കെട്ടിച്ചമച്ച തെളിവുകളുടെ അടിസ്ഥാനത്തിൽ രജിസ്റ്റർ ചെയ്ത എഫ്‌ഐആർ; ഉമർ ഖാലിദ് കോടതിയിൽ
ഡൽഹി കലാപക്കേസിൽ ‘വിശാല ഗൂഢാലോചന’ കുറ്റം ചുമത്തിയതിന് എതിരെ ഉമർ ഖാലിദ് കോടതി സമീപിച്ചു. കെട്ടിച്ചമച്ച തെളിവുകളുടെ അടിസ്ഥാനത്തിൽ രജിസ്റ്റർ ചെയ്ത എഫ്‌ഐആറാണ് കേസിന്റെ അടിസ്ഥാനമെന്നും, അതൊരു “തമാശ” മാത്രമാണെന്നും, ആ തമാശയുടെ പേരിൽ തന്നെ അഞ്ചു വർഷമായി ജയിലിൽ കഴിയുകയാണെന്നും ഉമർ കോടതിയിൽ പറഞ്ഞു.
അഡീഷണൽ സെഷൻസ് ജഡ്ജി സമീർ ബാജ്പായിയുടെ സാന്നിധ്യത്തിലായിരുന്നു ഉമറിന്റെ വാദം. “ഒരു എഫ്‌ഐആറിന്റെ തമാശയിൽ ഞാൻ അഞ്ചു വർഷമായി കസ്റ്റഡിയിൽ കഴിയുന്നു. ഈ എഫ്‌ഐആറിന് നിയമത്തിന്റെ യാതൊരു പവിത്രതയുമില്ല,” എന്ന് ഉമറിന് വേണ്ടി ഹാജരായ അഭിഭാഷകൻ ത്രിദീപ് പൈസ് വ്യക്തമാക്കി.
ഡൽഹി പൊലീസിന്റെ പ്രത്യേക സെല്ലാണ് കേസ് അന്വേഷിക്കുന്നത്. കലാപത്തിൽ 51 പേർ കൊല്ലപ്പെട്ടുവെന്ന പ്രോസിക്യൂഷന്റെ വാദം അസംബന്ധമാണെന്നും, ആ മരണങ്ങളിൽ ഓരോന്നും പ്രത്യേകം അന്വേഷണം നടക്കുകയാണെന്നും അഭിഭാഷകൻ ചൂണ്ടിക്കാട്ടി. 751 വ്യത്യസ്ത എഫ്‌ഐആറുകളാണ് ഇതിനായി രജിസ്റ്റർ ചെയ്തതെന്നും, പിന്നീട് വ്യാജ രേഖകൾ സൃഷ്ടിച്ച് ഉമറിനെ ലക്ഷ്യംവച്ചാണ് കുറ്റപത്രം സമർപ്പിച്ചതെന്നും അദ്ദേഹം ആരോപിച്ചു.
കേസിന്റെ പരിഗണന സെപ്റ്റംബർ 17-ലേക്ക് മാറ്റി. 2020 സെപ്റ്റംബർ 13-നാണ് ഉമർ ഖാലിദ് അറസ്റ്റിലായത്. കഴിഞ്ഞ സെപ്റ്റംബർ 2-ന് അദ്ദേഹത്തിന്റെ ജാമ്യാപേക്ഷ വീണ്ടും കോടതി തള്ളി. കേസിലെ ഒൻപത് പ്രതികളുടെ ജാമ്യവും ഡൽഹി ഹൈക്കോടതി തള്ളിയിരുന്നു.
ഡൽഹി കലാപവുമായി ബന്ധപ്പെട്ട് ഗൂഢാലോചന നടത്തിയെന്ന ആരോപണത്തിന്റെ അടിസ്ഥാനത്തിൽ, യുഎപിഎ ചുമത്തി ഉമർ ഖാലിദിനെ അറസ്റ്റ് ചെയ്തിരുന്നു. പൗരത്വ ഭേദഗതി നിയമത്തിനെതിരെ നടന്ന സമരങ്ങൾക്ക് നേതൃത്വം നൽകിയതിന് പിന്നാലെയാണ് അദ്ദേഹത്തിനെതിരെ കലാപഗൂഢാലോചന കേസ് രജിസ്റ്റർ ചെയ്തത്.
Tag: FIR registered based on fabricated evidence; Umar Khalid in court
