”തന്റെ മേൽ ഉയർന്ന ലൈംഗികാരോപണങ്ങൾ ഗൂഢാലോചനയുടെ ഭാഗം”; റാപ്പർ വേടൻ

”തന്റെ മേൽ ഉയർന്ന ലൈംഗികാരോപണങ്ങൾ ഗൂഢാലോചനയുടെ ഭാഗമാണെന്നും അതിൽ യാതൊരു സംശയവുമില്ലെന്നും റാപ്പർ വേടൻ”. വേടനെ സ്ഥിരം കുറ്റവാളിയായി ചിത്രീകരിക്കാൻ ശ്രമം നടക്കുന്നുവെന്ന് ചൂണ്ടിക്കാട്ടി സഹോദരൻ മുഖ്യമന്ത്രിക്ക് നൽകിയ പരാതിയെ കുറിച്ചുള്ള മാധ്യമപ്രവർത്തകരുടെ ചോദ്യത്തിനായിരുന്നു വേടന്റെ മറുപടി.

“കേസുകൾ ഇപ്പോഴും നിലനിൽക്കുന്നതിനാൽ കൂടുതലൊന്നും പറയാനില്ല. എല്ലാം കഴിഞ്ഞതിന് ശേഷം ബാക്കി കാര്യങ്ങളെക്കുറിച്ച് സംസാരിക്കും. ഗൂഢാലോചന ഉറപ്പാണ്, അത് പിന്നീട് വിശദീകരിക്കാം,” എന്ന് വേടൻ പറഞ്ഞു. ഗവേഷക വിദ്യാർഥി നൽകിയ ലൈംഗികാതിക്രമ പരാതിയിൽ എറണാകുളം സെൻട്രൽ സ്റ്റേഷനിൽ ഹാജരായതിനിടെ അദ്ദേഹം മാധ്യമങ്ങളോട് പ്രതികരിച്ചു.

വേടനെതിരെയുള്ള കേസുകളും അവ മൂലം കുടുംബത്തിന് ഉണ്ടാകുന്ന മാനസിക സമ്മർദ്ദങ്ങളുമാണ് പരാതിയിൽ ചൂണ്ടിക്കാണിച്ചതെന്ന് സഹോദരൻ ഹരിദാസ് വ്യക്തമാക്കി. “ആദ്യമായാണ് ഇത്തരം അവസ്ഥ നേരിടുന്നത്. പരാതി നൽകിയ ശേഷവും പൊലീസിൽ നിന്ന് പ്രതികരണം ഉണ്ടായിട്ടില്ല. കുടുംബത്തെ ഇല്ലാതാക്കാനാണ് പരാതികളുടെ ലക്ഷ്യം,” എന്നും അദ്ദേഹം കൂട്ടിച്ചേർത്തു.

വിവാഹവാഗ്ദാനം നൽകി അഞ്ചുതവണ പീഡിപ്പിച്ചുവെന്ന യുവ ഡോക്ടറുടെ പരാതിയിൽ വേടനെ തൃക്കാക്കര പൊലീസ് ബുധനാഴ്ച അറസ്റ്റ് ചെയ്തിരുന്നു. മുൻകൂർ ജാമ്യമുണ്ടായതിനാൽ വൈദ്യ പരിശോധനയ്ക്ക് ശേഷം അദ്ദേഹത്തെ വിട്ടയച്ചു. വേടനെതിരെ ഡിജിറ്റൽ തെളിവുകൾ ഉൾപ്പെടെ ഉണ്ടെന്ന് അന്വേഷണ സംഘം അറിയിച്ചു.

അതേസമയം, എറണാകുളം സെൻട്രൽ പൊലീസ് രജിസ്റ്റർ ചെയ്ത ബലാത്സംഗക്കേസിൽ വേടന് കഴിഞ്ഞ ദിവസം അഡീഷണൽ സെഷൻസ് കോടതി മുൻകൂർ ജാമ്യം അനുവദിച്ചു. കേസുകൾക്കിടയിലും വേടൻ സംഗീത പരിപാടികളിൽ പങ്കെടുത്തു. കഴിഞ്ഞ ദിവസം പത്തനംതിട്ടയിലെ കോന്നിയിൽ നടന്ന പരിപാടിയിലായിരുന്നു അദ്ദേഹത്തിന്റെ സാന്നിധ്യം. “ഞാൻ എവിടെയും പോയിട്ടില്ല,” എന്നാണ് വേടന്റെ വേദിയിലേറ്റ പ്രതികരണം.

Tag: Rapper Vedan: ‘Sexual allegations against him are part of a conspiracy’