കാറുകള്‍ക്ക് 2.4 ലക്ഷം രൂപ വരെ വില കുറയും, ജിഎസ്ടി ആനുകൂല്യം ഉപഭോക്താക്കളിലേക്ക്
യാത്രാ വാഹനങ്ങളുടെ ജിഎസ്ടി നിരക്ക് കുറച്ചതിന്റെ മുഴുവൻ ആനുകൂല്യവും ഉപഭോക്താക്കൾക്ക് കൈമാറുമെന്ന് ഹ്യുണ്ടായ് മോട്ടോർ ഇന്ത്യ ലിമിറ്റഡ് അറിയിച്ചു. ടാറ്റ മോട്ടോഴ്സ്, മഹീന്ദ്ര & മഹീന്ദ്ര, ടൊയോട്ട കിർലോസ്കർ എന്നിവയുടെ നിരയിൽ കൊറിയൻ കാർ നിർമ്മാതാക്കളും ചേർന്നിരിക്കുകയാണ്. പരിഷ്കരിച്ച ജിഎസ്ടി നിരക്ക് സെപ്റ്റംബർ 22 മുതൽ പ്രാബല്യത്തിൽ വരും.
ജിഎസ്ടി കുറവ് പൂർണമായി പ്രാബല്യത്തിൽ വരുത്തിയാൽ ഹ്യുണ്ടായിയുടെ മോഡലുകൾക്ക് 60,640 രൂപ മുതൽ 2.4 ലക്ഷം രൂപ വരെയാണ് വിലക്കുറവ് പ്രതീക്ഷിക്കുന്നത്. ഗ്രാൻഡ് i10 നിയോസ് 73,808 രൂപയും, ഓറ 78,465 രൂപയും, വേർണ 60,640 രൂപയും കുറയും. i20-യുടെ വില ഏകദേശം 98,000 രൂപ വരെ കുറയുമെന്ന് റിപ്പോർട്ടുകൾ വ്യക്തമാക്കുന്നു.
എസ്യുവി വിഭാഗത്തിൽ എക്സ്റ്റർ 89,209 രൂപ വരെ, വെന്യുയും വെന്യു എൻലൈൻ-ഉം 1.19 ലക്ഷം മുതൽ 1.23 ലക്ഷം രൂപ വരെ കുറയും. ജനപ്രിയ മോഡലായ ക്രെറ്റ 72,145 രൂപ വരെ വിലക്കുറവിൽ ലഭിക്കും. അൽകാസർ 75,376 രൂപയും ട്യൂസൺ 2.40 ലക്ഷം രൂപവരെ വില കുറഞ്ഞേക്കും.
“യാത്രാ വാഹനങ്ങളുടെ ജിഎസ്ടി കുറയ്ക്കാനുള്ള ഇന്ത്യാ സർക്കാരിന്റെ പുരോഗമനപരമായ നീക്കത്തെ ഹൃദയപൂർവ്വം അഭിനന്ദിക്കുന്നു. ഈ തീരുമാനം ഓട്ടോമൊബൈൽ മേഖലക്ക് ഉത്തേജനമാകുന്നതോടൊപ്പം യാത്ര കൂടുതൽ ലഭ്യവും താങ്ങാനാവുന്നതുമായിത്തീർത്ത് ദശലക്ഷക്കണക്കിന് ഉപഭോക്താക്കളെ ശാക്തീകരിക്കുന്നതാണ്,” എന്ന് ഹ്യുണ്ടായ് മോട്ടോർ ഇന്ത്യയുടെ മാനേജിങ് ഡയറക്ടർ അൻസൂ കിം പറഞ്ഞു.
ജിഎസ്ടി കൗൺസിൽ ചെറുകാറുകളുടെ ജിഎസ്ടി 28%ൽ നിന്ന് 18% ആക്കിയതിനെ തുടർന്നാണ് ശനിയാഴ്ച തന്നെ വിവിധ കമ്പനികൾ വിലക്കുറവ് പ്രഖ്യാപിച്ചത്. സ്പോർട്സ് യൂട്ടിലിറ്റി വാഹനങ്ങൾ (എസ്യുവികൾ) ഉൾപ്പെടെ പ്രീമിയം കാറുകൾക്ക് ഇനി 40% ജിഎസ്ടി ചുമത്തും. നേരത്തെ ഇത് സെസ് ഉൾപ്പെടെ 48% ആയിരുന്നു.
മഹീന്ദ്രയുടെ താർ 4WD മോഡലിന് 1.01 ലക്ഷം രൂപ വരെ, ടൊയോട്ടയുടെ ഫോർച്യൂണർ-ന് 3.49 ലക്ഷം രൂപ വരെ, ടാറ്റ മോട്ടോഴ്സിന്റെ നെക്സോൺ-ന് 1.55 ലക്ഷം രൂപ വരെ വിലക്കുറവ് ലഭിക്കുമെന്നാണ് റിപ്പോർട്ടുകൾ.
Tag: Prices of cars will be reduced by up to Rs 2.4 lakh, GST benefits will be passed on to consumers
