താമരശ്ശേരി ഫ്രഷ് കട്ട് പ്ലാന്റിനെതിരായ പ്രതിഷേധം; മൂന്ന് പേരെ കൂടി പൊലീസ് അറസ്റ്റ് ചെയ്തു

താമരശ്ശേരി അറവ് മാലിന്യ സംസ്‌കരണ കേന്ദ്രമായ ഫ്രഷ് കട്ട് പ്ലാന്റിനെതിരായ സമരത്തിൽ ഉണ്ടായ സംഘർഷവുമായി ബന്ധപ്പെട്ട് മൂന്ന് പേരെ കൂടി പൊലീസ് അറസ്റ്റ് ചെയ്തു. താമരശ്ശേരി കുടുക്കിൽ ഉമ്മരം സ്വദേശി ഷബാദ് (30), കൂടത്തായി ഒറ്റപ്പിലാക്കിൽ മുഹമ്മദ് ബഷീർ (44), കരിമ്പാലൻകുന്ന് ജിതിൻ വിനോദ് (19) എന്നിവരാണ് പിടിയിലായത്. ഇതോടെ കേസിൽ അറസ്റ്റിലായവരുടെ എണ്ണം പത്തായി. ഷബാദിനെയും മുഹമ്മദ് ബഷീരിനെയും നോട്ടീസ് നൽകി വിട്ടയച്ചതായി പൊലീസ് അറിയിച്ചു.

സംഭവവുമായി ബന്ധപ്പെട്ട് മൊത്തം 361 പേരെതിരെ കേസെടുത്തിട്ടുണ്ട്. ഡിവൈഎഫ്ഐ കൊടുവള്ളി ബ്ലോക്ക് പ്രസിഡന്റ് കൂടിയായ കൊടുവള്ളി ബ്ലോക്ക് പഞ്ചായത്ത് അംഗം ടി. മെഹറൂഫ് ഒന്നാം പ്രതിയാണ്. കലാപം സൃഷ്ടിക്കൽ, വഴിതടയൽ, അന്യായമായി സംഘം ചേരൽ തുടങ്ങിയ വകുപ്പുകളിലാണ് കേസുകൾ രജിസ്റ്റർ ചെയ്തിരിക്കുന്നത്.

ഫ്രഷ് കട്ട് പ്ലാന്റിന് തീയിട്ട സംഭവത്തിൽ 30 പേരെതിരെ വധശ്രമക്കുറ്റം ഉൾപ്പെടെ ഗുരുതര കുറ്റങ്ങൾ ചുമത്തിയിട്ടുണ്ട്. തൊഴിലാളികളെ കൊല്ലണമെന്ന ഉദ്ദേശത്തോടെ കണ്ടെയ്‌നർ ലോറി കത്തിച്ചുവെന്നതും മാരകായുധങ്ങളും സ്‌ഫോടക വസ്തുക്കളും ഉപയോഗിച്ചതായും എഫ്‌ഐആറിൽ രേഖപ്പെടുത്തിയിട്ടുണ്ട്. തീപിടിത്തത്തിൽ ഫ്രഷ് കട്ടിന് ഏകദേശം അഞ്ച് കോടി രൂപയുടെ നഷ്ടം സംഭവിച്ചതായി കണക്കാക്കുന്നു.

സംഘർഷത്തിനിടെ തിരുവമ്പാടി എഎസ്‌ഐയെ മർദിച്ചതിലും, മൊബൈൽ ഫോൺ (വില ₹45,000) കവർന്നതിലും പത്തോളം പേർക്ക് എതിരെ കേസെടുത്തു. എഎസ്‌ഐ തന്റെ മൊബൈലിൽ സംഘർഷ ദൃശ്യങ്ങൾ പകർത്തുന്നതിനിടെയാണ് ആക്രമണമുണ്ടായത്.

കഴിഞ്ഞ ദിവസമാണ് കട്ടിപ്പാറയിലെ ഫ്രഷ് കട്ട് അറവ് മാലിന്യ സംസ്‌കരണ പ്ലാന്റിന് മുന്നിൽ സമരക്കാരും പൊലീസും തമ്മിൽ ഏറ്റുമുട്ടിയത്. ദുര്‍ഗന്ധം പരത്തുന്നതും പുഴയിലേക്ക് മാലിന്യം ഒഴുക്കുന്നതുമെന്നാരോപിച്ച് നാട്ടുകാർ നടത്തിയ പ്രതിഷേധമാണ് സംഘർഷത്തിലേക്ക് നീങ്ങിയത്. സമരക്കാർ പ്ലാന്റിന് തീ വെച്ചതും മാലിന്യ ശേഖരണ വാഹനങ്ങൾക്ക് നേരെ കല്ലെറിഞ്ഞതുമാണ് സാഹചര്യം വഷളാക്കിയത്. ഇതിൽ നിരവധി പൊലീസുകാർക്കും പരിക്കേറ്റു. പിന്നാലെ പൊലീസ് കണ്ണീർവാതകം പ്രയോഗിച്ച് സ്ഥിതിഗതികൾ നിയന്ത്രിച്ചു.

സംഭവം ആസൂത്രിതമായ ആക്രമണമായിരുന്നുവെന്ന് കണ്ണൂർ റേഞ്ച് ഡിഐജി യതീഷ് ചന്ദ്ര വ്യക്തമാക്കി. സ്ത്രീകളെയും കുട്ടികളെയും മനുഷ്യ കവചമാക്കി ആക്രമണം നടത്തിയതായും, അതിന് പിന്നിൽ ചില താൽപര്യക്കാർ പ്രവർത്തിച്ചിട്ടുണ്ടെന്നും അദ്ദേഹം പറഞ്ഞു. “രാവിലെ സമാധാനപരമായിരുന്ന സ്ഥിതി വൈകിട്ട് പെട്ടെന്ന് അക്രമത്തിലേക്ക് മാറി. പ്ലാന്റിലെ ജീവനക്കാർ അകത്തുണ്ടായിരിക്കെ തീ വെച്ചു. ഫയർഫോഴ്‌സ് എത്തി തീ അണയ്ക്കാൻ ശ്രമിക്കുമ്പോഴും വാഹനം തടഞ്ഞു. ഇത് മനുഷ്യത്വരഹിതമായ നടപടിയാണ്,” ഡിഐജി പറഞ്ഞു.

സംഘർഷത്തിൽ റൂറൽ എസ്‌പി, താമരശ്ശേരി എസ്‌എച്ച്‌ഒ ഉൾപ്പെടെ 16 പൊലീസുകാർക്ക് പരിക്കേറ്റു. ആക്രമണം നടത്തിയവർക്കെതിരെ കർശന നടപടി സ്വീകരിക്കുമെന്ന് പൊലീസ് അറിയിച്ചു.

Tag: Protest against Thamarassery Fresh Cut Plant; Police arrest three more people