നെന്മാറ സജിത കൊലക്കേസിൽ പ്രതി ചെന്താമര കുറ്റക്കാരനാണെന്ന് കോടതി; ശിക്ഷാ വിധി മറ്റന്നാൾ

നെന്മാറ പോത്തുണ്ടി സജിത കൊലക്കേസിൽ പ്രതി ചെന്താമര കുറ്റക്കാരനാണെന്ന് പാലക്കാട് നാലാം അഡീഷണൽ ജില്ലാ കോടതി വിധിച്ചു. കൊലക്കുറ്റം, തെളിവ് നശിപ്പിക്കൽ, വീട്ടിൽ അതിക്രമിച്ച് കയറൽ തുടങ്ങിയ എല്ലാ കുറ്റങ്ങളും പ്രതിക്കെതിരെ തെളിഞ്ഞുവെന്ന് കോടതി നിരീക്ഷിച്ചു. ശിക്ഷാ വിധി ഒക്ടോബർ 16-ന് പ്രഖ്യാപിക്കും.

കോടതി പ്രതിയോട് “എന്തെങ്കിലും പറയാനുണ്ടോ?” എന്ന് ചോദിച്ചപ്പോൾ, ചെന്താമര മറുപടി നൽകാതെ നിശ്ചലമായി നിന്നു. വിധി കേൾക്കുമ്പോഴും, പിന്നീട് പുറത്തേക്ക് കൊണ്ടുപോകുമ്പോഴും, അദ്ദേഹത്തിന്റെ മുഖത്ത് യാതൊരു വികാരവ്യത്യാസവും കാണാനായില്ല.

സജിതയുടെ മക്കളായ അതുല്യയും അഖിലയും വിധി കേൾക്കാൻ കോടതിയിലെത്തി. “പ്രതി പുറത്തിറങ്ങിയാൽ ഞങ്ങളുടെ ജീവന് ഭീഷണിയുണ്ടാകും; പരമാവധി ശിക്ഷ ലഭിക്കണം” എന്നായിരുന്നു അവരുടെ ആവശ്യം.

സജിത കൊലക്കേസിൽ റിമാൻഡിലായിരുന്ന ചെന്താമര ജാമ്യത്തിൽ പുറത്തിറങ്ങിയശേഷം നടത്തിയ ഇരട്ട കൊലപാതകമാണ് കേരളത്തെ ഞെട്ടിച്ചത്. അതിന് പിന്നാലെയാണ് ആറ് വർഷങ്ങൾക്ക് ശേഷം ഈ കേസിലെ വിചാരണ പൂർത്തിയാക്കി കോടതി വിധി പ്രസ്താവിച്ചത്.

2019 ഓഗസ്റ്റ് 31-ന് നെന്മാറ പോത്തുണ്ടി തിരുത്തമ്പാടം ബോയൻസ് കോളനിയിലെ സജിതയുടെ വീട്ടിൽ കയറി ചെന്താമരാക്ഷൻ (ചെന്താമര) ക്രൂരമായി വെട്ടിക്കൊന്നു. ഭാര്യ പിണങ്ങി പോകാൻ സജിത കാരണക്കാരിയാണെന്ന് സംശയിച്ചതാണ് കൊലപാതകത്തിന് പിന്നിൽ.

പ്രതിയുടെ ഭാര്യ അടക്കം അൻപത് സാക്ഷികളുടെ മൊഴികളും ശക്തമായ സാഹചര്യ തെളിവുകളും കേസിൽ നിർണായകമായി. കൊല നടന്ന ദിവസം സജിത വീട്ടിൽ ഒറ്റയ്ക്കായിരുന്നു — മക്കൾ സ്കൂളിലേക്കും ഭർത്താവ് സുധാകരൻ ലോറിയുമായി തമിഴ്നാട്ടിലേക്കും പോയിരുന്നതിനാൽ പ്രതിക്ക് അവസരം ലഭിച്ചു.

ഈ കേസിൽ കോടതി വിധി പ്രഖ്യാപിച്ചതോടെ, ചെന്താമര പ്രതിയായ നെന്മാറ ഇരട്ടകൊലപാതകക്കേസിന്റെ വിചാരണ നടപടികൾ ഉടൻ ആരംഭിക്കാനാണ് നീക്കം.

Tag: Court finds Chenthamara guilty in Nenmara Sajitha murder case; sentencing to be announced the next day