ടെയ്‌ലർ സ്വിഫ്റ്റ്– ട്രാവിസ് കെൽസി വിവാഹനിശ്ചയം; കോടികൾ വിലവരുന്ന മോതിരം സോഷ്യൽ മീഡിയയിലെ ചർച്ചാവിഷയം

പോപ്പ് താരം ടെയ്‌ലർ സ്വിഫ്റ്റിന്റെയും അമേരിക്കൻ ഫുട്ബോൾ താരം ട്രാവിസ് കെൽസിയുടെയും വിവാഹനിശ്ചയത്തിന്റെ ചിത്രങ്ങൾ ഇതിനോടകം തന്നെ സോഷ്യൽ മീഡിയയിൽ വൈറലായി. പ്രത്യേകിച്ച് താരത്തിന്റെ വിവാഹനിശ്ചയ മോതിരമാണ് എല്ലാവരും ചർച്ച ചെയ്യുന്നത്.

ഏകദേശം 4.8 കോടി രൂപ വിലവരുമെന്ന് കരുതുന്ന ഈ മോതിരം, ആഡംബര ജ്വല്ലറി കടയിൽ നിന്നല്ല വാങ്ങിയത്. ന്യൂയോർക്കിലെ Artifex Fine Jewelryയിലെ കിൻഡ്രഡ് ലൂബെക്കുമായി ചേർന്ന് ട്രാവിസ് കെൽസി തന്നെയാണ് ഡിസൈൻ ചെയ്തത്. കൈകൊണ്ട് കൊത്തിയെടുത്ത 18 കാരറ്റ് യെല്ലോ ഗോൾഡിൽ പതിപ്പിച്ചിരിക്കുന്ന 10 കാരറ്റ് ഭാരമുള്ള വജ്രമാണ് മോതിരത്തിന്റെ പ്രത്യേകത.

ഓഫീഷ്യൽ വില പ്രഖ്യാപിച്ചിട്ടില്ലെങ്കിലും വിദഗ്ധർ പറയുന്നതനുസരിച്ച് മോതിരത്തിന്റെ വില 5.5 ലക്ഷം മുതൽ 7.5 ലക്ഷം ഡോളർ വരെ (ഏകദേശം 4.5–6.2 കോടി രൂപ) വരാനിടയുണ്ട്. മോതിരത്തിലെ പ്രധാന ആകർഷണം Old Mine Cut ഡയമണ്ടാണ് — 18, 19-ആം നൂറ്റാണ്ടുകളിൽ പ്രചാരത്തിലുണ്ടായിരുന്ന ഒരു പുരാതന കട്ടിങ് രീതിയാണിത്. ഇതിന് പ്രത്യേക തിളക്കവും വിന്റേജ് സൗന്ദര്യവുമുണ്ട്.

വിന്റേജ് സ്റ്റൈലിലുള്ള മോതിരത്തിന് ഇന്ത്യയുമായും ബന്ധമുണ്ടെന്നാണ് വിദഗ്ധരുടെ നിരീക്ഷണം. കുഷ്യൻ രൂപത്തിലുള്ള ഈ ഡയമണ്ടുകൾ ഗോൽക്കൊണ്ട മേഖലയിൽ നിന്നാണ് 2,000 വർഷങ്ങൾക്ക് മുമ്പ് ഖനനം നടന്നതെന്നാണ് ചരിത്ര രേഖകൾ സൂചിപ്പിക്കുന്നത്. ബ്രിട്ടീഷ് ഭരണകാലത്ത് ഇന്ത്യയിൽ നിന്നു പുറത്തേക്ക് കൊണ്ടുപോയ വജ്രങ്ങളിലൊന്നായിരിക്കാമെന്നും കരുതപ്പെടുന്നു. എന്നിരുന്നാലും, സ്വിഫ്റ്റിന്റെ മോതിരം നേരിട്ട് ഗോൽക്കൊണ്ടയിൽ നിന്നുള്ളതാണെന്ന് തെളിയിക്കുന്ന രേഖകളൊന്നുമില്ല.

Tag: Taylor Swift-Travis Kelsey engagement; ring worth crores is the talk of social media