ധർമസ്ഥല കേസിൽ സമർപ്പിച്ച തെളിവുകളും മൊഴികളും കൃത്രിമമാണെന്ന് ലോറി ഡ്രൈവർ മനാഫ്

ധർമസ്ഥല കേസിൽ സമർപ്പിച്ച തെളിവുകളും മൊഴികളും കൃത്രിമമാണെന്ന് ലോറി ഡ്രൈവർ മനാഫ് അന്വേഷണ സംഘത്തിന് നൽകിയ മൊഴിയിൽ വെളിപ്പെടുത്തി. തലയോട്ടി എടുത്തത് ശുചീകരണ തൊഴിലാളിയല്ല, മറിച്ച് മറ്റ് രണ്ടുപേരാണെന്നും, അവരുടെ വിവരങ്ങൾ അന്വേഷണ സംഘത്തോട് കൈമാറിയെന്നും അദ്ദേഹം പറഞ്ഞു. കേസിന് വിശ്വാസ്യത നൽകാനായി ചിലർ വ്യാജ തെളിവുകൾ സൃഷ്ടിച്ചുവെന്നും, സുജാത ഭട്ടിന്റെ മൊഴി വിശ്വസിച്ചതിൽ തനിക്ക് പിഴവുണ്ടായെന്നും മനാഫ് വ്യക്തമാക്കി. ആരെയും സംരക്ഷിക്കാനുള്ള ഉദ്ദേശ്യമില്ലെന്നും, അറിയാവുന്ന കാര്യങ്ങൾ എല്ലാം തന്നെ അന്വേഷണ സംഘത്തോട് പറഞ്ഞുവെന്നും അദ്ദേഹം കൂട്ടിച്ചേർത്തു.

ചിലരുടെ “നാടകങ്ങൾ” കേസിന്റെ ഗൗരവത്തെ ബാധിക്കുമെന്ന് ആശങ്കയുണ്ടെന്നും, വ്യാജ രേഖകളും തെളിവുകളും പുറത്തുവന്നാൽ അന്വേഷണം തെറ്റിദ്ധരിപ്പിക്കപ്പെടുമെന്നും മനാഫ് മുന്നറിയിപ്പ് നൽകി. പ്രത്യേക അന്വേഷണ സംഘത്തിന് മുമ്പിൽ ഹാജരായെങ്കിലും, ഉഡുപ്പി പൊലീസിൽ ഹാജരാകാതെ നാട്ടിലേക്ക് മടങ്ങിയതോടെ വിവാദം ശക്തമായി.

മനാഫിനെതിരെ ഭാരതീയ ന്യായസംഹിതയിലെ 299-ാം വകുപ്പ് പ്രകാരം ഉഡുപ്പി ടൗൺ പൊലീസ് എഫ്‌ഐആർ രജിസ്റ്റർ ചെയ്തിട്ടുണ്ട്. മൂന്നു വർഷം വരെ തടവുശിക്ഷ ലഭിക്കാവുന്ന കുറ്റമാണിത്. ധർമസ്ഥല, മൂകാംബിക തുടങ്ങിയ ക്ഷേത്രങ്ങളെതിരെ പ്രചാരണ പ്രവർത്തനങ്ങൾ നടത്തിയതാണെന്നാണ് എഫ്‌ഐആറിലെ ആരോപണം. ധർമസ്ഥല കൂട്ടക്കൊല ആരോപണവുമായി ബന്ധപ്പെട്ട നിരവധി വീഡിയോകൾ അദ്ദേഹം പങ്കുവെച്ചിരുന്നു. വെളിപ്പെടുത്തലുകൾ വ്യാജമാണെന്ന റിപ്പോർട്ടുകൾ വന്നപ്പോൾ ഒളിവിലായെന്ന ആരോപണം ഉയർന്നെങ്കിലും, മനാഫ് അത് തള്ളി. കേരളത്തിലെ ആളുകളെ വിഷയത്തിൽ ഉൾപ്പെടുത്തിയതാണ് തന്റെ തെറ്റെന്ന് മുൻപ് അദ്ദേഹം പറഞ്ഞിരുന്നു. ജീവന് ഭീഷണിയുണ്ടെന്നും പൊലീസ് സുരക്ഷ വേണമെന്നും ആവശ്യപ്പെട്ട് കോഴിക്കോട് പൊലീസ് കമ്മീഷണറെ കണ്ടതായും മനാഫ് അവകാശപ്പെട്ടു.

ധർമസ്ഥലയിൽ പെൺകുട്ടികളും സ്ത്രീകളും ബലാത്സംഗത്തിനിരയായി കൊല്ലപ്പെട്ടിട്ടുണ്ടെന്നും, അവരുടെ മൃതദേഹങ്ങൾ കുഴിച്ചുമൂടിയിട്ടുണ്ടെന്നും മുൻ ശുചീകരണ തൊഴിലാളി സി. എൻ. ചിന്നയ്യ നൽകിയ വെളിപ്പെടുത്തലിനെ തുടർന്നാണ് വിവാദങ്ങൾ വ്യാപിച്ചത്. ചിന്നയ്യ, കുഴിച്ചെടുത്തതായി പറഞ്ഞ അസ്ഥികളോടൊപ്പം ഒരു തലയോട്ടിയും പൊലീസ് സ്റ്റേഷനിൽ ഹാജരാക്കിയിരുന്നു. തുടർന്ന് ധർമസ്ഥലത്തിൽ നിരവധി പേർ കാണാതായതായി നിരവധി പരാതികളും ആരോപണങ്ങളും ഉയർന്നു.

സംഭവത്തെ തുടർന്ന് കർണാടക സർക്കാർ സ്‌പെഷ്യൽ ഇൻവെസ്റ്റിഗേഷൻ ടീം രൂപീകരിച്ചു. എസ്ഐടി നടത്തിയ അന്വേഷണത്തിൽ, ചിന്നയ്യ നൽകിയ തെളിവുകൾ വ്യാജമാണെന്ന് കണ്ടെത്തി. മൊഴിയിൽ പറഞ്ഞിടങ്ങളിൽ പരിശോധന നടത്തിയെങ്കിലും, രണ്ടിടങ്ങളിൽ നിന്നുമാത്രമാണ് അസ്ഥികൾ കണ്ടെത്തിയത്. തുടർന്ന് ഓഗസ്റ്റ് 23-ന് ചിന്നയ്യയെ അറസ്റ്റ് ചെയ്തു.

വ്യാജ പരാതി, അന്വേഷണ സംഘത്തെ തെറ്റിദ്ധരിപ്പിക്കൽ എന്നിവ ഉൾപ്പെടെ പത്ത് കുറ്റങ്ങൾ ചുമത്തിയാണ് അറസ്റ്റ് നടത്തിയത്. കളളസാക്ഷ്യം, വ്യാജ രേഖ നിർമ്മാണം, തെളിവുകൾ കെട്ടിച്ചമയ്ക്കൽ തുടങ്ങി നിരവധി വകുപ്പുകളാണ് ചുമത്തിയിരിക്കുന്നത്. ചിന്നയ്യ ചൂണ്ടിക്കാട്ടിയ സ്ഥലങ്ങളിൽ നിന്ന് കണ്ടെത്തിയ അസ്ഥികളെയും, ധർമസ്ഥലത്തിൽ നിന്ന് കാണാതായ പെൺകുട്ടികളുടെ അസ്വാഭാവിക മരണവുമായി ബന്ധപ്പെട്ട രേഖകളെയും കുറിച്ച് അന്വേഷണം തുടരുകയാണ്.

Tag: Lorry driver Manaf says evidence and statements submitted in Dharmasthala case are fabricated