കേസുകൾ പരിഗണിക്കുന്നതിനിടെ സുപ്രീംകോടതി ചീഫ് ജസ്റ്റിസിനും നേരെ ഷൂ എറിയാൻ ശ്രമം

സുപ്രീംകോടതി ചീഫ് ജസ്റ്റിസ് ബി.ആർ. ഗവായിയെ ലക്ഷ്യമിട്ട് കോടതി മുറിക്കുള്ളിൽ ഷൂ എറിയാൻ ശ്രമം നടന്നു. രാവിലെ ചീഫ് ജസ്റ്റിസിന്റെ നേതൃത്വത്തിലുള്ള ബെഞ്ച് കേസുകൾ പരിഗണിക്കുന്നതിനിടെ സംഭവമുണ്ടായി. അഭിഭാഷക വേഷം ധരിച്ചയാളാണ് ഷൂ എറിയാൻ ശ്രമിച്ചതെന്നാണ് ലഭ്യമായ വിവരം.

“സനാതന ധർമ്മത്തെ ബഹുമാനിക്കാത്തത് ഇന്ത്യ പൊറുക്കില്ല” എന്ന മുദ്രാവാക്യം മുഴക്കിയാണ് ഇയാൾ ചീഫ് ജസ്റ്റിസിന് നേരെ ഷൂ എറിയാൻ ശ്രമിച്ചത്. എന്നാൽ സുപ്രീംകോടതിയിലെ സുരക്ഷാ ജീവനക്കാർ ഉടൻ തന്നെ ഇയാളെ പിടിച്ചുമാറ്റി.

സംഭവത്തെ തുടർന്ന് കോടതി നടപടികൾ ഒരു നിമിഷം നിലച്ചുവെങ്കിലും ഉടൻ സാധാരണ നിലയിലേക്ക് മടങ്ങി. “ഇത് നമ്മളുടെ ശ്രദ്ധ തിരിക്കരുത്” എന്ന് പറഞ്ഞുകൊണ്ട് ചീഫ് ജസ്റ്റിസ് ബി.ആർ. ഗവായ് അടുത്ത അഭിഭാഷകനെ വാദം തുടരുമെന്ന് ആവശ്യപ്പെട്ടു.

ഇതിനിടെ, നിയമവാഴ്ചയെയാണ് ഇന്ത്യൻ നീതിന്യായ സംവിധാനത്തിന്റെ അടിസ്ഥാനം എന്ന് ചീഫ് ജസ്റ്റിസ് ഗവായ് അടുത്തിടെ മൗറീഷ്യസിൽ നടത്തിയ പ്രസംഗത്തിൽ വ്യക്തമാക്കിയിരുന്നു. “ഇന്ത്യൻ നിയമ വ്യവസ്ഥയെ നിയന്ത്രിക്കേണ്ടത് ബുൾഡോസറുകൾ അല്ല, നിയമവാഴ്ചയാണ്” എന്ന് അദ്ദേഹം പറഞ്ഞിരുന്നു.

കേസുകളിൽ പ്രതികളായവരുടെ വീടുകൾ ബുൾഡോസർ ഉപയോഗിച്ച് തകർക്കുന്നത് നിയമവാഴ്ചയെ ഇല്ലാതാക്കുന്നതും ഭരണഘടനയിലെ ആർട്ടിക്കിൾ 21 പ്രകാരമുള്ള ജീവിക്കാനുള്ള അവകാശത്തിന്റെ ലംഘനവുമാണെന്നും ഗവായ് ചൂണ്ടിക്കാട്ടിയിരുന്നു. എക്സിക്യൂട്ടീവ് അധികാരികൾക്ക് ജുഡീഷ്യറിയുടെ ചുമതലകൾ ഏറ്റെടുക്കാൻ അവകാശമില്ലെന്നും അദ്ദേഹം കൂട്ടിച്ചേർത്തിരുന്നു. ചീഫ് ജസ്റ്റിസിന്റെ ഈ പ്രസ്താവനയെ തുടർന്നാണ് യു.പി. സർക്കാരിന്റെ “ബുൾഡോസർ രാജ്” വിവാദം വീണ്ടും ചർച്ചയാകുന്നത്.

Tag: An attempt was made to throw a shoe at the Chief Justice of the Supreme Court while cases were being considered