ശബരിമലയിലെ ദ്വാരപാലക ശിൽപ്പങ്ങളിലെ സ്വർണപ്പാളിയിൽ നിന്നും സ്വർണം കാണാതായ സംഭവത്തിൽ കൂടുതൽ ഉദ്യോഗസ്ഥർക്കെതിരെ നടപടി
ശബരിമലയിലെ ദ്വാരപാലക ശിൽപ്പങ്ങളിലെ സ്വർണപ്പാളിയിൽ നിന്നും സ്വർണം കാണാതായ സംഭവത്തിൽ കൂടുതൽ ഉദ്യോഗസ്ഥർക്കെതിരെ നടപടി സ്വീകരിക്കാൻ തിരുവിതാംകൂർ ദേവസ്വം ബോർഡ് ഒരുങ്ങുന്നു. ദേവസ്വം പൊതുമരാമത്ത് അസിസ്റ്റന്റ് എഞ്ചിനീയർ സുനിൽ കുമാറിനെ സസ്‌പെൻഡ് ചെയ്യാനുള്ള നീക്കമാണ് നടക്കുന്നത്. അതോടൊപ്പം, ശബരിമല മുൻ എക്സിക്യൂട്ടീവ് ഓഫീസർ ഡി. സുധീഷ് കുമാറിന്റെയും തിരുവാഭരണ കമ്മീഷണർ കെ. എസ്. ബൈജുവിന്റെയും പെൻഷൻ തടയാനും ബോർഡ് ശ്രമിക്കുന്നു. ദേവസ്വം വിജിലൻസ് ഹൈക്കോടതിയിൽ അന്തിമ റിപ്പോർട്ട് സമർപ്പിച്ച ശേഷം വെള്ളിയാഴ്ചയാണ് നടപടി അന്തിമമാക്കുക.
2019-ൽ ദ്വാരപാലക ശിൽപ്പത്തിൽ നിന്നുള്ള സ്വർണം കാണാതായതായി കണ്ടെത്തിയപ്പോൾ അന്നത്തെ ശബരിമല അഡ്മിനിസ്ട്രേറ്റീവ് ഓഫീസറായിരുന്ന മുരാരി ബാബുവിനെ സസ്‌പെൻഡ് ചെയ്തിരുന്നു. ദേവസ്വം ബോർഡ് യോഗത്തിലാണ് തീരുമാനം. ഇന്നും നിർണായക ദേവസ്വം ബോർഡ് യോഗം തിരുവനന്തപുരം ആസ്ഥാനത്ത് തുടരുകയാണ്.
2019-ൽ സ്വർണപ്പാളി അഴിച്ചുനോക്കിയപ്പോൾ അന്നത്തെ അഡ്മിനിസ്ട്രേറ്റീവ് ഓഫീസറായിരുന്ന മുരാരി ബാബു, ഇപ്പോൾ എക്സിക്യൂട്ടീവ് ഓഫീസറാണ്. അന്ന് താൻ തയ്യാറാക്കിയ മഹ്സറിൽ “അഴിച്ചെടുത്തത് ചെമ്പ് പാളിയാണെന്ന്” മുരാരി ബാബു രേഖപ്പെടുത്തി. എന്നാൽ, തന്ത്രിയുടെ നിർദേശപ്രകാരം സ്വർണത്തിൽ ചെമ്പ് തെളിഞ്ഞതായി എഴുതിയതാണെന്ന് അദ്ദേഹം പിന്നീട് വിശദീകരിച്ചു.
അതേസമയം, മുരാരി ബാബുവിനെതിരെ കൂടുതൽ ക്രമക്കേട് ആരോപണങ്ങളും ഉയർന്നിട്ടുണ്ട്. ഏറ്റുമാനൂർ ക്ഷേത്രത്തിലെ സ്വർണ രുദ്രാക്ഷമാല കാണാതായ സംഭവത്തിൽ അദ്ദേഹത്തിന് പങ്കുണ്ടെന്ന സംശയമാണ് ദേവസ്വം വിജിലൻസ് റിപ്പോർട്ടിൽ ഉയർത്തിയിരിക്കുന്നത്. 2021-ൽ ക്ഷേത്രത്തിൽ തീപിടുത്തം സംഭവിച്ചതും അത് മറച്ചുവെച്ചതുമാണ് മറ്റൊരു ആരോപണം. കൂടാതെ, ഭക്തരിൽ നിന്ന് രസീത് നൽകാതെ പണം സ്വീകരിച്ചതായും കണ്ടെത്തിയിരുന്നു. സംഭവസമയത്ത് മുരാരി ബാബു ഏറ്റുമാനൂർ ക്ഷേത്രത്തിലെ അഡ്മിനിസ്ട്രേറ്റീവ് ഓഫീസറായിരുന്നു. 2022-ൽ അദ്ദേഹത്തിനെതിരെ നടപടിക്ക് ശുപാർശ ചെയ്യുന്നതിനോടൊപ്പം അക്കൗണ്ട് ഓഡിറ്റ് നടത്താനും നിർദേശിച്ചിരുന്നു. എന്നാൽ റിപ്പോർട്ടിൽ യാതൊരു നടപടിയും കൈക്കൊള്ളാതെ ദേവസ്വം ബോർഡ് അതിനെ അവഗണിച്ചതായി ആരോപണം ഉയർന്നിട്ടുണ്ട്.
Tag: Action against more officials in the incident of gold missing from the gold plating of the Dwarpalaka sculptures in Sabarimala
