ശബരിമലയിലെ യോഗദണ്ഡിന്റെ അറ്റകുറ്റപ്പണികളിലും ദുരൂഹത; ദേവസ്വം ബോർഡ് വിശദീകരണം വിവാദത്തിൽ

ശബരിമലയിലെ യോഗദണ്ഡിന്റെയും രുദ്രാക്ഷമാലയുടെയും അറ്റകുറ്റപ്പണികളെ ചുറ്റിപ്പറ്റി പുതിയ ദുരൂഹതകൾ ഉയരുന്നു. അന്നത്തെ ദേവസ്വം ബോർഡ് പ്രസിഡന്റ് എ. പത്മകുമാറിന്റെ മകൻ ജയശങ്കർ പത്മകുമാറിനാണ് ഈ വിലമതിക്കാനാവാത്ത ദേവോപകരണങ്ങളുടെ സ്വർണം പൂശാനുള്ള ചുമതല നൽകിയിരുന്നത്. എന്നാൽ, ഏത് മാനദണ്ഡത്തിന്റെ അടിസ്ഥാനത്തിലാണ് ഈ ചുമതല അദ്ദേഹത്തിന് നൽകിയതെന്നും, ഹൈക്കോടതിയുടെ അനുമതി ലഭിച്ചിരുന്നോ എന്നതും ഇപ്പോഴും വ്യക്തമായിട്ടില്ല.

ശ്രീകോവിലിനുള്ളിലെ ഗർഭഗൃഹത്തിൽ സൂക്ഷിക്കുന്ന യോഗദണ്ഡും രുദ്രാക്ഷമാലയും അറ്റകുറ്റപ്പണിക്കായി ക്ഷേത്രത്തിന് പുറത്തേക്ക് കൊണ്ടുപോയോ എന്നതിലും വ്യക്തതയില്ല. 2019-ൽ ദ്വാരപാലക ശില്പങ്ങളിലെ പാളികൾ പുനർനിർമ്മിച്ചതിന് തൊട്ടുമുമ്പാണ് യോഗദണ്ഡിന്റെ അറ്റകുറ്റപ്പണി നടന്നത്.

ദേവസ്വം ബോർഡ് സന്നിധാനത്തുതന്നെ സ്വർണം ചുറ്റുന്ന പ്രവൃത്തി നടന്നതാണെന്ന് വ്യക്തമാക്കിയിട്ടുണ്ടെങ്കിലും, രേഖകളിൽ സ്ഥലം സംബന്ധിച്ച വ്യക്തമായ വിവരങ്ങൾ ഉൾപ്പെടുത്തിയിട്ടില്ല. ബോർഡിന്റെ 2019-ലെ തീരുമാനപ്രകാരം തന്നെ യോഗദണ്ഡും രുദ്രാക്ഷമാലയും പുറത്തെടുത്തതായാണ് രേഖകൾ കാണിക്കുന്നത്.

അതേസമയം, വിഷയത്തിൽ യാതൊരു അവ്യക്തതയുമില്ലെന്ന് എ. പത്മകുമാർ വ്യക്തമാക്കി. “തടികൊണ്ടുള്ള യോഗദണ്ഡിനെ വൃത്തിയാക്കണമെന്ന് തന്ത്രി പറഞ്ഞതിനെത്തുടർന്ന്, വിശ്വാസിയായ എന്റെ മകനെ ഞാൻ അത് ഏൽപ്പിച്ചു. ചിലവ് മുഴുവൻ അവന്റെതാണ്. ശബരിമലയിൽ തന്നെയാണ് അറ്റകുറ്റപ്പണി നടന്നത്” എന്നും അദ്ദേഹം വിശദീകരിച്ചു.

Tag: There is also a mystery in the maintenance of the yoga pole in Sabarimala; Devaswom Board’s explanation is in controversy