ശബരിമല സ്വർണക്കൊള്ള; വ്യക്തമായ ഗൂഢാലോചന നടന്നിട്ടുണ്ടെന്ന് മുൻ ചീഫ് സെക്രട്ടറി കെ. ജയകുമാർ

ശബരിമലയിലെ സ്വർണതട്ടിപ്പിൽ വ്യക്തമായ ഗൂഢാലോചന നടന്നിട്ടുണ്ടെന്ന് മുൻ ചീഫ് സെക്രട്ടറി കെ. ജയകുമാർ വ്യക്തമാക്കി. ശബരിമലയിൽ നടന്നത് കൃത്യമായ ഭരണപരാജയമാണെന്നും, ക്ഷേത്രവുമായി ബന്ധപ്പെട്ട സ്വർണ ഉരുപ്പടികൾ ഉൾപ്പെടെ സുപ്രധാന വസ്തുക്കൾ കൈകാര്യം ചെയ്യുന്നതിൽ ഗുരുതരമായ വീഴ്ചകളുണ്ടായതാണെന്നും അദ്ദേഹം ചൂണ്ടിക്കാട്ടി.

“സ്വർണപ്പാളികൾ അറ്റകുറ്റപ്പണികൾക്കായി ശബരിമലയ്ക്ക് പുറത്തേക്ക് കൊണ്ടുപോകേണ്ടി വന്നത് എന്തിനാണ്?” എന്നതാണ് ഇപ്പോഴത്തെ പ്രധാന ചോദ്യമെന്നും കെ. ജയകുമാർ പറഞ്ഞു. ദ ന്യൂ ഇന്ത്യൻ എക്സ്പ്രസിന്റെ എക്സ്പ്രസ് ഡയലോഗ് പരിപാടിയിലായിരുന്നു അദ്ദേഹം പ്രതികരിച്ചത്. ശബരിമല സ്പെഷ്യൽ കമ്മീഷൻ ചെയർമാനായും ഹൈക്കോടതി നിയോഗിച്ച ഉന്നതാധികാര സമിതിയുടെ അധ്യക്ഷനായും പ്രവർത്തിച്ചിട്ടുള്ള കെ. ജയകുമാർക്ക് ക്ഷേത്രഭരണവുമായി ബന്ധപ്പെട്ട ദീർഘകാല പരിചയമുണ്ട്.

ശബരിമലയിലെ ഭരണസംവിധാനത്തിൽ ദീർഘകാലമായി നിലനിൽക്കുന്ന പാളിച്ചകളാണ് ഇപ്പോഴത്തെ വിവാദങ്ങൾക്ക് പശ്ചാത്തലമെന്നും അദ്ദേഹം പറഞ്ഞു. തിരുവിതാംകൂർ ദേവസ്വം ബോർഡിൽ സാങ്കേതികവൽക്കരണത്തിന്റെ അഭാവം, ജീവനക്കാരുടെ പരിശീലനത്തിലെ കുറവ് തുടങ്ങി നിരവധി പ്രശ്നങ്ങൾ ഇപ്പോഴും പരിഹരിക്കപ്പെടാത്ത നിലയിലാണ് എന്നും ജയകുമാർ അഭിപ്രായപ്പെട്ടു.

ഇപ്പോൾ ഉണ്ടായ വിവാദങ്ങൾക്ക് ഉത്തരവാദി ആരെന്ന് ചോദിക്കുമ്പോൾ, “സ്വർണപ്പാളികൾ നീക്കാൻ ആരാണ് നിർദ്ദേശം നൽകിയതെന്നതാണ് ആദ്യം പരിശോധിക്കേണ്ടത്. ഒരാൾക്ക് മാത്രം ഈ വിഷയത്തിൽ തീരുമാനം എടുക്കാൻ സാധിക്കില്ല; അതിനാൽ ഇതിന് പിന്നിൽ സംഘടിതമായ ഗൂഢാലോചനയുണ്ടെന്ന് കരുതേണ്ടതാണ്,” എന്നും കെ. ജയകുമാർ വ്യക്തമാക്കി.

Tag: Sabarimala gold loot: There was a clear conspiracy, says former Chief Secretary K. Jayakumar