ഡോക്ടര്‍ക്കെതിരെയുണ്ടായ ആക്രമണത്തില്‍ അപലപിച്ച് ആരോഗ്യമന്ത്രി വീണാ ജോര്‍ജോര്‍ജ്; സംഭവത്തില്‍ ശക്തമായ നിയമ നടപടി സ്വീകരിക്കുമെന്ന് മന്ത്രി

താമരശ്ശേരി താലൂക്ക് ആശുപത്രിയില്‍ ഡോക്ടര്‍ക്കെതിരെ നടന്ന ആക്രമണത്തെ ശക്തമായി അപലപിച്ച് ആരോഗ്യ മന്ത്രി വീണാ ജോര്‍ജ്. ഡോക്ടര്‍ക്കെതിരായ ആക്രമണം “അത്യന്തം അപലപനീയവും മനുഷ്യ മനസ്സിനെ ഞെട്ടിക്കുന്നതുമാണ്” എന്ന് മന്ത്രി പ്രസ്താവനയില്‍ വ്യക്തമാക്കി. സംഭവത്തില്‍ കര്‍ശനമായ നിയമനടപടികള്‍ സ്വീകരിക്കുമെന്നും വീണാ ജോര്‍ജ് വ്യക്തമാക്കി.

താമരശ്ശേരി താലൂക്ക് ആശുപത്രിയിലെ ഡോക്ടര്‍ വിപിന്റെ തലക്കാണ് വെട്ടേറ്റത്. അമീബിക് മസ്തിഷ്ക ജ്വരം ബാധിച്ച് മരിച്ച ഒന്‍പത് വയസുകാരിയുടെ പിതാവ് സനൂപാണ് ആക്രമണം നടത്തിയത്. മകളുടെ മരണത്തിന് ആശുപത്രി ജീവനക്കാരാണ് ഉത്തരവാദികളെന്ന് ആരോപിച്ചായിരുന്നു ഇയാളുടെ അതിക്രമം. “മകളെ കൊന്നില്ലേ?” എന്നാരോപിച്ച് സനൂപ് ഡോക്ടറെ നേരിട്ട് ആക്രമിച്ചു.

സനൂപിനെ പൊലീസ് കസ്റ്റഡിയിലെടുത്തിട്ടുണ്ട്. ഇയാള്‍ രണ്ട് മക്കളോടൊപ്പം ആശുപത്രിയിലെത്തി. ആദ്യം ആശുപത്രി സൂപ്രണ്ടിനെ ലക്ഷ്യംവെച്ചായിരുന്നു ആക്രമണം ആസൂത്രണം ചെയ്തിരുന്നത്. സൂപ്രണ്ട് മുറിയില്‍ ഇല്ലാത്തതിനാല്‍ സനൂപ് ഡോക്ടര്‍ വിപിനെ ആക്രമിച്ചു. പരിക്കേറ്റ ഡോക്ടറെ ആദ്യം താലൂക്ക് ആശുപത്രിയില്‍ തന്നെ ചികിത്സയ്ക്ക് വിധേയനാക്കിയ ശേഷം കോഴിക്കോട് ബേബി മെമ്മോറിയല്‍ ആശുപത്രിയിലേക്ക് മാറ്റി.

സനൂപിന്റെ മകള്‍ അനയ പനി ബാധിച്ചതിനെ തുടര്‍ന്ന് ആദ്യം താമരശ്ശേരി താലൂക്ക് ആശുപത്രിയിലായിരുന്നു ചികിത്സയില്‍. അവിടെ അവസ്ഥ വഷളായതോടെ മെഡിക്കല്‍ കോളേജിലേക്ക് റഫര്‍ ചെയ്തെങ്കിലും, മരുന്നുവഴിയില്‍ അനയ മരിച്ചു. കുട്ടിയുടെ മരണകാരണം വ്യക്തമാക്കിയിട്ടില്ലെന്നും, മരണ സര്‍ട്ടിഫിക്കറ്റ് നല്‍കിയില്ലെന്നും കുടുംബം ആരോപിച്ചു.

ആശുപത്രി ലാബ് ജീവനക്കാരന്‍ മാധ്യമങ്ങളോട് പറഞ്ഞതനുസരിച്ച്, “ആക്രമണം അത്യന്തം പെട്ടെന്നായിരുന്നു. ‘എന്റെ മകളെ കൊന്നവനല്ലേ?’ എന്ന് വിളിച്ചാണ് ഇയാള്‍ ഡോക്ടറെ വെട്ടിയത്. ഡോക്ടറുടെ തലയില്‍ ഗുരുതരമായി മുറിവേറ്റിട്ടുണ്ട്,” എന്നും വ്യക്തമാക്കി.

പൊലീസ് അന്വേഷണം പുരോഗമിക്കുകയാണ്. ആരോഗ്യവകുപ്പ് ആശുപത്രികളിലെ സുരക്ഷാ ക്രമങ്ങള്‍ ശക്തമാക്കാനും, ഡോക്ടര്‍മാര്‍ക്ക് നേരെയുള്ള ആക്രമണങ്ങള്‍ തടയുന്നതിനുള്ള അടിയന്തര നടപടികള്‍ ആവിഷ്‌കരിക്കാനും നീക്കം തുടങ്ങിയിട്ടുണ്ട്.

Tag: Health Minister Veena George condemns attack on doctor