കടയ്ക്കലിൽ സിപിഐയിൽ കൂട്ടരാജി; 700-ലധികം പാർട്ടി പ്രവർത്തകർ രാജിവെച്ചിട്ടുണ്ടെന്ന് നേതാക്കൾ

കടയ്ക്കലിൽ സിപിഐയിൽ കൂട്ടരാജി. ജില്ലാ കൗൺസിൽ അംഗം ജെ. സി. അനിൽയുടെ നേതൃത്വത്തിലുള്ള സംഘമാണ് പാർട്ടി വിടുന്നത്. മന്ത്രി ജെ. ചിഞ്ചുറാണിയുടെ ചടയമംഗലം നിയോജകമണ്ഡലത്തിലാണ് ഈ കൂട്ടരാജി നടന്നത്. 10 മണ്ഡലം കമ്മിറ്റി അംഗങ്ങളും, 45 ലോക്കൽ കമ്മിറ്റി അംഗങ്ങളും, 48 ബ്രാഞ്ച് സെക്രട്ടറിമാരും, 9 ബ്ലോക്ക്-ഗ്രാമപഞ്ചായത്ത് അംഗങ്ങളും ഉൾപ്പെടെ നിരവധി നേതാക്കളാണ് രാജി സമർപ്പിച്ചത്.

700-ലധികം പാർട്ടി പ്രവർത്തകർ രാജിവെച്ചിട്ടുണ്ടെന്ന് നേതാക്കൾ അവകാശപ്പെട്ടു. ഉൾപാർട്ടി തർക്കങ്ങളാണ് തീരുമാനത്തിന് കാരണമെന്ന് രാജിവെച്ചവർ വ്യക്തമാക്കി. അതേസമയം, പാർട്ടി വിട്ടവർ സിപിഎമ്മിൽ ചേരാൻ സാധ്യതയുണ്ടെന്ന സൂചനകളുമുണ്ട്.

സംസ്ഥാനത്ത് സിപിഐയ്ക്ക് ഏറ്റവും ശക്തമായ വേരോട്ടമുള്ള ജില്ലകളിലൊന്നാണ് കൊല്ലം. പാർട്ടിക്കുള്ളിലെ ആഭ്യന്തര പ്രശ്നങ്ങൾ പരിഹരിക്കാൻ സംസ്ഥാന നേതൃത്വം കഴിഞ്ഞ ദിവസം യോഗം ചേർന്നിരുന്നെങ്കിലും, ജില്ലാ നേതാക്കൾ യോഗത്തിൽ നിന്ന് വിട്ടുനിന്നത് സംഘർഷം കൂടുതൽ രൂക്ഷമാക്കി. അതിന്റെ പിന്നാലെയാണ് കൂട്ടരാജി പൊട്ടിപ്പുറപ്പെട്ടത്.

Tag: Mass resignations in CPI in Kadakkal; Leaders say over 700 party workers have resigned