കൊല്ലത്ത് സിപിഐയിൽ വീണ്ടും പൊട്ടിത്തെറി; പാർട്ടിയിൽ നിന്ന് കൂടുതൽ പേർ പുറത്തേക്ക്

കൊല്ലത്ത് സിപിഐയിൽ വീണ്ടും പൊട്ടിത്തെറി. പാർട്ടിയിൽ നിന്ന് കൂടുതൽ പേർ പുറത്തേക്ക്. ദേശീയ നേതാവിന്റെ വിശ്വസ്തനടക്കം നൂറോളം പ്രവർത്തകർ കോൺഗ്രസിലേക്ക് ചേർക്കാൻ ഒരുങ്ങുകയാണ്. സിപിഐ ദേശീയ സെക്രട്ടറിയേറ്റ് അംഗം അഡ്വ. കെ. പ്രകാശ് ബാബുവിന്റെ അടുത്ത അനുയായി നാസറടക്കമുള്ളവരാണ് പാർട്ടി വിടുന്നത്.

കുന്നിക്കോട് മണ്ഡലം കമ്മിറ്റിക്ക് കീഴിലുള്ള നിരവധി നേതാക്കളും പ്രവർത്തകരും രാജിയ്ക്ക് ഒരുങ്ങിയിരിക്കുകയാണ്. സിപിഐയിൽ നിന്ന് മാറിയെത്തുന്നവരെ കോൺഗ്രസ് പ്രവർത്തകസമിതി അംഗവും എംപിയുമായ കൊടിക്കുന്നിൽ സുരേഷ് ഇന്ന് സ്വീകരിക്കും.

കൊല്ലത്തിന് പിന്നാലെ തിരുവനന്തപുരത്തും പത്തനംതിട്ടയിലും സിപിഐയിൽ നിന്ന് കൂട്ടരാജി ഉണ്ടായി. തിരുവനന്തപുരത്തെ മീനാങ്കൽ പ്രദേശത്ത് നിന്നുമാത്രം നൂറോളം പേർ പാർട്ടി വിട്ടു. മുൻ സംസ്ഥാന കൗൺസിൽ അംഗവും എഐടിയുസി ജില്ലാ ജനറൽ സെക്രട്ടറിയുമായിരുന്ന മീനാങ്കൽ കുമാറിനെ പുറത്താക്കിയതിനെതിരെ ആയിരുന്നു പ്രതിഷേധ രാജി. മീനാങ്കൽ എ, ബി ബ്രാഞ്ചുകളിലെ 40 പേർ, എഐടിയുസി ഹെഡ്‌ലോഡ് യൂണിയനിലെ 30 പേർ, എഐവൈഎഫ്, എഐഎസ്എഫ്, മഹിളാ ഫെഡറേഷൻ തുടങ്ങിയ സംഘടനകളിലെ അംഗങ്ങൾ എന്നിവർ രാജിവെച്ചു. പാർട്ടി ലൊക്കൽ കമ്മിറ്റി അംഗങ്ങളും ഇതിൽ ഉൾപ്പെടുന്നു.

പത്തനംതിട്ടയിലെ ചെന്നീർക്കരയിലും മന്ത്രി ജി.ആർ. അനിലിനെതിരായ അസന്തോഷം പ്രകടമായി. അവിടെ സിപിഐ ലൊക്കൽ സെക്രട്ടറി അടക്കം 16 പേർ രാജിവെച്ച് സിപിഎംയിൽ ചേർന്നു.

കൊല്ലം ജില്ലയിലെ കുണ്ടറയിലും കടയ്ക്കലിലും തുടങ്ങിയ ആഭ്യന്തര പ്രശ്നങ്ങൾ ഇപ്പോൾ മറ്റു ജില്ലകളിലേക്കും വ്യാപിക്കുകയാണ്. ജില്ലാ സെക്രട്ടറി പി. എസ്. സുപാലിന്റെ ഏകപക്ഷീയ നിലപാടുകളാണ് ഈ മേഖലകളിൽ സംഘർഷങ്ങൾക്കു കാരണം എന്നു പാർട്ടി അകത്ത് ചൂണ്ടിക്കാണിക്കുന്നു. മൊത്തത്തിൽ കൊല്ലം, തിരുവനന്തപുരം, പത്തനംതിട്ട ജില്ലകളിലൊട്ടാകെ നടക്കുന്ന ഈ കൂട്ടരാജികൾ സിപിഐയ്ക്ക് സംസ്ഥാനതലത്തിൽ വലിയ തിരിച്ചടിയായിരിക്കുകയാണ്.

Tag: Another explosion in CPI in Kollam; More people leave the party