ശബരിമലയും മാളികപ്പുറവും മേൽശാന്തിമാരെ തെരഞ്ഞെടുത്തു; പ്രസാദ് ഇ.ഡി. ശബരിമല മേൽശാന്തി

ശബരിമലയും മാളികപ്പുറവും മേൽശാന്തിമാരെ തെരഞ്ഞെടുത്തു. തൃശൂർ ചാലക്കുടി ഏറന്നൂർ മനയിലെ പ്രസാദ് ഇ.ഡി. ശബരിമല മേൽശാന്തിയായി തിരഞ്ഞെടുക്കപ്പെട്ടു. നിലവിൽ ആറേശ്വരം ശ്രീധർമ്മശാസ്ത ക്ഷേത്രത്തിലെ പൂജാരിയായ ഇദ്ദേഹത്തെ 14 പേരുടെ പട്ടികയിൽ നിന്നാണ് തെരഞ്ഞെടുത്തത്. പട്ടികയിലെ ഒൻപതാമനായ ഇദ്ദേഹത്തിന്റെ പേര് പന്തളം കൊട്ടാരത്തിലെ കശ്യപ് വർമ്മ നറുക്കെടുത്തു. ഹൈക്കോടതിയുടെ കർശന മേൽനോട്ടത്തിലാണ് നറുക്കെടുപ്പ് നടന്നത്.

മാളികപ്പുറം മേൽശാന്തിയായി കൊല്ലം കൂട്ടിക്കട സ്വദേശിയായ എം.ജി. മനു നമ്പൂതിരി തെരഞ്ഞെടുക്കപ്പെട്ടു. മൈഥിലി വർമ്മയാണ് നറുക്കെടുത്തത്. 13 പേരുടെ ചുരുക്കപ്പട്ടികയിൽ നിന്നാണ് മനു നമ്പൂതിരിയെ തെരഞ്ഞെടുത്തത്. ജീവിതത്തിലെ വലിയൊരു ആഗ്രഹമായിരുന്നുവെന്നും അത്യന്തം സന്തോഷമുണ്ടെന്നും അദ്ദേഹം പ്രതികരിച്ചു. ഈ ഉത്തരവാദിത്വം ആത്മാർത്ഥമായും ഭക്തിപൂർവ്വകമായും നിറവേറ്റാനാണ് താത്പര്യമെന്നും മനു നമ്പൂതിരി വ്യക്തമാക്കി. അത്യപൂർവമായൊരു ഭാഗ്യമെന്ന നിലയിലാണ് ഇദ്ദേഹം ഇതിനെ കാണുന്നത്.

അതേസമയം, വിവാദങ്ങൾക്കിടയിലും ശബരിമലയിൽ വൻ ഭക്തജനത്തിരക്കാണ് അനുഭവപ്പെടുന്നത്. നടപ്പന്തലിൽ തീർത്ഥാടകരുടെ നീണ്ട നിരകൾ കാണാം. ഇന്ന് ഏകദേശം അൻപതിനായിരം പേർ വെർച്വൽ ക്യൂ വഴി ദർശനത്തിന് ബുക്ക് ചെയ്തിട്ടുണ്ട്.

Tag: Sabarimala and Malikappuram have elected their Melsanthi; Prasad E.D. Sabarimala Melsanthi