ശബരിമല സ്വർണക്കൊള്ള; ഉണ്ണികൃഷ്ണൻ പോറ്റിയുടെ സുഹൃത്ത് അനന്ത സുബ്രഹ്മണ്യനെ ചോദ്യം ചെയ്ത് വിട്ടയച്ചു

ശബരിമല സ്വർണക്കൊള്ള കേസിൽ ചോദ്യം ചെയ്യപ്പെട്ട സ്പോൺസർ ഉണ്ണികൃഷ്ണൻ പോറ്റിയുടെ സുഹൃത്ത് അനന്ത സുബ്രഹ്മണ്യനെ അന്വേഷണ സംഘം വിട്ടയച്ചു. കഴിഞ്ഞ രാത്രിയോടെ ചോദ്യം ചെയ്യലിന് ശേഷം നോട്ടീസ് നൽകി വിട്ടയച്ചതാണെന്ന് പ്രത്യേക അന്വേഷണ സംഘം (എസ്ഐടി) വ്യക്തമാക്കി. അനന്ത സുബ്രഹ്മണ്യനെ ഇന്നലെയാണ് ചോദ്യം ചെയ്യാനായി വിളിപ്പിച്ചത്.

ദ്വാരപാലക ശില്പങ്ങളുടെ പാളികൾ സന്നിധാനത്തിൽ നിന്ന് പുറത്തുകൊണ്ടുപോയത് അനന്ത സുബ്രഹ്മണ്യൻ തന്നെയാണെന്ന് അന്വേഷണ സംഘം കണ്ടെത്തിയിരുന്നു. പിന്നീട് അവൻ പാളികൾ നാഗേഷിന് കൈമാറുകയായിരുന്നു. ശബരിമല സന്നിധാനത്ത് നടന്നത് സ്വർണക്കവർച്ച തന്നെയാണെന്ന് എസ്ഐടി ഹൈക്കോടതിയിൽ സമർപ്പിക്കാനിരിക്കുന്ന അന്വേഷണ പുരോഗതി റിപ്പോർട്ടിൽ വ്യക്തമാക്കും.

1998-ൽ വ്യവസായി വിജയ് മല്യ സ്വർണം പൊതിഞ്ഞ ദ്വാരപാലക ശിൽപങ്ങൾ സമർപ്പിച്ചിരുന്നു. ഇതിൽ നിന്നും സ്വർണം പൂട്ടി മാറ്റി പകരം പൊൻ പൂശിയതായാണ് എസ്ഐടിയുടെ കണ്ടെത്തൽ. ഒന്നാം പ്രതിയായ ഉണ്ണികൃഷ്ണൻ പോറ്റിയും കൂട്ടുപ്രതികളും ഗൂഢാലോചനയിലൂടെ കവർച്ച ആസൂത്രണം ചെയ്തതാണെന്ന് സംഘം കണ്ടെത്തിയിട്ടുണ്ട്. പോറ്റിയെ ഇതിനകം അറസ്റ്റ് ചെയ്തിട്ടുണ്ടെന്നും കൂടുതൽ അറസ്റ്റുകൾ ഉണ്ടാകാനിടയുണ്ടെന്നും എസ്ഐടി ഇന്ന് കോടതിയെ അറിയിക്കും.

ഇന്ന് മുതൽ ശബരിമല സ്വർണക്കൊള്ള സംബന്ധിച്ച ഹർജിയുടെ വിചാരണ ഹൈക്കോടതിയിലെ അടച്ചിട്ട കോടതി മുറിയിലായിരിക്കും നടക്കുക. ദേവസ്വം ബെഞ്ചാണ് കേസ് പരിഗണിക്കുന്നത്. പ്രതി സമർപ്പിച്ച രണ്ടാമത്തെ ഹർജിയും ഇന്നുതന്നെ ഒന്നാമത്തെ ഐറ്റമായി പരിഗണിക്കും. അന്വേഷണ പുരോഗതി റിപ്പോർട്ട് രണ്ടാഴ്ച കൂടുമ്പോഴൊരിക്കൽ നൽകണമെന്ന നിർദ്ദേശം മുമ്പ് ദേവസ്വം ബെഞ്ച് നൽകിയിരുന്നു.

അതേസമയം, അനന്ത സുബ്രഹ്മണ്യനെ ചോദ്യം ചെയ്യൽ തുടരുകയാണെന്ന് അന്വേഷണ സംഘം അറിയിച്ചു. 2019-ൽ സ്വർണം പൂശുന്നതിനായി ദ്വാരപാലക ശില്പങ്ങളുടെ പാളികൾ ശബരിമലയിൽ നിന്ന് ഏറ്റുവാങ്ങി ബംഗളൂരുവിലേക്ക് കൊണ്ടുപോയതും തുടർന്ന് ചെന്നൈയിലെ സ്മാർട്ട് ക്രിയേഷൻസിലേക്ക് കൊണ്ടുപോകുന്നതിനിടെ സ്വർണം കവർന്നതുമാണ് എസ്ഐടിയുടെ നിഗമനം. നാഗേഷ്, കൽപ്പേഷ് തുടങ്ങിയ കൂട്ടുപ്രതികളിലേക്കാണ് ഇപ്പോൾ അന്വേഷണം നീങ്ങുന്നത്.

ഇഞ്ചക്കലിലെ ക്രൈം ബ്രാഞ്ച് ഓഫീസിലാണ് അനന്ത സുബ്രഹ്മണ്യനെ കഴിഞ്ഞ ദിവസം മുഴുവൻ ചോദ്യം ചെയ്തത്. അന്വേഷണ പുരോഗതി റിപ്പോർട്ട് ഇന്ന് ഹൈക്കോടതിയിൽ സമർപ്പിക്കുമെന്ന് എസ്ഐടി വ്യക്തമാക്കി. ഉണ്ണികൃഷ്ണൻ പോറ്റിയിൽ നിന്ന് ലഭിച്ച വിവരങ്ങളും, ദേവസ്വം ബോർഡിലെ ചില ഉദ്യോഗസ്ഥരുടെയും ഉന്നതരുടെയും പങ്കിനെക്കുറിച്ചുള്ള മൊഴികളും റിപ്പോർട്ടിൽ ഉൾപ്പെടാനിടയുണ്ട്.

Tag: Sabarimala gold theft; Unnikrishnan Potty’s friend Anantha Subramanian questioned and released