ആറ്റിങ്ങല്‍ ഗ്രീന്‍ലൈന്‍ ലോഡ്ജ് കൊലപാതകം; അസ്മിനയെ കൊലപ്പെടുത്തിയ ജോബി ജോർജ് കോഴിക്കോട് അറസ്റ്റിൽ
ആറ്റിങ്ങല്‍ മൂന്നു മുക്കിലെ ഗ്രീന്‍ലൈന്‍ ലോഡ്ജില്‍ കൊല്ലപ്പെട്ട നിലയില്‍ കണ്ടെത്തിയ വടകര സ്വദേശിനി അസ്മിന (40)യുടെ കൊലപാതകവുമായി ബന്ധപ്പെട്ട്, ഒപ്പം താമസിച്ചിരുന്ന ജോബി ജോർജിനെ പൊലീസ് കോഴിക്കോട് നിന്ന് അറസ്റ്റ് ചെയ്തു. സിസിടിവി ദൃശ്യങ്ങളുടെ സഹായത്തോടെയായിരുന്നു അറസ്റ്റ്. ദൃശ്യങ്ങൾ പരിശോധിച്ചപ്പോൾ ജോബി കൊലപാതകത്തിന് ശേഷം ബസ് സ്റ്റാൻഡിലേക്ക് പോയതും അവിടെ നിന്ന് കായംകുളത്തേക്കുള്ള ബസിൽ കയറിയതും കണ്ടെത്തി. തുടര്‍ന്ന് പൊലീസ് കായംകുളത്തും പിന്നീട് കോഴിക്കോട് മേഖലയിലുമായി നടത്തിയ തിരച്ചിലിലാണ് ഇയാളെ പിടികൂടിയത്.
പോലീസിന്റെ പ്രാഥമിക അന്വേഷണത്തിൽ അനുസരിച്ച്, അസ്മിനയും ജോബിയും കഴിഞ്ഞ രണ്ട് മുതല്‍ മൂന്ന് മാസം വരെ അടുപ്പത്തിലായിരുന്നു. അസ്മിന രണ്ട് മക്കളുടെ അമ്മയാണ്. ഇരുവരും കായംകുളത്ത് ഒരേ സ്ഥാപനത്തിൽ ജോലി ചെയ്തിരുന്നു, അവിടെ നിന്നാണ് പരിചയം അടുത്തത്.
ഏകദേശം ഒരു ആഴ്ച മുന്‍പാണ് ജോബി ആറ്റിങ്ങലിലെ ലോഡ്ജില്‍ ജോലി ആരംഭിച്ചത്. കഴിഞ്ഞ ചൊവ്വാഴ്ച, അസ്മിനയെ “ഭാര്യ”യായി പരിചയപ്പെടുത്തി ലോഡ്ജിൽ താമസിക്കാൻ കൊണ്ടുവന്നതായിരുന്നു. രാത്രി ഒരുമണിയോടെയാണ് ഇരുവരും മുറിയിലേക്ക് പോയത് എന്ന് ജീവനക്കാര്‍ പൊലീസിനോട് പറഞ്ഞു.
രാത്രിയിൽ ഇരുവരും മദ്യപിച്ച ശേഷമാണ് കടുത്ത വാക്കുതർക്കം ഉണ്ടായത് എന്ന് പൊലീസ് പറയുന്നു. അതിനിടെ, കുപ്പി കൊണ്ടാണ് അസ്മിനയെ ആക്രമിച്ചത് എന്നതാണ് പ്രാഥമിക നിഗമനം. അസ്മിനയുടെ ശരീരമാകെ മുറിവുകളുണ്ടായിരുന്നു, പ്രത്യേകിച്ച് തലയ്ക്ക് കനത്ത അടിയേറ്റതും ശ്രദ്ധേയമായിരുന്നു.
മുറിയിൽ പിടിവലി നടന്നതിന്റെ അടയാളങ്ങളും പൊട്ടിയ ബിയർ കുപ്പിയും പൊലീസ് കണ്ടെത്തി. ബുധനാഴ്ച പുലർച്ചെ നാലു മണിയോടെ ജോബി ലോഡ്ജിൽ നിന്ന് പുറത്തേക്കു പോകുന്ന ദൃശ്യങ്ങൾ സിസിടിവിയിൽ വ്യക്തമായി കാണപ്പെട്ടു.
ബുധനാഴ്ച രാവിലെ ജോബിയേയും അസ്മിനയേയും പുറത്തുകാണാത്തതിനെത്തുടർന്ന് ലോഡ്ജ് ജീവനക്കാർ സംശയം തോന്നി. മുറി തുറക്കാൻ സാധിക്കാതായപ്പോൾ അവർ പോലീസിനെ വിവരം അറിയിച്ചു. പൊലീസ് എത്തി വാതിൽ തള്ളി തുറന്ന് അകത്ത് കടന്നപ്പോഴാണ് അസ്മിനയുടെ മൃതദേഹം കണ്ടെത്തിയത്.
ആറ്റിങ്ങൽ പൊലീസ് ജോബിയെ പിടികൂടിയ ശേഷം വിശദമായി ചോദ്യം ചെയ്തു വരികയാണ്. കൊലപാതകത്തിന് പിന്നിലെ ഉദ്ദേശം എന്താണെന്നത് വ്യക്തമാക്കാൻ അന്വേഷണ സംഘം ശ്രമിച്ചുവരുന്നു. പ്രാഥമിക സൂചനകൾ പ്രകാരം മദ്യപാനത്തിനിടയിലെ തർക്കമാണ് കൊലപാതകത്തിലേക്ക് നയിച്ചത് എന്നാണ് പൊലീസ് നിഗമനം. അസ്മിനയുടെ മൃതദേഹം പോസ്റ്റ്‌മോർട്ടത്തിനായി തിരുവനന്തപുരം മെഡിക്കൽ കോളേജിലേക്ക് മാറ്റി.
Tag: Attingal Greenline Lodge murder; Joby George, who killed Asmina, arrested in Kozhikode
