് എന്നും, സംഭവത്തിന് പിന്നിൽ മറ്റ് ലക്ഷ്യങ്ങളുണ്ടോയെന്ന കാര്യത്തിൽ അന്വേഷണം വേണമെന്നും ആവശ്യപ്പെട്ടു. കൊല്ലപ്പെട്ടയാൾ കിടന്നുറങ്ങുമ്പോഴാണ് സ്ഫോടനം ഉണ്ടായതെന്നാണ് സൂചന. അതിനാൽ, മറ്റാരുടെയെങ്കിലും ഇടപെടൽ ഉണ്ടായിട്ടുണ്ടോ എന്ന് പരിശോധിക്കണമെന്നും അദ്ദേഹം പറഞ്ഞു.
അതേസമയം, മാർട്ടിൻ ജോർജ് കോൺഗ്രസ് വിരുദ്ധ പ്രചാരണമാണ് സിപിഎം നടത്തുന്നതെന്ന് ആരോപിച്ചു. എന്നാൽ, അനൂപിന് കോൺഗ്രസുമായി യാതൊരു ബന്ധവുമില്ലെന്ന് ഡിസിസി പ്രസിഡന്റ് മാർട്ടിൻ ജോർജ് പറഞ്ഞു. ശുദ്ധ തോന്ന്യാസമാണ് സിപിഎം ജില്ലാ സെക്രട്ടറി പറഞ്ഞത്. എന്തിന് വേണ്ടിയാണ് ബോംബ് ഉണ്ടാക്കുന്നതെന്നും ആർക്കാണ് ഇതു കൊടുക്കുന്നതെന്നും അറിയേണ്ടതുണ്ട്. ബോംബ് നിർമാണം വ്യാപകമായി കണ്ണൂർ ജില്ലയിൽ നടക്കുകയാണ്. പൊലീസ് കർശന നിലപാട് എടുക്കണമെന്നും അദ്ദേഹം ആവശ്യപ്പെട്ടു.
ഉത്സവത്തിനായി പടക്കങ്ങൾ ഉണ്ടാക്കുന്നതിന് ആവശ്യമായ സ്ഫോടകവസ്തുക്കൾ വലിയ തോതിൽ സൂക്ഷിച്ചിരുന്നതായി പ്രാഥമിക പരിശോധനയിൽ കണ്ടെത്തി. സ്ഫോടനത്തിൽ മുഹമ്മദ് അഹ്സം എന്നയാളുടെ ശരീരം ലഭിച്ചു. ഇവർ ഒരുവർഷത്തിലേറെയായി വാടകവീട്ടിൽ താമസിക്കുന്നുണ്ടായിരുന്നു. സംഭവവുമായി ബന്ധപ്പെട്ട് കണ്ണപുരം പൊലീസ് കേസ് എടുത്തിട്ടുണ്ട്. ഫൊറൻസിക് പരിശോധനയ്ക്ക് ശേഷം മാത്രമേ കൂടുതൽ വിശദാംശങ്ങൾ പുറത്തുവിടാനാകൂ എന്നും അദ്ദേഹം അറിയിച്ചു. 2016 ലെ സ്ഫോടനത്തിനും അനൂപ് മാലിക്കിനെതിരെ സമാനമായ ആരോപണം സിപിഎം ഉയർത്തിയിരുന്നു. എന്നാൽ പിന്നീട് കേസുകൾ ഒതുക്കിത്തീർത്തുവെന്ന സംശയവും നിലനിന്നിരുന്നു. ഇന്ന് പുലർച്ചെ 2 മണിയോടെയാണ് കണ്ണപുരത്തെ വാടകവീട്ടിൽ സ്ഫോടനം ഉണ്ടായത്.
Tag: KK Ragesh calls Anoop Malik a Congressman; Kannur DCC President says he is disappointed
