ഡൽഹിയിൽ പൊലീസ് – ഗുണ്ട ഏറ്റുമുട്ടൽ; ബിഹാറിൽ നിന്നുള്ള നാല് കുപ്രസിദ്ധ ഗുണ്ടകൾ കൊല്ലപ്പെട്ടു
വ്യാഴാഴ്ച പുലർച്ചെ ഡൽഹിയിൽ നടന്ന പൊലീസ് ഏറ്റുമുട്ടലിൽ ബിഹാറിൽ നിന്നുള്ള നാല് കുപ്രസിദ്ധ ഗുണ്ടകൾ കൊല്ലപ്പെട്ടു. പ്രശസ്തമായ ‘സിഗ്മാ ഗാങ്’യിലെ അംഗങ്ങളായ ഇവരെ പൊലീസ് എൻകൗണ്ടറിലാണ് വധിച്ചത്. ബിഹാർ നിയമസഭാ തിരഞ്ഞെടുപ്പിന് മുന്നോടിയായി സംഘം വൻ ഗൂഢാലോചന നടത്തുകയായിരുന്നുവെന്നാണ് പൊലീസിന്റെ ആരോപണം. നിരവധി കേസുകളിൽ പ്രതികളായ ഇവർ ബിഹാറിലെ ഗുണ്ടാ ലിസ്റ്റിൽ പ്രധാന സ്ഥാനക്കാരായിരുന്നു.
എറ്റുമുട്ടൽ വടക്കുപടിഞ്ഞാറൻ ഡൽഹിയിലെ രോഹിണി മേഖലയിലാണ് പുലർച്ചെ 2.20ഓടെ നടന്നത്. രക്ഷപ്പെടാൻ ശ്രമിച്ച സംഘം പൊലീസിനെതിരെ വെടിയുതിർക്കുകയായിരുന്നു. പൊലീസ് തിരിച്ചടിച്ചതിനെ തുടർന്നാണ് ഏറ്റുമുട്ടൽ ഉണ്ടായത് എന്ന് പൊലീസ് വൃത്തങ്ങൾ അറിയിച്ചു. വെടിയേറ്റ നാലുപേരെയും രോഹിണിയിലെ ഡോ. ബാബാ സാഹിബ് അംബേദ്കർ ആശുപത്രിയിൽ പ്രവേശിപ്പിച്ചെങ്കിലും അവർ പിന്നീട് മരിച്ചു.
രഞ്ജൻ പഥക് (25), ബിംലേഷ് മഹ്തോ (25), മനീഷ് പഥക് (33), അമൻ താക്കൂർ (21) എന്നിവരാണ്. ‘സിഗ്മാ ഗാങ്’യുടെ നേതാവ് രഞ്ജൻ പഥക് ആയിരുന്നു. വർഷങ്ങളായി ബിഹാറിൽ കൊള്ള, ഭീഷണി, വാടക കൊലപാതകങ്ങൾ തുടങ്ങിയ ക്രിമിനൽ പ്രവർത്തനങ്ങളിൽ ഏർപ്പെട്ടിരുന്ന വലിയ ശൃംഖലയാണ് ‘സിഗ്മാ ഗാങ്’. രഞ്ജൻ പഥക്കിനെ പിടികൂടുന്നതിനായി ബിഹാർ സർക്കാർ 25,000 രൂപ പാരിതോഷികം പ്രഖ്യാപിച്ചിരുന്നതും ശ്രദ്ധേയമാണ്.
ബിഹാറിലെ സീതാമർഹി ഉൾപ്പെടെ അഞ്ച് കൊലപാതകങ്ങളിൽ ‘സിഗ്മാ ഗാങ്’ പങ്കാളികളായിരുന്നുവെന്ന് പൊലീസ് പറയുന്നു. സോഷ്യൽ മീഡിയയിലും ഓഡിയോ സന്ദേശങ്ങളിലൂടെയും രഞ്ജൻ നിരന്തരം പൊലീസിനെ വെല്ലുവിളിച്ചുവരികയായിരുന്നു. ബിഹാർ പൊലീസിൽ നിന്നു രക്ഷപ്പെടാനായാണ് രഞ്ജന്റെ നേതൃത്വത്തിൽ സംഘം ഡൽഹിയിലേക്ക് ഒളിച്ചോടിയതെന്നാണ് റിപ്പോർട്ട്.
Tag: Police- goonda encounter in Delhi; Four notorious goons from Bihar killed
